1, 2. (a) Ko e heigoa kua lagomatai a koe ke taute e fifiliaga haau ke fekafekau ke he Atua? (e) Ko e heigoa e tau hūhū hagaao ke he tufaaga ha tautolu mai ia Iehova ka tali he vala tala nei?

 TOKOLOGA e tagata ne taute e tau fifiliaga pulotu ke fekafekau a Iehova ko e Atua mo e muitua e fakafifitakiaga ha Iesu Keriso. (Mata. 16:24; 1 Pete. 2:21) Ko e tukuleleaga ha tautolu ke he Atua ko e fifiliaga uho lahi. Nakai taute e tautolu e fifiliaga nei he mole e fakaako ke he tau kupu mooli mukamuka he tau kupu tohi gahoa. Ka e, fakaako fakamitaki e tautolu e Tohi Tapu mo e fakamalolō e tua ha tautolu ke he tufaaga ne mavehe e Iehova. To foaki e ia e tufaaga nei ki a lautolu kua fakatumau ke fakaako hagaao ki a ia mo e hagaao ki a Iesu Keriso.​​—Ioane 17:3; Roma 12:2.

² Ka manako a tautolu ke fakatumau e fakafetuiaga mitaki ha tautolu mo Iehova, lata ia tautolu ke fakatumau ke taute e tau fifiliaga pulotu kua fakafiafia a ia. Ko e vala tala nei ne tali e tau hūhū aoga nei: Ko e heigoa e tufaaga ha tautolu? Lata ke aoga fēfē ai ki a tautolu? Maeke fēfē ia tautolu ke mailoga kua moua e tautolu e tufaaga ha tautolu? Ko e heigoa ka lagomatai a tautolu ke taute e tau fifiliaga pulotu?

3. (a) Ko e heigoa e tufaaga ka moua e lautolu ne fakauku? (e) Ko e heigoa e tufaaga ka moua he ‘tau mamoe kehe’?

³ Gahoa e Kerisiano kua amaamanaki ke moua e moui nakai mate ke he lagi kua eke mo tufaaga ha lautolu. To moua e lautolu e lilifu pauaki he pule mo Keriso ke he Kautu haana. (1 Pete. 1:3, 4) Ko lautolu ka moua e tufaaga ia ne kua “liu foki fanau.” (Ioane 3:1-3) Ka e kua e tau miliona he ‘tau mamoe kehe’ ha Iesu, ne gahua mo lautolu ne fakauku he fakamatala e tala mitaki he Kautu he Atua? (Ioane 10:16) To moua he tau mamoe kehe e mena ne nakai moua e Atamu mo Eva, ko e moui tukulagi he  parataiso he lalolagi ne nakai fai mamahi, mate, po ke maanu. (Fakakite. 21:1-4) Magaaho ne fakatautau a Iesu he akau, ne mavehe e ia ke he taha tagata to moua e ia e tufaaga nei. Pehē a Iesu: ‘Ko e moli, ke tala atu e au kia koe he aho nai, to fakalataha ai a koe mo au i Parataiso.’​​—Luka 23:43.

4. Ko e heigoa e tau monuina kua fitā he moua e tautolu?

⁴ Ka ko e tufaaga ha tautolu kua putoia foki e falu monuina kua moua e tautolu mogonei. Ha kua tua a tautolu ke he “lukutoto a Keriso Iesu,” logona hifo e tautolu e mafola mo e tata e fakafetuiaga mo e Atua. (Roma 3:23-25) Maama mitaki e tautolu e mena ne mavehe he Tohi Tapu ma e vahā anoiha. Ko e fakaalofa he tau matakainaga ha tautolu he lalolagi katoa kua fakakite ke he taha mo e taha kua fakafiafia lahi a tautolu. Ti ko e lilifu ke maeke a tautolu ke fakamatala hagaao ki a Iehova. Ha ha ia tautolu e tau kakano mitaki ke loto fakaaue ke he tufaaga ha tautolu!

