Tau Hūhū Tohi Tapu kua Tali
Fakaheke kia he tau lotu oti e Atua?
He fanogonogo ke he tau vala tala he lalolagi, liga mailoga e koe kua taute e tau mena kelea he falu mogo he higoa he lotu. Nakai kamata mai e tau lotu oti he Atua mooli. (Mataio 7:15) Mooli, kua tokologa e tau tagata kua fakahehē.—Totou 1 Ioane 5:19.
Pete ia, kua mailoga he Atua e tau tagata fakamooli ne fiafia ke he tau mena mitaki mo e mooli. (Ioane 4:23) Uiina he Atua e tau tagata pihia ke fakaako e kupu mooli he haana Kupu, ko e Tohi Tapu.—Totou 1 Timoteo 2:3-5.
Mailoga fēfē e koe e lotu mooli?
Kua fakalataha e Iehova ko e Atua e tau tagata mai he tau tuaga fakalotu loga he fakaako a lautolu ke he kupu mooli mo e fakaako a lautolu ke fakaalofa ke he taha mo e taha. (Mika 4:2, 3) Ti maeke ia koe ke mailoga e tau tagata ne fakalataha ke he lotu mooli he puhala ne leveki e lautolu ke he taha mo e taha.—Totou Ioane 13:35.
Fakalataha e Iehova ko e Atua e tau tagata kehekehe he tapuakiaga mooli.—Salamo 133:1
Fakavē he tau tagata tapuaki mooli e tua mo e puhala moui ha lautolu ke he Tohi Tapu. (2 Timoteo 3:16) Fakaheke foki e lautolu e higoa he Atua. (Salamo 83:18) Ti fakapuloa e lautolu e Kautu he Atua ko e amaamanakiaga ni ma e tau tagata. (Tanielu 2:44) Fifitaki e lautolu a Iesu he ‘kikila atu e maama’ ha lautolu, he taute e tau mena mitaki ke he tau katofia ha lautolu. (Mataio 5:16) Kua mailoga mogoia e tau Kerisiano mooli ha ko e tau ahiahi fakakatofia ha lautolu ke he tau kaina he tau tagata ke folafola e tala mitaki he Kautu he Atua.—Totou Mataio 24:14; Gahua 5:42; 20:20.
