NE LILIU mai foki e tau Filisitia ke tau mo Isaraela. Ko e lafu taokete tokotolu ha Tavita haia mogonei he kautau ha Saulo. Ti hoko ke he taha aho ne tala age a Iese ki a Tavita: ‘Kia uta falu fua saito mo e areto pukupuku ke he haau a lafu taokete. Ti fakakia kua fēfē a lautolu.’

Ko e magaaho ne hoko atu a Tavita ke he heaga api he tau kautau, ne poi a ia ke he male tau ke kumi e lafu haana. Ko e tupua Filisitia ko Koliato ne hau ke fakafiufiu ke he tau Isaraela. Ne taute ai e ia e mena nei he tau mogo pogipogi mo e tau mogo afiafi oti ke he 40 e aho. Ne kalaga a ia: ‘Fifili mai taha he tau tagata taane haau ke tau mo au. Ka kautū a ia ke kelipopo au, to eke a mautolu mo tau tupa ki a mutolu. Ka e ka kautū au mo e kelipopo a ia, to eke a mutolu mo tau tupa ha mautolu. Ko e paleko haaku ki a koe ke fifili taha ke tau mo au.’

Ne hūhū a Tavita ke he falu he tau kautau: ‘Ko e heigoa ka moua he tagata ka keli e Filisitia nei mo e fakatokanoa a Isaraela mai he mena fakamā nei?’

‘To foaki e Saulo ke he tagata ia loga e tau monuina,’ he talahau he kautau. ‘Mo e to foaki age e ia haana tama fifine mo hoana he tagata ia.’

Ka kua matakutaku oti e tau Isaraela ia Koliato ha kua lahi mahaki a ia. Kua molea e 9 e futu (kavi ke he 3 e mita) he tokoluga haana, ti taha he tau tagata tau ne totō haana a akau pāpā.

Ti ō atu falu he tau kautau mo e tala age ke he Patuiki ko Saulo kua manako a Tavita ke tau mo Koliato. Ka e tala age a Saulo ki a Tavita: ‘Nakai maeke a koe ke tau mo e Filisitia nei. Ko e tama tote a koe, ti ko e kautau a ia tali mai he moui katoa haana.’ Ne tali a Tavita: ‘Ne keli e au e urosa mo e leona ne uta e tau mamoe he matua taane haaku. Ti ko e Filisitia nei to tuga foki ni taha ia laua ia. To lagomatai e Iehova au.’ Ti pehē a Saulo: ‘Fano a, kia fakalataha a Iehova mo koe.’

Ne hifo a Tavita ke he vailele mo e tamai lima e maka molemole, mo e fafao ai he kato haana. Ti tamai e ia e filo ke liti aki e maka mo e fina atu ke feleveia mo e tupua. Ko e magaaho ne kitia e Koliato a ia, ne ofo lahi a ia. Manatu a ia to mukamuka lahi ke tamate a Tavita.

‘Hau ā ki a au,’ he talahau e Koliato, ‘to foaki atu e au haau a tino ke kai he tau manu lele mo e tau manu huifā.’ Ka e pehē a Tavita: ‘Kua hau a koe ki a au mo e pelu, mo e tao mo e tao leoleo, ka e fina atu au ki a koe mo e higoa ha Iehova. Ko e aho nei to foaki mai e Iehova a koe ke he haaku lima mo e to keli e au a koe.’

He mena ia ne poi atu a Tavita ki a Koliato. Ne tamai e ia e maka mai he haana kato, ti tuku ke he filo haana, ti liti e ia mo e malolō katoa haana. Ne lele fakahako e maka ke he matalē ha Koliato, ti veli a ia mo e mate ai! Magaaho ne kitia he tau Filisitia ha lautolu a toa kua veli, ne fuluhi a lautolu oti mo e fehola. Ne tutuli atu he tau Isaraela a lautolu mo e kautū ai he tau.