1, 2. Ko e ha ne talahau e Iesu e fakatai he tau taleni?

KUA talahau e Iesu e fakatai he tau taleni ke fakakite fakamaali ke he tau tutaki fakauku haana e matagahua ha lautolu. Ka ko e fakatai ia kua lauia e tau tutaki oti ha Iesu. Pete kua amaamanaki a tautolu ke momoui he lagi po ke lalolagi, kua lata ia tautolu ke maama e kakano he fakatai nei.

² Magaaho fe ne talahau e Iesu e fakatai? He magaaho ne foaki e ia e fakamailoga ke he tau tutaki haana ke fakakite kua eke a ia mo Patuiki mo e ko e kamataaga haia he vahā he fakaotiaga. (Mataio 24:3) Ti ko e fakatai he tau taleni ko e vala he fakamailoga ia ti kua fakamooli he vahā ha tautolu.

3. Ko e heigoa kua fakaako e tautolu mai he tau fakatai ia Mataio veveheaga 24 mo e 25?

³ He mogo ne talahau e Iesu e fakatai he tau taleni, ne talahau e ia tolu foki e fakatai ko e vala he fakamailoga he vahā he fakaotiaga. Ko e tau fakatai oti nei ne fakamaama e tau mahani pauaki kua lata ke moua he tau tutaki haana. Maeke ia tautolu ke totou e tau fakatai nei ia Mataio 24:45 ke he 25:46. Ko e fakatai fakamua ne hagaao  ke he fekafekau fakamoli, ko e matakau tote ha lautolu ne fakauku ne moua e matagahua ke fakaako e tau tagata ha Iehova. Kua lata a lautolu ke fakamoli mo e loto matala. * (Kikite matahui tala.) Ko e taha fakatai foki ne hagaao ke he tau tamafine tote ne tokohogofulu. I ai, ne hataki e Iesu a lautolu ne fakauku kua lata a lautolu ke mautauteute mo e mataala ha kua nakai iloa e lautolu e aho mo e magaaho ka hau a ia. * (Kikite matahui tala.) Matutaki atu, ne talahau e Iesu e fakatai he tau taleni ke fakaako a lautolu oti ne fakauku kua lata ia lautolu ke gahua malolō he taute e tau matagahua faka-Kerisiano ha lautolu. Ti, talahau e Iesu e fakatai he tau mamoe mo e tau koti, ne hagaaki ki a lautolu ne amaamanaki ke momoui he lalolagi. Ne fakamaama e ia kua lata a lautolu ke mahani fakamooli ti taute e tau mena oti ke lagomatai e tau matakainaga fakauku haana. * (Kikite matahui tala.) To fakamaama he vala tala nei e kakano ke he fakatai he tau taleni.

4, 5. Hagaao ki a hai e tagata he fakatai, ti ko e heigoa e taleni?

⁴ Totou Mataio 25:14-30. He fakatai he tau taleni, ne tutala a Iesu hagaao ke he tagata ne fano fenoga. He fakatai taha ia, ne tutala a Iesu hagaao ke he tagata ne fano fenoga ke eke mo patuiki. * (Kikite matahui tala.) (Luka 19:12) Loga e tau tau ne talahau he tau tohi ha tautolu ke he tau fakatai ua ia ne hagaao e tagata nei ki a Iesu ne hake ke he lagi he tau 33. Ka e nakai mafiti a Iesu ke eke mo Patuiki he magaaho ne hake a ia ke he lagi. Ne fakatali a ia ato hoko e 1914, he mogo ne tuku e tau fī haana ke eke “mo fakatuagave hana.”​—Heperu 10:12, 13.

⁵ Ne pehē a Iesu ko e valu la e taleni he tagata he fakatai. Ko e tupe lahi a ia. * (Kikite matahui tala.) To fano fenoga e tagata, ne age e ia e tupe nei ke he tau fekafekau haana. Tala age a ia ki a lautolu ke fakaaoga ai ke lahi foki e tupe ke moua mai ma haana. Ha kua uho lahi e tupe ke he tagata ia, fai mena ne uho lahi ki a Iesu. Ko e heigoa e mena ia? Ko e gahua ne taute e ia he nofo a ia he lalolagi.

