Manamanatu ko e fina atu fakamua laia a koe ke he motu kehe. Feleveia a koe mo e tau tagata, tau aga fakamotu, mo e tau kai ne nakai mahani a koe ki ai. Maama ai, to hogohogo manava a koe.

Liga pihia foki e logonaaga haau ka totou fakamua e Tohi Tapu. Tuga kua hu atu a koe ke he lalolagi i tuai ne nakai mahani a koe ki ai. I ai, feleveia a koe mo e tau tagata Filisitia, ne kehe foki e tau aga fakamotu, tuga e ‘hehe e tau tapulu,’ mo e iloa e mena kai ko e manai. (Esoto 16:31; Iosua 13:2; 2 Samuela 3:31) Uka ke maama e tau mena oti nei. Tuga ka fina atu ke he motu kehe, to fiafia nakai a koe ka fai tagata ne lagomatai ke fakamaama atu e tau mena nei?

Tali mai he tohia e tau tohiaga tapu he senetenari ke 16 aki F.V.N., kua fai lagomatai ma e tau tagata ke maama e tau kupu ia. Ma e fakatai, ko Mose ko e takitaki fakamua he motu ko Isaraela, “ne kamata ai . . . ke fakamatala” he fakamaama e tau kupu kua tohi.​—Teutaronome 1:5.

Ko e tau faiaoga lotomatala ne kua lata tonu ke fakaako e tau kupu Tohi Tapu ne momoui agaia he hoko ke he senetenari ke hogofuluaki. He 455 F.V.N. ko e matakau lahi he tau Iutaia, ne tokologa foki e tau tama ikiiki, ne fakapotopoto ke he malē he maaga ko Ierusalema. Ko e tau faiaoga Tohi Tapu ne “totou fakatekiteki ai e lautolu ke he tohi [ia ne tapu].” Ka e lahi atu e mena ha lautolu ne taute. Ne lagomatai foki e lautolu ke “maama ai e tau tagata ke he tau mena ne totou.”​—Nehemia 8:1-8.

Lima e senetenari he mole, ne taute foki e Iesu Keriso e gahua fakaako pihia. Ti kua iloa he tau tagata a ia ko e akoako. (Ioane 13:13) Fakaako e ia e moto tagata tokologa, mo e tau tagata takitokotaha. He magaaho ne tutala a ia ke he moto tagata tokologa he lauga talahaua he mouga, ati “ofomate ai e lanu tagata ke he hana tau kupu.” (Mataio 5:1, 2; 7:28) He vahā tau tupu he 33 V.N., ne tutala a Iesu ke he tokoua e tutaki haana he ō he puhala ke he maaga ne tata ki Ierusalema, ne “fakamatala [fakamaama] mai foki e ia e tau Tohi” ki a laua.​—Luka 24:13-15, 27, 32.

Ko e tau tutaki ha Iesu ko e tau faiaoga foki he Kupu he Atua. He taha magaaho, ko e iki mai i Aitiope ne totou e tau kupu mai he tau Tohiaga Tapu. Ko e tutaki ko Filipo ne fina atu mo e hūhū ki ai: “Kua maama nakai kia koe e tau mena kua totou ai e koe?” Ne tali e tagata Aitiope: “To maeke fefe e au, ka nakai fakakite mai e taha kia au?” Ti fakamaama e Filipo e kakano he tau kupu ki a ia.​—Gahua 8:27-35.

Tuga e tau faiaoga Tohi Tapu he vahā fakamua, kua taute foki he Tau Fakamoli a Iehova e gahua fakaako Tohi Tapu he vahā nei he 239 e motu he lalolagi katoa. (Mataio 28:19, 20) He tau faahi tapu takitaha, kua lagomatai e lautolu ke molea e hiva e miliona tagata ke maama e Tohi Tapu. Tokologa ia lautolu ne moua e fakaakoaga nei ko e tau tagata ne nakai feaki hake ko e tau Kerisiano. Ko e tau fakaakoaga nei kua nakai totogi ti maeke ke taute he kaina he tagata po ke taha matakavi hagahaga mitaki. Falu tagata ne fiafia ke taute e tau fakaakoaga he puhala he telefoni po ke vitiō, he komopiuta po ke matini utafano.

Fakamolemole matutaki ke he taha he Tau Fakamoli a Iehova ma e falu vala tala ke maeke ia koe ke aoga mai he fakaholoaga nei. To iloa e koe ko e Tohi Tapu ko e tohi kua maeke ke maama mo e “kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu,” ke maeke ia koe ke “katoatoa ai e mitaki he tagata he Atua, kia taute ni a ia ke he tau gahua mitaki oti kana.”​—2 Timoteo 3:16, 17.