Hūhū he Tau Tagata Totou ha Tautolu . . .

Fai Kamataaga Nakai e Atua?

▪ Ne tali e Tohi Tapu kua nakai fai kamataaga e Atua. Na mai i tuai tigahau e Atua. Pete he uka ke maama kua tukulagi e Atua, nakai maeke ia tautolu ke fakaheu e talahauaga ia ha kua nakai maeke ia tautolu ke maama katoatoa ai.

Kua lata mooli kia ke amanaki to maama oti e tautolu e tau puhala he Atua? Ne talahau he aposetolo ko Paulo: “Oi, oi! ko e hokulo he tanakiaga he iloilo mo e fioiaaga he Atua! Kua nakai maeke ni ia taha ke kumi hana tau fakafiliaga; kua nakai maeke foki ke iloa hana tau haeleaga.” (Roma 11:33) Ti nakai maeke he tau manamanatuaga ha tautolu ke maama katoatoa e hokulo he iloilo mo e fioiaaga he Atua, tuga ne tama tote kua nakai maeke ke maama oti e tau puhala he matua. Ne fakakite he tau kupu omoomoi nei ha Paulo, pete kua hagaaki fakamua ke he kehe ue atu he iloilo mo e fakaalofa noa he Atua, kua ha ha ai e tau vala mo e tau puhala gahua ha Iehova ko e Atua ne uka lahi ma e manamanatuaga ha tautolu ke maama. Taha puhala, ko e manatu na nakai fai kamataaga e Atua. Pete ia, kua maeke ia tautolu ke falanaki katoatoa ke he tau mena ne fakaako he Tohi Tapu hagaao ke he Atua. Pehē a Iesu Keriso hagaao ke he tau kupu tohi: “Ko e hau a kupu ko e kupu moli haia.”—Ioane 17:17.

Ne pehē a Mose he liogi ki a Iehova: “Ko e Atua a koe mai i tuai tigahau, to hoko ke he tukulagi.” (Salamo 90:2) Fakamaama e Mose he kupu nei e moui he Atua ke tuga kua fakaloa ke he ua e faahi. Taha faahi ki mua. Ko Iehova ko “[I]a kua moui tukulagi tukumuitea.” (Fakakiteaga 4:10) Ti ko e moui he Atua kua fakaloa atu ke he vahā tukulagi anoiha. Ko e taha faahi ki tua. Ke he falu kupu, ko e Atua kua nakai tufuga po ke fai kamataaga. Ka ko e moui he Atua kua fakaloa atu ki tua i tuai tigahau.

Ko e tau manatu fakataitai noa kua uka ke he laulahi ia tautolu ke maama. Pete ia, kua fehagai a tautolu he falu magaaho mo e falu manatu paleko, tuga e tau numera i mua (positive) mo e i tua (negative). He totou e tau numera kua nakai fai fakaotiaga, maeke ke totou hake ki luga po ke hifo ki lalo. Nakai kia maeke ia tautolu ke fakaaoga e fakataiaga nei ke he tau tau he moui he Tufuga?

Ti ko e Atua ni kua latatonu ke moua e matahigoa kehe ue atu ko e “Patuiki tukulagi.” (1 Timoteo 1:17) Manamanatu la: Ko Iesu Keriso, ko e tau agelu afe mo afe he lagi, mo e tau tagata he lalolagi kua fai kamataaga oti ha kua tufuga ai. (Kolose 1:15, 16) Ka e nakai pihia e Atua. Ke talahau fakamakamaka na liga tufugatia e Atua, ka kamata e fakamaamaaga nakai aoga mo e fakateaga hagaao ki a ia ne tufugatia e Tufuga. Nakai, ko Iehova ni hokoia kua “mai i tuai tigahau, to hoko ke he tukulagi.” (Salamo 90:2) Ke he falu kupu, kua moui a Iehova tali mai he ‘vahā katoa tukulagi tukumuitea.’—Iuta 25.

Ka kia tokaloto ko e taofiaga ke he moui tukulagi tukumuitea he Atua ko e tala moolioli katoatoa. He onoono fakatata lahi ke he liogi ha Mose ne fakakite e tukulagi tukumuitea he Atua, kua fakamau mooli e maveheaga mafanatia he moui tukulagi ma tautolu. Kehe mai he moui mole vave ha tautolu mogonei, ne fakamaama ko e Atua kua eke “mo mena ke nonofo ai a [t]autolu ke he taha hau mo e taha hau.” Ha ko e Matua fakaalofa ko Iehova, kua mai i tuai tigahau, he mogonei, mo e to hoko ke he tukulagi ma e tau tagata haana. Kia mafanatia a koe he tau kupu mooli homo ue atu ia!—Salamo 90:1.