Kua lagā e hūhū ha kua mavehe e Iesu e moui he vahā anoiha he Parataiso ke he tagata kolokolovao ne fakatautau fakalataha mo ia. He New World Translation ne pehē a Iesu: “Kua moli lahi he tala atu e au ki a koe he aho nei, To fakalataha a koe mo au i Parataiso.” (Luka 23:43) Mailoga ne nakai talahau e Iesu e tokaaga he Parataiso ia. Kakano kia a Iesu mogoia to fakalataha e tagata matahavala mo ia he lagi?

Fakamua, kia manamanatu la tautolu po kua latatonu e tagata matahavala mo e moui he lagi. Ko e tau tagata ne ha ha i ai e tau amaamanakiaga he lagi ne papatiso ke he vai mo e agaaga tapu ti eke mo tau tutaki ha Iesu ne fifili he agaaga. (Ioane 3:3, 5) Taha poakiaga ko e fakatatau a lautolu ke he tau tuaga he mahani he Atua mo e fakakite e tau aga tuga e mahani hakohako, fakamooli, mo e fakaalofa hofihofi noa. (1 Korinito 6:9-11) Kua latatonu foki a lautolu ke fakatumau e mahani fakamooli ke he Atua mo e Keriso ato hoko e fakaotiaga he fekafekauaga ha lautolu he lalolagi. (Luka 22:28-30; 2 Timoteo 2:12) He latatonu ni mo e tau poakiaga ia ka fakakite e lautolu e lata ke liu tu mai mo e moua e fakaatāaga ma e matagahua mamafa ne tatali ki a lautolu he lagi, he fekafekau ko e tau ekepoa mo e tau patuiki mo Keriso ke he tau tagata he tau tau ne taha e afe.​​—Fakakiteaga 20:6.

Kehe ai, ko e tagata matahavala ne fakalataha mo Iesu ne moui ko e tagata kolokolovao ti mate ko e tagata kolokolovao. (Luka 23:32, 39-41) Mooli, ne fakakite e ia e aga fakalilifu he pehē a ia ki a Iesu: “Kia manatu mai a a koe kia au ka haele mai a koe ke he hau a kautu.” (Luka 23:42) Pete ia, ne nakai ko e tutaki papatiso ha Iesu a ia ne fifili he agaaga, po ke moua e fakamauaga he mahani hakohako mo e fakauka fakamooli. Liga tonu kia to mavehe e Iesu ki a ia e patuiki he lagi ke fakalataha mo e tau tutaki fakamooli haana ne mahani fakamooli tumau?​​—Roma 2:6, 7.

Ke fakatai: Kaeke ke ole e tagata ma e fakamagalo he kaihā e tupe haau, liga fifili a koe ke nakai fakahala. Ka e to falanaki nakai a koe ki a ia ke leveki e pisinisi haau po ke magafaoa haau? To toka ni e koe e tau matagahua ia ma lautolu ni ne falanaki lahi e koe. Pihia foki, ko lautolu kua age ki ai e amaamanakiaga he moui he lagi kua lata ke foaki e fakavēaga mauokafua to taofi mau a lautolu ke he tau tutūaga tututonu he Atua ka pule a lautolu ke he tau tagata. (Fakakiteaga 2:10) Ko e tagata matahavala ne fakakite e loto mooli he olelalo fakahiku haana, ne nakai foaki e fakavēaga pihia.

Ka e nakai kia tala age a Iesu ke he tagata matahavala to fakalataha a laua ke he lagi he aho ia ni? Nakai maeke e mena ia, ha kua nakai hake a Iesu ke he lagi he aho ia. Ka ko ia ne “nofo ai i lalo he kelekele”​​—he tukuaga​​—​ke he tolu e aho. (Mataio 12:40; Mareko 10:34) He mole foki e liu tu mai haana, ne nofo a ia ke he lalolagi ke 40 e aho ato hake ke he lagi. (Gahua 1:3, 9) Ti nakai maeke e tagata matahavala ke hake ke he lagi mo Iesu he aho ia.

Ko e heigoa mogoia e Parataiso ne fano ki ai e tagata matahavala? He mole e liu tu mai, to fakalataha a ia ke he Parataiso he lalolagi ka pule ai a Iesu. (Gahua 24:15; Fakakiteaga 21:3, 4) Ke iloa foki hagaao ke he Parataiso ia mo e tau poakiaga he Atua, tutala ke he taha he Tau Fakamoli a Iehova.