5. Ko e heigoa ne lali a Satani ke taute ke he tau tagata he Atua? Ko e heigoa ka lagomatai a tautolu ke kalo kehe he tau matahele ha Satani?

⁵ Ke maeke ia tautolu ke nakai galo e tufaaga ha tautolu, kua lata ia tautolu ke mataala ke kalo kehe he tau matahele ha Satani. Lali tumau a Satani ke kamatamata e tau tagata he Atua ke taute e tau fifiliaga kelea ke galo ha lautolu a tufaaga. (Nume. 25:1-3, 9) Iloa e Satani to nakai leva ti moumou a ia, ti eketaha fakalahi a ia ke kamatamata a tautolu ke taute e mena hepe. (Totou Fakakiteaga 12:12, 17.) Ka manako a tautolu ke “totoko atu ke he tau lagatau he tiapolo,” kua lata ia tautolu ke loto fakaaue tumau ke he tufaaga ha tautolu. (Efeso 6:11) Maeke ia tautolu ke ako e tau fakaakoaga aoga mai he puhala ne onoono a Esau ko e tama uluaki ha Isaako ke he tufaaga haana.

6, 7. Ko hai a Esau? Ko e heigoa e tufaaga ne lata ia ia ke moua?

⁶ Kavi ke he 4,000 tau kua mole, ne fanau e Repeka e mahaga ko Esau mo Iakopo. Ko e mahaga nei ne kehekehe lahi a laua. “Ko Esau foki ko e tagata iloilo tutuli manu, ko e tagata he vao a ia,” ka ko Iakopo “ko e tagata tututonu a ia, kua nofo kaina a ia.” (Kene. 25:27) Ne fakahigoa a Iakopo ko e tagata tututonu ha kua mahani fakamooli ti nakai taute e ia e agahala.

⁷ He mogo ne 15 e tau tau ha Esau mo Iakopo, ne mate e tupuna ha laua ko Aperahamo. Ka e manatu e Iehova e maveheaga ne taute e ia mo Aperahamo. Fakahiku, ne fatiaki e Iehova ki a Isaako e mena ne mavehe e ia. Pehē e Atua to monuina e tau motu oti he lalolagi puhala he tega, po ke fanau ha Aperahamo. (Totou Kenese 26:3-5.) He puhala nei, ne fakakite he Atua ko e taha he tau fanau ha Aperahamo ka eke mo “tega,” (NW) mahani fakamooli he Kenese 3:15, ko e Mesia haia. Ha ko Esau e tama taane uluaki ha Isaako kua tonuhia a ia ke fai vala he maveheaga ne taute he Atua mo Aperahamo. Ti kua lata he Mesia ke eke mo taha mai he tau fanau ha Esau. Ko e tufaaga homo ue atu anei ma Esau. Ka e loto fakaaue nakai a ia ki ai?

8, 9. (a) Ko e heigoa e fifiliaga ne taute e Esau hagaao ke he tufaaga haana? (e) Fai tau he mole, ko e heigoa ne mailoga e Esau hagaao ke he fifiliaga haana? Tali atu fēfē a ia?

⁸ Taha aho ne liu mai a Esau he fonua, ti kitia e ia a Iakopo “ne tunu . . . e mena kai.” Ne ole a Esau ma e taha mena kai, he pehē: “Fakamolemole fakaave.” (NW) “Ati ta mai la e mena kula nā kou kai, ha kua nakai fahia au.” Pehē a Iakopo: “Fakafua mai ā hau a tufaaga uluaki kia au.” Ko e heigoa e fifiliaga ne taute e Esau? Ne pehē a ia ko e tufaaga uluaki ne nakai aoga ki a ia ti fifili e polu atasemo ke he tufaaga haana ko e uluaki! Ne manako a Iakopo ke mailoga e Esau kua fakafua mooli e ia e tufaaga uluaki, ti ole ki a ia ke taute e omonuo. Ne pehē a Iakopo: “Kia omonuo mai a koe kia au ke he aho nai.” He nakai manamanatu ki ai, ne fakafua e Esau e tufaaga uluaki haana. Mole ia, “ti ta atu ai e Iakopo e areto mo e atasemo tunu kia Esau; ti kai ai e ia mo e inu, ti matike ai a ia mo e fano.” Ne  fakakite e Esau e manatu kua fakateaga mo e nakai aoga e tufaaga uluaki haana.​​—Kene. 25:29-34.

