Hau e tala mitaki ia Iehova, ko e Atua fiafia, ne manako ke he tau magafaoa ke fiafia. (1 Timoteo 1:11) Ne tamata e ia e fakamauaga. Ko e fakamauaga kua aoga ke he fiafia he magafaoa ha kua foaki e takatakaiaga haohao mitaki ke feaki e tau fanau. Kua lata e tau Kerisiano ke fakalilifu e tau matafakatufono he motu hagaao ke he tohiaga he fakamauaga.​—Totou Luka 2:1, 4, 5.

Fēfē e onoonoaga he Atua ke he fakamauaga? Manako a ia ke tumau e pipiaga he tagata taane mo e fifine. Kua manako a Iehova ke he tau taane mo e tau hoana ke mahani fakamooli ki a laua ni. (Heperu 13:4) Vihiatia e ia e tau vevehe. (Malaki 2:16) Ka e fakaatā e ia e tau Kerisiano ke tau vevehe mo e liu mau foki kaeke kua mahani faivao e hoa haana.​—Totou Mataio 19:3-6, 9.

Ne tufuga e Iehova e tau tagata taane mo e tau fifine ke taute e tau matagahua felagomataiaki he fakamauaga. (Kenese 2:18) Ha ko e ulu magafaoa, kua lata e taane ke taki he leveki fakatino e magafaoa haana mo e fakaako a lautolu hagaao ke he Atua. Kua lata a ia ke foaki noa e fakaalofa ma e hoana haana. Ko e tau taane mo e tau hoana kua lata ke fefakaalofaaki mo e fefakalilifuaki. Ha kua nakai mitaki katoatoa e tau taane mo e tau hoana oti, ko e fakaako ke fakamagalo ko e matapatu ke he fiafia he magafaoa.​—Totou Efeso 4:31, 32; 5:22-25, 33; 1 Peteru 3:7.

Ka lauia a koe he tau mena uka he fakamauaga haau, kua lata tokoua a mua ke fefakakiteaki e fakaalofa ki a mua ni. (1 Korinito 13:4, 5) Kua nakai fakaohooho he Kupu he Atua e nonofo kehekehe ko e puhala ke fakamafola e tau lekua aga mau he fakamauaga.​—Totou 1 Korinito 7:10-13.

Manako a Iehova ki a koe ke fiafia. Kua foaki e ia ki a koe e fakatonuaga ne mua atu ke he puhala ke olioli haau a vahā fuata. Manako a ia ki a koe ke aoga mai he pulotu mo e iloaaga he tau matua haau. (Kolose 3:20) Manako foki a Iehova ki a koe ke moua e olioli he taute e tau mena ma e haau a Tufuga mo e haana Tama.​—Totou Fakamatalaaga 11:9–12:1; Mataio 19:13-15; 21:15, 16.

Lata ia mutolu ke gahua malolō ke foaki e tau mena kai, maluaga, mo e tau mena tui ma e tau fanau ha mutolu. (1 Timoteo 5:8) Ka e, ma e tau fanau ha mutolu ke moua e fiafia, kua lata foki ia mutolu ke fakaako a lautolu ke fakaalofa ke he Atua mo e ke fakaako mai ia Ia. (Efeso 6:4) Ko e fifitakiaga ha mutolu he fakakite e fakaalofa ma e Atua ka fakalagalaga hokulo e tau loto he tau fanau ha mutolu. Ka fakavē ke he Kupu he Atua, ko e fakaakoaga ha mutolu ka fakahakohako e tau manamanatuaga he tau fanau ha mutolu ke he puhala mitaki.​—Totou Teutaronome 6:4-7; Tau Fakatai 22:6.

Aoga e tau fanau ka fakamalolō mo e nava e mutolu a lautolu. Kua lata foki a lautolu ke fakahako mo e akonaki. Ko e fakamahaniaga pihia kua puipui a lautolu mai he mahani ka fofō a lautolu mai he fiafia. (Tau Fakatai 22:15) Ka kua lata e akonakiaga ke nakai pāpā maō mo e vale.​—Totou Kolose 3:21.

Ko e Tau Fakamoli a Iehova kua taute fakailoa loga e pepa kua tohi pauaki ke lagomatai e tau matua mo e tau fanau. Ko e tau pepa nei kua fakavē ke he Tohi Tapu.​—Totou Salamo 19:7, 11.