Ko e Atua ko e fakaalofa, ka e loga e gahua fakalialia he tau lotu ne totoku kua mumuitua ke he Atua. Fakavai e tau lotu nei ha kua pikopiko hagaao ke he Atua. Pikopiko fēfē a lautolu hagaao ki a Ia? Fēfē e logonaaga Haana ke he mena ia? Ti ko e heigoa Haana ka taute ke he mena ia?

1. Ko e heigoa e tau fakaakoaga pikopiko he lotu fakavai hagaao ke he Atua?

Ko e lotu fakavai “kua fehikitaki e lautolu e kupu moli ke he Atua mo e kupu pikopiko.” (Roma 1:25) Ma e fakatai, laulahi he tau lotu ne nakai fakaako e higoa he Atua ke he tau tagata ha lautolu. Ka e talahau he Tohi Tapu kua latatonu ke fakaaoga e higoa he Atua. (Roma 10:13, 14) Talahau he falu takitaki lotu ko e tau mena kelea ne tutupu ko e finagalo he Atua. Ka ko e pikopiko a ia. Nakai ko e punaaga he tau mena kelea e Atua. (Totou Iakopo 1:13.) Ko e tau fakaakoaga pikopiko he lotu kua fakamamao e tau tagata mai he Atua.

2. Ko e heigoa e tau gahua pikopiko he lotu fakavai hagaao ke he Atua?

Ko e lotu fakavai kua nakai taute e tau tagata tuga he taute e Iehova. Pehē e Tohi Tapu ko e lotu fakavai “kua o fakalataha mo ia hana tau hala kua hoko ni ke he lagi.” (Fakakiteaga 18:5) Ke he loga e tau tau, kaufakalataha e tau lotu mo e tau politika ke lalago e tau felakutaki, mo e fakaatā po ke talia ke mamate e tau tagata tokologa. Falu takitaki lotu ne muhukoloa ti ole tupe ke he tau tagata ma e tau mena nei. Ko e tau gahua nei ne fakakite kua nakai iloa e lautolu e Atua, mo e nakai tonuhia foki ke hukui a Ia.​—Totou 1 Ioane 4:8.

3. Fēfē e logonaaga he Atua ke he lotu fakavai?

Kaeke ko e mena ne taute he lotu fakavai kua fakaita a koe, fēfē e logonaaga ha Iehova he manatu haau? Fakaalofa e Atua ke he tau tagata, ka e ita a ia ke he tau takitaki lotu ne pikopiko hagaao ki a ia ti kua ekefakakelea e tau tagata ha lautolu. Mavehe a ia to moumou e lotu fakavai mo e to “nakai tuai kitia ni.” (Fakakiteaga 18:21) Nakai leva, to moumou he Atua e tau lotu fakavai oti.​—Fakakiteaga 18:8.

 KUMIKUMI FAKAHOKULO

4. Nakai talia he Atua e tau lotu oti

Tokologa e tagata ne talitonu ko e tau lotu kua tuga e tau hala kehekehe kua takitaki atu ke he Atua. Ka e mooli nakai e mena ia? Totou Mataio 7:13, 14, ti tutala ke he hūhū nei:

• Fakamaama fēfē he Tohi Tapu e hala kua takitaki atu ke he moui?

Tā e VITIŌ, ti tutala ke he hūhū nā.

• Talahau kia he Tohi Tapu kua loga e lotu ne fakafiafia e Atua?

 6. Manako e Atua ke o kehe mai e tau tagata he lotu fakavai

Totou Fakakiteaga 18:4, a ti tutala ke he hūhū nei:

• Fēfē e logonaaga haau ke iloa kua manako e Atua ke fakahao e tau tagata kua fakahehē he lotu fakavai?

7. Matutaki ke fakaako hagaao ke he Atua mooli

Fakaohooho kia he lotu fakavai e onoonoaga haau ke he Atua? Manamanatu ke he tama ne tiaki e fakatonuaga mitaki he matua taane haana. Toka he tama e kaina ti taute e ia e tau mena kelea he moui. Nakai talia he matua taane e tau gahua he tama haana. Ko e ha kua nakai hako ke tukupau e matua taane ha ko e puhala kelea he moui he tama haana?

• Hako kia ke tukupau a Iehova mo e fakaoti e fakaako hagaao ki a Ia ha ko e tau gahua he lotu fakavai?

 MANATU KATOA

Kua pikopiko e lotu fakavai hagaao ke he Atua ha ko e tau fakaakoaga fakavai mo e tau mahani fakalialia. To moumou he Atua e lotu fakavai.

Liu Fakamanatu

• Fēfē e logonaaga haau ke he mena ne fakaako he lotu fakavai, pihia foki mo e tau gahua?

• Fēfē e logonaaga ha Iehova ke he lotu fakavai?

• Ko e heigoa ka taute he Atua ke he lotu fakavai?