Tuga ne fakakite he fakatino he faahi matau, tokologa e tagata ne manamanatu ko e Aho Fakafili to totou piliona e tagata ka tamai ki mua he nofoaiki he Atua ke fakafili ke he tau gahua fakamua ha lautolu​—ko e falu to moua e palepale he moui i luga he lagi, ko e falu ke fakakikiveka he afi. Ka e fakakite mai he Tohi Tapu ko e kakano he Aho Fakafili ke laveaki e tau tagata mai he nakai fakafili tonu. (Salamo 96:13) Ne kotofa he Atua a Iesu ke eke mo Fakafili ka liuaki mai e fakafili tonu ke he tau tagata.​—Totou Isaia 11:1-5; Gahua 17:31.

Magaaho ne totoko pauaki e tagata fakamua ko Atamu ke he Atua, ne tuku e ia e tau hologa oti haana ke agahala, matematekelea, mo e mate. (Roma 5:12) Ke fakahako e nakai fakafili tonu ia, to fakamomoui po ke liu fakatu mai e Iesu e tau tagata totou piliona ne mamate. Fakakite mai he tohi Fakakiteaga to hoko e mena nei he magahala he taha e afe tau ka pule a Keriso Iesu.​—Totou Fakakiteaga 20:4, 11, 12.

To fakafili a lautolu ka liliu tu mai, nakai ke he tau gahua ha lautolu ne taute ato mamate, ka e ke he tau mena ha lautolu kua taute he magaaho ka fakakite ai e tau mena i loto he “tau tohi” ne totoku he Fakakiteaga veveheaga 20. (Roma 6:7) Ko lautolu ia ka liliu momoui mo e moua e magaaho ke fakaako hagaao ke he Atua ko lautolu kua “tututonu katoa mo lautolu ne hepehepe,” he talahau he aposetolo ko Paulo.​—Totou Gahua 24:15.

Ko lautolu ne mamate ka e nakai iloa a Iehova ko e Atua mo e fekafekau ki a ia to moua e magaaho ke hiki mo e taute e tau gahua mitaki. Ka mitaki pihia a lautolu, ko e liu tu mai ha lautolu ko e “tutu mai ke he moui.” Ka ko e falu ka liu fakatu mai, to nakai manako ke fakaako ke he tau puhala ha Iehova. Ko e liu tu mai ha lautolu ko e “tutu mai ke he fakahala.”​—Totou Ioane 5:28, 29; Isaia 26:10; 65:20.

He matahiku he Aho Fakafili he taha e afe tau, to liuaki e Iehova e tau tagata omaoma ke he tuaga mitaki katoatoa fakamua. (1 Korinito 15:24-28) Ko e amaamanakiaga mitaki lahi a ia ma lautolu oti kua omaoma! He kamatamata fakahiku, to fakatoka mai he Atua a Satani ko e Tiapolo he pahua, ne līlī i ai ke he taha e afe tau. To lali a Satani ke liliu kehe e tau tagata mai ia Iehova, ka ko lautolu ka tiaki a Satani to moua e moui tukulagi ke he lalolagi.​—Totou Isaia 25:8; Fakakiteaga 20:7-9.

Kua fakaaoga foki he Tohi Tapu e tau kupu “aho ke fakafili” ke hagaao ke he mena tupu ka fakaotioti e fakatokaaga nei. Ko e aho ke fakafili nei to hoko fakalutukia mai tuga e Fakapuke he vahā ha Noa, ne mahaikava ai e atuhau katoa ne mahani kelea. Fiafia ai, ko e moumouaga hane hau he “tau tagata matahavala” to fakaatā e puhala ma e lalolagi foou he tau tagata ka “nofo ai e tututonu.”​—Totou 2 Peteru 3:6, 7, 13.