Tau Salamo 147:1-20
147 HALELUIA, ha kua mitaki ni ke uhu lologo ke he Atua ha tautolu, ha ko e mena fulufuluola ia, kua gali foki e fakahekeaga.
2 Kua ati hake e Iehova a Ierusalema; kua fakapotopoto mai e ia e tau tagata a Isaraela ne tutuli.
3 Kua fakamalolo e ia a lautolu ne malipilipi e tau loto; kua pipi e ia ha lautolu a tau motu.
4 Kua totou e ia e tau fetu poke ne fiha; kua ui e ia ha lautolu a tau higoa oti kana.
5 Kua homo ni ha tautolu a Iki, kua lahi hana malolo; nakai maeke ke fakamatala hana iloilo.
6 Kua lagaaki e Iehova e tau tagata matematekelea; ka e liti hifo e ia e tau tagata mahani kelea ke he kelekele.
7 Kia tali atu a mutolu kia Iehova mo e fakaaue, kia uhu lologo a mutolu ke he Atua ha tautolu ke he kitara.
8 Ko ia ne ufiufi e lagi ke he tau aolagi, ko ia ne taute e uha ma e kelekele; ko ia ne fakatupu e motietie ke he tau mouga.
9 Ko ia ne āge ke he tau manu huifa ha lautolu a mena kai, pihia foki e tau punua oreva ka tagi atu kia ia.
10 Nakai fiafia a ia ke he malolo he solofanua, nakai mitaki foki kia ia e tau hui he tagata.
11 Kua mitaki kia Iehova a lautolu kua matakutaku kia ia, ko lautolu kua amaamanaki ke he hana fakaalofa.
12 Ierusalema na e, kia nava kia Iehova; Siona na e, kia fakaheke atu a koe ke he hāu a Atua,
13 Ha kua fakamao e ia e tau fakamau fakalava he hāu a tau gutuhala; kua fakamonuina e ia hāu a fanau ki loto ia koe.
14 Ko ia ne fakatupu e mafola ke he hāu a katofia; ko ia ne fagai a koe ke makona ke he tau saito kua mua e mitaki.
15 Kua fakafano e ia hana poaki ke he lalolagi, ne mafiti lahi hana tau kupu ne poi atu.
16 Ko ia ne ta mai e kiona tuga ne tau fulufulu mamoe; ko ia ne ganagana e hahau tuli tuga ne efuefu afi.
17 Ko ia ne fakafano mai hana vai tuli tuga ne tau valavalamena. Ko hai taha ke tu ki mua he hana makalili?
18 Kua vagahau mai hana kupu, ti liu puke vai ai e tau mena ia; kua fakaagi e ia hana matagi, ti tafe ai agataha e vai.
19 Kua fakailoa e ia hana kupu kia Iakopo, ko e hana tau fakatufono mo e hana tau fakafiliaga kia Isaraela.
20 Kua nakai eke pihia e ia ke he taha motu; kua nakai iloa foki e lautolu hana tau fakafiliaga. Haleluia.