‘Kaeke kua iloa he Atua e tau mena oti kana, putoia e tau manatu mo e tau manako haaku, ko e ha kua lata au ke liogi?’ he liga hūhū e koe. Kua aoga e hūhū ia. Nakai kia pehē a Iesu, ko e Atua “kua fioia . . . e tau mena kua nonofogati ai a mutolu, ka e nakaila ole atu a mutolu kia ia”? (Mataio 6:8) Ne mailoga he Patuiki ko Tavita ha Isaraela i tuai e mena nei ti tohi e ia: “Nakai fakai ha kupu ke he gutu haku, kitiala, Iehova na e kua fioia fakaoti ai e koe.” (Salamo 139:4) Ko e ha mogoia kua lata ia tautolu ke fuluhi ke he Atua he liogi? Ke tali e hūhū ia, manamanatu la tautolu ke he talahauaga he Tohi Tapu ke he tau liogi he tau tagata tapuaki he Atua. *

Pete kua pehē e Tohi Tapu kua iloa e Iehova * ko e Atua e tau mena oti kana, ne fakakite foki kua nakai fakaputu ni a ia he tau vala tala ke he tau tagata tapuaki haana. (Salamo 139:6; Roma 11:33) Ko e manamanatuaga lahi ue atu haana kua nakai tuga e komopiuta ne tanaki he tau vala tala ke he tau tagata takitaha. Ka kua mataala lahi e Atua ke he tau manatu hokulo ha tautolu he manako a ia ke fakatata atu a tautolu ki a ia. (Salamo 139:23, 24; Iakopo 4:8) Kakano ia ne omoomoi e Iesu e tau tutaki haana ke liogi, pete he fitā e iloa he Matua e tau mena oti kua lata ma tautolu. (Mataio 6:6-8) Ka talahau tumau e tau manatu ha tautolu ke he Tufuga ha tautolu, to fakatata lahi atu a tautolu ki a ia.

He falu magaaho, liga uka ia tautolu ke iloa tonu e mena ke ole ki ai he liogi. He tau tuaga pihia, maeke e Atua ke fioia e tau logonaaga ha tautolu ne nakai maeke ke talahau, ti kua iloa mitaki katoatoa e ia e tau tuaga ha tautolu mo e tali ai e tau manako ha tautolu. (Roma 8:26, 27; Efeso 3:20) Ka mailoga e tautolu kua gahuahua e Atua he tau momoui ha tautolu, pihia foki ke he tau puhala nakai maaliali, kua futia a tautolu ki a ia.

Kua fakamafana he Tohi Tapu na tali he Atua Malolō Ue Atu e tau liogi he tau fekafekau tua fakamooli haana, ka e fakakite mai foki e tau kakano ka nakai fanogonogo a ia ke he falu liogi. Ma e fakatai, he mogo ne holofa lahi e favale i Isaraela i tuai, ne poaki e Atua ke he perofeta haana ko Isaia ke tala age ke he tau tagata: “Ka fakaloga ai e mutolu e tau liogi nakai fanogonogo atu au; kua puke ha mutolu a tau lima ke he toto.” (Isaia 1:15) Maaliali ai, ko lautolu ne fakavihia e tau fakatufono he Atua po ke liogi mo e manako kelea, to nakai amanaki ke logona he Atua.​​—⁠Tau Fakatai 28:9; Iakopo 4:3.

He taha faahi, pehē e Tohi Tapu: “Kaeke ke ole atu ai e tautolu ha mena ke lata mo e hana finagalo, ti fanogonogo mai ai a ia kia tautolu.” (1 Ioane 5:14) Ti kua kakano kia e mena ia to tali he Atua e tau ole oti he haana tau tagata tapuaki? Nakai pihia. Manamanatu ke he aposetolo ko Paulo, ne lagatolu e ole ke he Atua ke utakehe e “mena mahukihuki ke he tino.” (2 Korinito 12:7, 8) Liga matematekelea a Paulo he fai lekua tumau ke he mata. Fakahogohogo manava mooli e mena ia ki a ia! Ne foaki age ki a Paulo e malolō ke fakamaulu ti hokotia foki ke fakaliu tu mai, ka kua lata ni a ia ke fakauka ke he gagao haana. (Gahua 19:11, 12; 20:9, 10) Pete ko e tali ke he tau ole haana kua nakai tuga he manako e ia, ne talia fiafia e Paulo e tali he Atua.​​—⁠2 Korinito 12:9, 10.

