Putoia he fakaalofa e lauiaaga hofihofi ma e falu. Ko e tagata fakaalofa kua fakakite he tau kupu mo e tau gahua haana e puhala kua logona hifo e ia ki a lautolu kua ofania e ia, pete foki ka taute e ia e tau foakiaga fakatagata.

Ne fakakite e Mose e fakaalofa ke he Atua. He puhala fe? Manamanatu ke he tau kupu ne fakamau ia 1 Ioane 5:3: “Ko e fakaalofa ke he Atua hanai, kia omaoma a tautolu ke he tau poaki hana.” Ne moui a Mose ke he matapatu fakaakoaga ia. He tau mena oti ne ole e Atua ke taute e ia​​—mai he kotofaaga ne uka lahi mahaki he fehagai mo Farao fakatokoluga ke hoko ke he gahua ne tuga na mukamuka lahi he fakaolo e tokotoko ki luga he Tahi Kula​​—ne omaoma a Mose. He mukamuka e poakiaga ke taute po ke uka, ne muitua a Mose ki ai. “Ne eke pihia ni e ia.”​​—Esoto 40:16.

Ne fakakite e Mose e fakaalofa ke he tau matakainaga Isaraela haana. Mailoga e lautolu kua fakaaoga e Iehova a Mose ke takitaki haana tau tagata, ti o atu a lautolu ki a Mose mo e tau lekua kehekehe ha lautolu. Totou e tautolu: “Tutu mai e motu ki mua a Mose, kua kamata he mogoho pogipogi ti hoko ni ke he afiafi.” (Esoto 18:13-16) Manamanatu la ke he uka he fanogonogo a Mose ki ai​​—taha tulā ke he taha tulā​​—he tala age he tau Isaraela e tau tupetupe ha lautolu ki a ia! Ka e fiafia a Mose ke lagomatai e tau tagata ne ofania e ia.

Fakalataha mo e fanogonogo ki a lautolu, ne liogi foki a Mose ke lata mo e tau fakahele haana. Liogi foki a ia ma lautolu ne taute hehē ki a ia! Ma e fakatai, he gūgū e mahakitaga ha Mose ko Miriama hagaao ki a Mose, ne tā e Iehova a ia aki e lepela. He nakai fiafia a ia ha ko e fakahala ha Miriama, ne fakafeilo a ia he liogi ke lata mo ia: “Ko e Atua na e, kia fakamalolo e koe a ia.” (Numera 12:13) Ko e heigoa foki ka ko e fakaalofa ne fakatupu a Mose ke foaki e liogi pihia?

Maeke ia tautolu ke fifitaki a Mose he feaki e fakaalofa hokulo ma e Atua. Ko e fakaalofa ia kua omoomoi a tautolu ke omaoma ke he tau poakiaga haana “mo e tau loto.” (Roma 6:17) Ka omaoma a tautolu ki a Iehova mai he tau loto ha tautolu, to fakafiafia e tautolu e loto haana. (Tau Fakatai 27:11) Kua aoga ai foki a tautolu. Mole ia, ka fekafekau a tautolu ke he Atua mai he fakaalofa mooli, to nakai ni taute e tautolu e tau mena kua hako ka e to fiafia foki a tautolu he taute ai!​​—Salamo 100:2.

Ko e taha puhala foki ka fifitaki e tautolu a Mose ke feaki e fakaalofa foaki noa ma e falu. Ka o mai e tau kapitiga po ke tau tagata he magafaoa ki a tautolu mo e tau tupetupe ha lautolu, omoomoi he fakaalofa a tautolu ke (1) tuku age ki a lautolu ha tautolu a fanogonogo katoatoa mai he loto; (2) fai manamanatuaga ki a lautolu,po ke logona hifo e mena ne logona hifo e lautolu; mo e (3) tala age ki a lautolu kua manamanatu a tautolu ki a lautolu.

Tuga a Mose, maeke ia tautolu ke liogi ma e tau fakahele ha tautolu. Falu magaaho ne logona e tautolu e nakai maeke ha tautolu ke lagomatai ka talahau e lautolu e tau lekua ha lautolu ki a tautolu. Liga pehē a tautolu, “Fakamolemole ha kua maeke ni au ke liogi ma haau.” Ka e manatu: “Kua aoga lahi e liogi fakamakamaka he tagata tututonu.” (Iakopo 5:16) Ko e tau liogi ha tautolu kua maeke ia Iehova ke taute taha mena ma e tagata ne liga nakai mahani a Ia ke taute. Ti ko e mena ia, ko e heigoa e mena mitaki ke taute e tautolu ke lata mo e tau fakahele ha tautolu ka e liogi ma lautolu? a

Nakai kia talia e koe kua lahi e mena ne fakaako e tautolu mai ia Mose? Pete ni ko e tagata agaia, ne fakatoka e ia e fakafifitakiaga mua atu he tua, mahani fakatokolalo, mo e fakaalofa. Ko e muitua fakatata lahi a tautolu ke he fakafifitakiaga haana, kua lahi e aoga ka moua e tautolu mo e falu.​​—Roma 15:4.