6, 7. Ko e heigoa e tau taleni ne hagaao ki ai?

⁶ Ko e gahua fakamatala kua aoga lahi ki a Iesu. Ti ko e fua he fakamatala haana, tokologa ne eke mo tau tutaki haana. (Totou Luka 4:43.) Ka e iloa e ia kua lahi atu e gahua ke taute ti tokologa  atu foki e tagata ka talia e tala mitaki. Ati tala age a ia ke he tau tutaki haana: “Haga hake a ha mutolu a tau mata, mo e kitekite ke he fonua kua hina mai nai ke he heleheleaga saito.” (Ioane 4:35-38) Ko e tagata gahua fonua mitaki ne nakai tiaki e fonua ne kua latatonu ke helehele. Pihia tonu e aga ha Iesu. Ato liu hake a Iesu ke he lagi, ne poaki a ia ke he tau tutaki haana: ‘Kia o atu a a mutolu mo e taute tutaki.’ (Mataio 28:18-20) He puhala nei, ne age e Iesu e koloa uho ki a lautolu, ko e matagahua aoga ke fakamatala.​—2 Korinito 4:7.

⁷ Tuga e tagata ne age e tupe ke he tau fekafekau haana, ne age e Iesu e gahua taute tutaki ke he tau tutaki fakauku haana. (Mataio 25:14) Ti hagaao e tau taleni ke he matagahua ke fakamatala mo e taute tutaki.

8. Pete ne kehekehe e lahi he tupe ne moua he tau fekafekau takitaha, ko e heigoa ne amanaki e iki ki ai?

⁸ Ne pehē a Iesu ne age he iki lima e taleni ke he fekafekau fakamua, ua e taleni ke he fekafekau ke uaaki, mo e taha e taleni ke he fekafekau ke toluaki. (Mataio 25:15) Age he iki ke he tau fekafekau takitaha kehekehe e lahi he tupe, ka e amanaki a ia ki a lautolu oti ke taute e tau mena oti kua maeke ia lautolu ke lahi atu foki e tupe ka moua ma haana. He puhala taha, ne amanaki a Iesu ke he tau tutaki fakauku haana ke taute e tau  mena oti kua maeke ia lautolu he gahua fakamatala. (Mataio 22:37; Kolose 3:23) Ia Penetekoso he tau 33, ne kamata e tau tutaki ha Iesu ke taute tutaki he tau tagata he tau motu oti kana. Ti ka totou e tautolu e tohi ha Gahua he Tohi Tapu, kitia maaliali e tautolu e gahua malolō ne taute e lautolu. * (Kikite matahui tala.)​—Gahua 6:7; 12:24; 19:20.

9. (a) Ko e heigoa ne taute he tau fekafekau tokoua fakamooli aki e tupe, ti ko e heigoa ne fakaako e tautolu mai he mena ia? (e) Ko e heigoa kua lata ke taute e lautolu ne amaamanaki ke momoui he lalolagi?

⁹ Ko e tau fekafekau ua fakamua ne fakaaoga fakamitaki e tupe he iki ha laua, ne hagaao ke he tau matakainaga fakauku fakamooli he vahā he fakaotiaga. Mua atu tali mai he 1919, kua taute e lautolu e tau mena oti kana kua maeke he gahua fakamatala. He fakatai, igatia e fekafekau tokoua mo e moua kehekehe e lahi he tupe, ka e nakai kakano e mena ia kua kehekehe e tau matakau ua ha lautolu ne fakauku kua fakamooli. Gahua malolō lahi e tau fekafekau tokoua ti fakalahi ua e tupe. Ka ko lautolu ni kia ne fakauku kua lata ke gahua malolō he gahua fakamatala mo e fakaako atu? Nakai. Ko e fakatai ha Iesu he tau mamoe mo e tau koti ne fakaako a tautolu ko lautolu ne amaamanaki ke moui tukulagi he lalolagi kua lata ke lagomatai e tau matakainaga fakauku haana ke he gahua fakamatala ti mahani fakamooli ki a lautolu. Logona hifo e lautolu ko e lilifu ke lagomatai e tau matakainaga. Ē, ko e tau tagata ha Iehova kua “taha ai e fuifui mamoe,” ti gahua malolō oti a lautolu ke fakamatala mo e taute tutaki.​—Ioane 10:16.