Mooli, ne moua he falu tagata he Tohi Tapu e tau tali fakamana ke he tau liogi ha lautolu. (2 Tau Patuiki 20:1-7) Ka ko e tau tali pihia kua nakai tutupu tumau, pihia foki he vahā Tohi Tapu. Ne tupetupe falu tagata talitonu he tuga kua nakai tali he Atua e tau liogi ha lautolu. Ne hūhū e Patuiki ko Tavita: “Iehova na e, to nimo fakaoti kia e koe au ato a fe?” (Salamo 13:1) Ka ko e mogo ne mailoga he tagata tua fakamooli ia kua lagaloga e lagomatai e Iehova a ia, ne mauokafua a Tavita ke he falanaki haana ke he Atua. He liogi ia foki, ne lafi e Tavita: “Ka ko au nai, to tua au ke he hāu a fakaalofa.” (Salamo 13:5) Tuga a Tavita, liga lata e tau tagata tapuaki he Atua he vahā nei ke fakamakamaka ke he liogi ato mailoga e lautolu e tali he Atua ke he tau ole ha lautolu.⁠​—​Roma 12:12.

Tali he Atua e tau manako mooli ha tautolu.

Ma e kakano mitaki, ko e tau matua fakaalofa kua nakai talia tumau e tau mena he tau tama ha lautolu ne ole ki ai he magaaho ka ole e lautolu. Pihia foki, liga nakai tali he Atua e tau ole ha tautolu he puhala kua manatu a tautolu ki ai po ke magaaho kua amanaki ai a tautolu. Ka e maeke ia tautolu ke mauokafua ko e Tufuga ha tautolu kua tuga e matua fakaalofa, to tali e tau manako mooli ha tautolu he magaaho tonu mo e puhala kua latatonu.​​—⁠Luka 11:11-13.

Liga tali he Atua he tau puhala nakai maaliali.

Ka e kua ka liogi a tautolu ke moua e fakatotoka mai he lekua hololoa? Lata kia a tautolu ke manatu ha kua nakai fai tali fakamana, kua nakai tuai tali e Iehova? Kia nakai pihia, kua mitaki ma tautolu ke manamanatu na liga kua fitā he lalago he Atua a tautolu ke he falu puhala maaliali. Ma e fakatai, liga lagomatai fakalahi he kapitiga loto fakaalofa a tautolu he magaaho kua latatonu. (Tau Fakatai 17:17) Liga ko Iehova kia ne kua omoomoi e kapitiga mitaki ia ke lagomatai a tautolu? Lafi ki ai, ko e tali he Atua ke he ole lagomatai kua liga moua mai he tau lau he Tohi Tapu. I loto kua liga moua e tautolu e lotomatala kua lata ke fahia ke he tuaga uka.​​—⁠2 Timoteo 3:16, 17.

He nakai utakehe e lekua fakatagata, ne tuku age he Atua ke he tau tagata haana e malolō kua lata ke fahia ki ai. (2 Korinito 4:7) Ma e fakatai, he magaaho ne ole a Iesu ke he haana Matua ke utakehe e matematekelea, he matakutaku neke fakakelea e higoa he Atua, ne fakafano atu e Iehova e agelu ke fakamalolō e Tama haana. (Luka 22:42, 43) Tatai foki, liga fakaaoga he Atua e kapitiga tata ke tala mai ki a tautolu e kupu fakamafana he magaaho kua latatonu ma tautolu. (Tau Fakatai 12:25) Ha kua nakai maaliali e tau tali pehēnei, liga lata ia tautolu ke mataala lahi ke he puhala kua tali he Atua e tau liogi ha tautolu.