⁹ Fai tau he mole, ne manatu a Isaako to nakai leva ti mate a ia, ne eketaha a Repeka ke moua e Iakopo e tufaaga uluaki ne fakafua e Esau ki a ia. He mailoga e Esau kua taute e ia e fifiliaga goagoa he fakafua e tufaaga uluaki haana, ne olelalo a ia ki a Isaako: “Haku matua na e, kia fakamonuina foki e koe au, ko au nai ni. . . . Nakai kia toe ha monuina ia koe māku?” He tala age a Isaako ki a Esau to nakai hiki e ia e monuina ne fitā he age e ia ki a Iakopo, ne tagi lahi mahaki a Esau.​​—Kene. 27:30-38.

10. Ko e heigoa e manatu ha Iehova ki a Esau mo Iakopo, ti ko e ha?

¹⁰ Ko e heigoa ka fakaako e tautolu hagaao ke he aga ha Esau mai he tala nei? Ne fakakite e ia kua mua e aoga he tau manako fakatino haana ke he moua e tau monuina ne mavehe e Iehova ko e vala he tufaaga haana. Ne nakai loto fakaaue a Esau ke he tufaaga uluaki haana ti nakai fakaalofa mooli ke he Atua. Ti nakai manamanatu a Esau ke he puhala ka lauia e tau hologa haana ha ko e fifiliaga haana. Ka e kehe a Iakopo. Ne loto fakaaue a ia ke he tufaaga haana mo e taute e tau fifiliaga mitaki ke puipui ai. Ma e fakatai, pete he nakai mukamuka ma Iakopo, ne makai a ia ke muitua e fakatonuaga he tau matua haana ne foaki ke fifili e hoana. (Kene. 27:46–28:3) Ne fakamonuina e Iehova e omaoma haana he eke e Mesia mo taha he tau hologa ha Iakopo. Ko e heigoa e manatu he Atua ki a Esau mo Iakopo? Pehē a Iehova: “Fakaalofa au kia Iakopo, Ka e vihiatia e au a Esau.”​​—Mala. 1:2, 3.

11. (a) Maeke fēfē a tautolu ko e tau Kerisiano ke aoga mai he tala ki a Esau? (e) He fakamaama e ia e mena ne taute e Esau, ko e ha ne tutala foki a Paulo ke he mahani feuaki?

¹¹ Maeke ia tautolu ke aoga mai he tala ki a Esau. Hataki he aposetolo ko Paulo e tau Kerisiano ke fakaeneene “neke ha i ai ha tagata feuaki, po ke taha kua fakateaga ke he tau mena tapu, tuga na Esau, ko ia ne āge e tufaaga uluaki hana ke fakafua aki e taha mena kai.” (Hepe. 12:16) Lata ia tautolu ke fakaako mai he hatakiaga ia. Lata ia tautolu ke loto fakaaue tumau ke he tau mena tapu ke maeke a tautolu ke totoko e kamatamata mo e puipui e tufaaga ha tautolu. He fakamaama e ia e mena ne taute e Esau, ko e ha ne tutala foki a Paulo ke he mahani feuaki? Ha ko e mena ka mahani a tautolu tuga a Esau ti fakaatā e tau manako he tino ke pule ki a tautolu, to mukamuka ki a tautolu ke taute e agahala tuga e feuaki, ti ko e fua to galo e tautolu e tufaaga ha tautolu.

12. (a) Lali fēfē a Satani ke kamatamata a tautolu takitokotaha? (e) Ko e heigoa e tau fakafifitakiaga he Tohi Tapu ke lagomatai a tautolu ka kamatamata a tautolu ke taute e hehē?

