Ko e tauaga i Amaketo kua hagaao ke he tauaga fakahiku he tau fakatufono he tagata mo e Atua. Ko e tau fakatufono nei mo lautolu ne lalago ai ne totoko e Atua ti pihia foki mogonei ne fakatikai ke omaoma ke he takitakiaga haana. (Salamo 2:2) To fakaoti he tauaga i Amaketo e pule he tagata.​—Tanielu 2:44.

 Ko e kupu “Amaketo” ne lagataha ni e kitia he Tohi Tapu he tohi a Fakakiteaga 16:16. He perofetaaga, talahau ia Fakakiteaga ko e “mena kua higoa ke he vagahau Heperu ko Amaketo,” ko e “tau patuiki he lalolagi, mo e lalolagi oti kana” kua “fakapotopoto a lautolu ke tau ke he aho lahi he Atua mana.”​—Fakakiteaga 16:14.

 Ko hai ka tau i Amaketo? Ko Iesu Keriso ka takitaki e kautau he lagi ke tau ke he tau fī he Atua ti kautū ai. (Fakakiteaga 19:11-16, 19-21) Putoia he tau fī nei e tau tagata ne totoko ke he pule he Atua mo e fakatikai e Atua.​​—Esekielu 39:7.

 Fakahoko mooli kia e tauaga i Amaketo he Faahi Uta? Nakai. Kua nakai fakakaupa ke he taha e matakavi, ka ko e tauaga i Amaketo kua lauia e lalolagi katoatoa.​—Ieremia 25:32-34; Esekielu 39:17-20.

 Fa talahau foki e Amaketo ko e “Ha–Maketo” (faka-Heperu Har Meghiddohnʹ), kakano “Mouga ko Mekito.” Ko Mekito ko e maaga lahi i Isaraela i tuai. Haia he fakamauaga tala tuai e tau latauaga he tau faahi matakavi ia, fai foki ne fakamau he Tohi Tapu. (Tau Fakafili 5:19, 20; 2 Tau Patuiki 9:27; 23:29) Pete ia, nakai maeke a Amaketo ke hagaao ke he tau matakavi tata ki Mekito i tuai. Nakai fai mouga i ai ne lahi, po ke pahua katoa a Isereelu ke tau ai e tau tagata tau oti ke he Atua. Ka kua hagaao e Amaketo ke he tau motu oti he lalolagi katoa ka kaufakalataha ke totoko fakahiku ke he pule he Atua.

 To fēfē e tuaga he tauaga i Amaketo? He nakai iloa e tautolu e puhala ka fakaaoga he Atua e malolō haana, haia haana a tau kanavaakau tuga ne fakaaoga e ia fakamua​—ko e uha tuli, mafuike, to lipilipi e uha, afi mo e taio, kape e hila, mo e tau gagao po ke tatalu. (Iopu 38:22, 23; Esekielu 38:19, 22; Hapakuka 3:10, 11; Sakaria 14:12) He fakagogoa, liga to fekeliaki ni he tau fī he Atua a lautolu, to iloa mooli e lautolu ko e Atua kua tau mo lautolu.​—Esekielu 38:21, 23; Sakaria 14:13.

 Ko Amaketo kia ke fakaotioti e lalolagi? To nakai ko e moumouaga he palaneta, ha ko e fua lalolagi ko e kaina tukulagi he tagata. (Salamo 37:29; 96:10; Fakamatalaaga 1:4) He nakai moumou e tau tagata oti kana, ko e Amaketo ka tamai e fakamouiaga, “ko e moto tagata tokologa” ko e tau fekafekau he Atua to fakamomoui.​—Fakakiteaga 7:9, 14; Salamo 37:34.

 Ko e talahauaga foki ke he kupu “lalolagi” he Tohi Tapu ne fa hagaao ke he tau tagata mahani kelea ne totoko ke he Atua. (1 Ioane 2:15-17) Kua kakano ai, ko Amaketo ka tamai e “fakaotiaga he lalolagi.”​—Mataio 24:3.

 To hoko mai a fe a Amaketo? He fakatutala hagaao ke he “lahi ai e matematekelea” ka fakakatoatoa he tauaga i Amaketo, ne pehē a Iesu: “Ka ko e aho ia mo e magaaho ia nakai iloa he taha tagata, nakai iloa foki he tau agelu he lagi, ka ko e haku a Matua hokoia ni.” (Mataio 24:21, 36) Ka e fakakite mai he Tohi Tapu to hoko mai a Amaketo he magahala he ha ha hinei ha Iesu, ne kamata he lagi he 1914.​—Mataio 24:37-39.