10. Ko e heigoa taha vala he fakamailoga ne fakamooli kua nonofo a tautolu he vahā he fakaotiaga?

¹⁰ Kua amanaki a Iesu ke he tau tutaki  oti haana ke gahua malolō ke tokologa atu foki e tutaki ka moua. Ko e mena haia ne taute he tau tutaki haana he senetenari fakamua. Ke he vahā nei he fakaotiaga, ne fakamooli tuai e tau taleni he fakatai ha Iesu, kua taute kia he tau tutaki haana e gahua nei? Ē, nakaila pihia fakamua e tokologa lahi he tau tagata ne logona e tala mitaki ti eke mo tau tutaki! Ha ko e gahua malolō ne taute he tau tutaki oti ha Iesu, totou teau afe he tau tagata ne papatiso he tau tau takitaha. Ti fakalataha foki a lautolu ke he gahua fakamatala. Ko e tau gahua oti nei mo e tau fua mitaki ne fakakite fakamaali ko e vala aoga lahi e gahua fakamatala he fakamailoga ne foaki e Iesu hagaao ke he vahā he fakaotiaga. Kua fiafia mooli a Iesu ke he tau tagata gahua haana!

11. Iloa fēfē e tautolu to hau a Iesu he magaaho he matematekelea lahi?

¹¹ Pehē a Iesu: “Kua mole e tau po loga, ati hau ai e iki he tau fekafekau ia, ti fakafili e tau mena hana ne toka ia lautolu.” (Mataio 25:19) To taute he Iki ko Iesu e mena nei tata atu ke he matahiku he matematekelea lahi. Iloa fēfē e tautolu e mena ia? He perofetaaga haana ne moua ia Mataio veveheaga 24 mo e 25, ne talahau lagaloga e Iesu to hau a ia. Ma e fakatai, pehē a ia to “kitia ai e lautolu e Tama he tagata kua hau ke he tau aolagi.” Hagaao e mena nei ke he magaaho ka hoko e matematekelea lahi ka fakafili e Iesu e tau tagata. Ne hataki foki e ia e tau tutaki haana ne nonofo he vahā he fakaotiaga ke mataala. Pehē a ia: “Kua nakai iloa e mutolu po ke magaaho fe ke hau ai e Iki ha mutolu” mo e, “Ko e magaaho nakai manatu ai e mutolu, ke hau ai e Tama he Tagata.” (Mataio 24:30, 42, 44) Ti ko e fakatai he tau taleni, ne hagaao foki a Iesu ke he magaaho ne hau a ia ke fakafili e tau tagata mo e moumou e lalolagi a Satani. *​—Kikite matahui tala.

12, 13. (a) Ko e heigoa he iki ne talahau ke he tau fekafekau tokoua, ti ko e ha? (e) Magaaho fe ha lautolu ne fakauku ka moua e fakamau fakamailoga fakahiku? (Kikite foki e puha “ Fakafili ne kua Uho ki a Lautolu ka Mamate.”) (i) Ko e heigoa e palepale ka moua e lautolu ne lalago a lautolu ne fakauku?

¹² He liu mai e iki he fenoga haana, ne kitia e ia ko e fekafekau ne lima e taleni  ne fakalahi lima foki mo e ko e fekafekau ne ua e taleni ne fakalahiua foki. Tala age e iki ki a laua: “Kua mitaki ko e fekafekau mitaki na e, mo e fakamoli; kua fakamoli e koe ke he tau mena gahoa, to kotofa e au a koe ke pule ke he tau mena loga.” (Mataio 25:21, 23) Ko e heigoa he Iki ko Iesu ka taute he magaaho ka hau a ia he magaaho i mua?