¹² Ko e tau fekafekau ha Iehova, kua taute  e tautolu e tau mena oti ke kalo mai he tau tuaga ka kamatamata a tautolu ke taute e mahani kelea. Ti ka fai tagata ka kamatamata a tautolu, liogi a tautolu ki a Iehova ko e Atua ke lagomatai a tautolu ke totoko e kamatamata. (Mata. 6:13) Eketaha a tautolu ke fakatumau e mahani fakamooli ha tautolu he lalolagi kelea nei, ka e lali tumau a Satani ke fakalolelole e fakafetuiaga ha tautolu mo Iehova. (Efeso 6:12) Ko Satani e atua he fakatokaaga kelea nei ti iloa e ia e puhala ke fakaaoga e tau kamatamata ke taute e tau tagata ke mahala ke he tau manako kelea ha lautolu. (1 Kori. 10:8, 13) Lali a ia ke taute e mena nei ki a tautolu takitokotaha. Ka e kua kaeke ko koe he tuaga kua kamatamata ke fakamakona e tau manako haau ke he puhala hepe? Ko e heigoa e fifiliaga ka taute e koe? To tuga nakai a Esau a koe, ne mafiti ke mahala ke he kamatamata? Po ke to totoko nakai e koe e kamatamata mo e hola kehe mai i ai, tuga ne taute he tama ha Iakopo ko Iosefa he mogo ne kamatamata ai he hoana ha Potifara?​​—Totou  Kenese 39:10-12.

13. (a) He vahā nei, kua fēfē e mahani he tokologa ke tuga a Iosefa, ka e fēfē e mahani he falu ke tuga a Esau? (e) Ko e heigoa kua lata ia tautolu ke taute ke nakai tuga a Esau a tautolu?

¹³ Tokologa e matakainaga ha tautolu ne fehagai mo e tau kamatamata ti lata ke fifili ke tuga a Esau po ko Iosefa. Tokologa ne fakailoilo ti fakafiafia e loto ha Iehova. (Fakatai 27:11) Ka e fifili e falu ke tuga a Esau ti kaumahala ke puipui e tufaaga ha lautolu. Tokologa ia lautolu ne kua fakatonu po ke tuku ki tua he tau tau takitaha kua akonaki ha kua taute e lautolu e mahani feuaki. Kua aoga lahi ke mautauteute e tautolu e tau loto ha tautolu mogonei ke maeke ke malolō lahi ke totoko ha kamatamata anoiha! (Sala. 78:8) To fakatutala a tautolu ke he ua e mena ka taute e tautolu ke mautauteute ai ke totoko e kamatamata mo e ke taute e tau fifiliaga pulotu he mogo fakamui.

14. Ko e heigoa e tau hūhū ka lagomatai a tautolu ke fakavihia e mena kelea mo e fiafia ke he mena mitaki?

¹⁴ Ko e lakaaga fakamua ke manamanatu ke he tau fua kelea he agahala. Ko e lahi e fakaalofa ha tautolu ki a Iehova, ko e lahi he loto fakaaue ha tautolu ke he tufaaga ha tautolu. Ka fakaalofa a tautolu ke he taha tagata, kua nakai manako a tautolu ke fakamamahi e tagata ia. Ka e fakamakamaka a tautolu ke taute e tau mena oti ke fakafiafia a ia. Ti kua lata ia tautolu ke fai magaaho ke manamanatu ke he tau fua kelea he agahala, ko e puhala ka fakamamahi e tautolu a tautolu mo e falu ka mahala a tautolu ke he kamatamata. Lata ia tautolu ke hūhū hifo: ‘To maeke fēfē e mahani lotokai haaku ke lauia e fakafetuiaga haaku mo Iehova? To lauia fēfē e magafaoa haaku he agahala? To lauia fēfē e tau matakainaga haaku he fakapotopotoaga? To fakaita kia he mahani haaku e falu?’ (Filipi 1:10) Maeke ia tautolu ke hūhū hifo foki: ‘Kua aoga kia e tau magaaho gahoa he fakafiafiaaga feuaki ke he palepale ka totogi e au he mogo fakamui? Manako mooli kia a au ke tuga a Esau, ne tagi lahi mahaki he mailoga e ia e tau fua he agahala haana?’ (Hepe. 12:17) Ka manamanatu fakamitaki a tautolu ke he tau hūhū nei, to fakavihia e tautolu e mena kelea mo e fiafia ke he mena mitaki. (Roma 12:9) Ka fakaalofa mooli a tautolu ki a Iehova, to eketaha a tautolu ke puipui e tufaaga ha tautolu.​​—Sala. 73:28.