Lata falu tali ke fakatali ke he magaaho he Atua.

Pehē e Tohi Tapu ko e Atua Malolō Ue Atu kua fiafia ki a lautolu kua fakatokolalo he “vaha ke lata ai.” (1 Peteru 5:6) Ti ka tuga kua fakatuai e tali ke he tau ole ne manako lahi a tautolu, nakai lata ia tautolu ke onoono ki ai kua nakai fiafia mai a Iehova. Ha kua mua ue atu e fioiaaga haana, nakai noa kua fehagai e Tufuga fakaalofa ha tautolu ke he tau ole ha tautolu he fakavē ke he tau mena ne iloa e ia kua mua e aoga ma tautolu.

Ke fakatai: Manamanatu la ke he tama taane tote haau ne ole ki a koe ke moua e pasikala. To talia noa ni kia e koe e ole haana? Ka logona hifo e koe kua nakaila lahi a ia ke heke e pasikala, to liga fifili a koe ke nakai fakatau he mogoia. Ka e to hoko e magaaho ti fakatau e koe ka iloa e koe kua latatonu ai ma haana. Pihia foki, liga to foaki he Atua e “tau mena kua manako ki ai [ha tautolu] a loto” he magaaho kua latatonu kaeke ke fakatumau a tautolu ke he liogi.​​—⁠Salamo 37:4.

Kua fakamalolō he Tohi Tapu e tau Kerisiano mooli ke fakatumau e mauokafua ke he uho he liogi. ‘Mukamuka e mena ia ke talahau ka e uka ke taute,’ he liga talahau he falu. Mooli, ka hane fakauka a tautolu ke he lekua hololoa po ke nakai fakafili tonu, to liga uka ma tautolu ke fakatali ke he tali he Atua. Kua mitaki ma tautolu ke manatu e fakaakoaga ha Iesu ke fakamakamaka ke he liogi.

Ne talahau e Iesu e fakataiaga ke he fifine takape nofogati ne fano tumau ke he fakafili mahani  hepehepe ke moua e fakafiliaga kua lata. (Luka 18:1-3) Pete kua nakai talia he fakafili he magaaho fakamua ke lagomatai a ia, ne pehē hifo ai e fakafili: “Ti fakafili ai e au hana tau mena, neke fakamamahi mai kia au he fa hau mau a ia.” (Luka 18:4, 5) He tau kupu he vagahau fakamua, ne fakateliga e fakafili ke he fifine takape ke ua “moto [a ia] i lalo he mata,” po ke fakatai, “fakakelea e higoa [haana].” * Ka maeke e fakafili mahani hepehepe ke lagomatai e fifine takape nofogati he tupetupe neke fakakelea e higoa haana, to mua atu e maeke he Atua fakaalofa ke foaki e fakafili tonu ki a lautolu “ne tauui . . . kia ia ke he aho mo e po”! Tuga ne talahau e Iesu, ko e Atua “to fakafili vave e ia e tau mena ha lautolu.”​​—⁠Luka 18:6-8.

Pete kua liga lolelole a tautolu he falu magaaho he ole ke he lagomatai, kua nakai lata ia tautolu ke fiu. He fakamakamaka ke he liogi, kua fakakite e tautolu e manako mooli ha tautolu ke kitia e lima he Atua he tau momoui ha tautolu. Fakaako foki a tautolu ke mailoga e tau tali he Atua ke he tau ole ha tautolu ti fakatata lahi atu mogoia a tautolu ki a ia. Ē, kua mauokafua a tautolu to tali e Iehova e tau liogi ha tautolu ne kua lagotatai ka fakatumau a tautolu ke ole mo e tua.​​—⁠Luka 11:9.