¹³ Ato hoko e matematekelea lahi, to foaki he Atua e taliaaga fakahiku haana ki a lautolu ne fakauku kua gahua malolō ne haia agaia he lalolagi he magahala ia. Ko e fakamau fakamailoga fakahiku anei ha lautolu. (Fakakiteaga 7:1-3) Ato hoko mogoia a Amaketo, to palepale e Iesu a lautolu he tahake a lautolu ke he lagi. Ka e kua a lautolu ne amaamanaki ke momoui he lalolagi kua lalago a lautolu ne fakauku ke he gahua fakamatala? To fakafili a lautolu ke eke mo tau mamoe. Mo e to palepale a lautolu ke momoui he lalolagi i lalo he pule he Kautu he Atua.​—Mataio 25:34.

14, 15. Pehē kia a Iesu to tokologa ia lautolu ne fakauku ka kelea mo e teva? Fakamaama.

¹⁴ Kua totoku foki he fakatai e fekafekau ne taha ni e taleni. Nakai fakaaoga e ia ke moua foki taha tupe ma e iki haana po ke tuku i loto he pege ke moua e muka. Ka e tanu e ia e tupe. Pehē e iki kua kelea mo e teva e fekafekau. Ne uta e ia e taleni mai he fekafekau kelea ti age ke he fekafekau fakamua. Ti liti e ia e fekafekau kelea “ke he pouli,” ti tagi aue e fekafekau.​—Mataio 25:24-30; Luka 19:22, 23.

¹⁵ He magaaho ne pehē a Iesu ko e taha he tau fekafekau tokotolu ne kelea  mo e teva, nakai kakano a ia ko e taha mai he tolu a lautolu ne fakauku kua tuga e fekafekau ia. Iloa e tautolu e mena nei he fakatatai e fakatai nei mo e tau fakatai ua ne toe. He fakatai ke he fekafekau fakamoli mo e loto matala, ne talahau e Iesu e fekafekau kelea ne favale ke he tau fekafekau ne toe. Nakai kakano a Iesu to kelea foki a lautolu ne fakalataha ke he fekafekau fakamoli mo e loto matala. Ka kua hataki e ia a lautolu nei ne fakauku ke nakai lata a lautolu ke tuga e fekafekau kelea. Ti, he fakatai ke he tau tamafine tote ne tokohogofulu, ne totoku e Iesu e tau tamafine tote tokolima ne goagoa. Nakai pehē a ia to goagoa e hafa ia lautolu kua fakauku. Ka e hataki e Iesu a lautolu ke he mena ka tupu kaeke ke nakai mautauteute mo e mataala a lautolu. * (Kikite matahui tala.) Pihia foki, he fakatai he tau taleni, ne nakai pehē a Iesu to tokologa ia lautolu ne fakauku he magahala he tau aho fakamui ka kelea mo e teva. Nakai, ne hataki e ia a lautolu ne fakauku ke nakai tuga e fekafekau kelea ka e matutaki ke gahua malolō he gahua fakamatala.​—Mataio 25:16

16. (a) Ko e heigoa e tau fakaakoaga ne ua kua iloa e tautolu mai he fakatai ke he tau taleni? (e) Lagomatai fēfē he vala tala nei a tautolu ke maama e fakatai ke he tau taleni? (Kikite puha “ Maama Fēfē e Tautolu e Fakatai he Tau Taleni?”)

¹⁶ Ko e heigoa e tau fakaakoaga ne ua kua iloa e tautolu mai he fakatai ke he tau taleni? Fakamua, ne foaki e Iesu ke he tau tutaki fakauku haana e koloa uho, ko e matagahua aoga ke fakamatala mo e taute tutaki. Uaaki, amanaki a Iesu ki a tautolu oti ke gahua malolō ke he gahua fakamatala. Ka fakauka fakamooli a tautolu ke he gahua nei ti fakatumau ke omaoma mo e mahani fakamooli ki a Iesu, to mauokafua a tautolu to palepale e ia a tautolu.​—Mataio 25:21, 23, 34.