15. Ko e heigoa ka lagomatai a tautolu ke mautali ke kalo mai he ha kamatamata mo e puipui ha tautolu a fakafetuiaga mo e Atua?

¹⁵ Ko e lakaaga ke uaaki ke mautauteute a tautolu ke kalo kehe he kamatamata. Kua foaki mai e Iehova ki a tautolu e tau puhala loga ke mautauteute a tautolu ke totoko e kamatamata mai he lalolagi mo e puipui e fakafetuiaga ha tautolu mo ia. Ma e fakatai, ne fakakite e ia ki a tautolu e puhala ke aoga mai he fakaako Tohi Tapu, tau feleveiaaga, gahua he fonua, mo e liogi. (1 Kori. 15:58) He tau  magaaho takitaha kua tala age e tautolu ki a Iehova e tau logonaaga mooli ha tautolu he liogi mo e tau magaaho takitaha kua eketaha a tautolu ke he gahua he fonua, kua mautauteute a tautolu ke kalo mai he kamatamata. (Totou 1 Timoteo 6:12, 19.) Ka manako a tautolu ke kautū, kua lata ia tautolu ke fakatumau ke eketaha ke taute e tau mena nei. (Kala. 6:7) Fakatutala e mena nei he Tau Fakatai veveheaga ua.

16, 17. Ko e heigoa ka lagomatai a tautolu ke taute e tau fifiliaga pulotu?

¹⁶ Kua fakamalolō he Tau Fakatai veveheaga 2 a tautolu ke eketaha ke moua e pulotu mo e manamanatuaga lotomatala. Ko e tau mahani nei kua foaki e Iehova ki a tautolu ka lagomatai a tautolu ke fifili e tau mena hako mo e hepe ti to lagomatai a tautolu ke tautaofi e tau manako ha tautolu ka e nakai fakamakona ai ke he puhala hepe. Ka e maeke ia tautolu ke taute e mena nei kaeke ke makai a tautolu ke lali. Fakamaama he Tohi Tapu: “Haku tama na e, kaeke ke talia e koe haku a tau kupu, mo e toka ai e koe ke he loto hāu haku a tau poaki, Kua fakateliga hāu a tau teliga ke he iloilo, kua haga atu ai hāu a loto ke he manamanatu; kaeke kua ui atu a koe ke he loto matala, mo e fakaleo lahi atu ke he loto manamanatu; kaeke ke kumi e koe a ia, tuga he kumi ario; kaeke ke kumi fakamakutu ki ai, tuga he kumi e koloa galo; ti iloa ai e koe e matakutaku kia Iehova, mo e moua ai e koe e iloilo ke he Atua. Ha ko Iehova kua foaki mai e iloilo; mai he fofoga hana e iloilo mo e loto manamanatu.”​​—Fakatai 2:1-6.

¹⁷ Ka taute e tautolu e mena ne fakamaama he tau kupu ia, to maeke a tautolu ke taute e tau fifiliaga pulotu. Maeke ia tautolu ke totoko e kamatamata kaeke ke fakaatā e tautolu e tau talahauaga ha Iehova ke hiki e tau loto ha tautolu, kaeke ke matutaki a tautolu ke liogi ma e takitakiaga he Atua, ti kaeke ke fakatumau a tautolu ke kumi e iloilo he Atua ke tuga kua kumi a tautolu he mena galo.

18. Ko e heigoa haau ka fakatumau ke taute, ti ko e ha?

¹⁸ Foaki e Iehova e iloilo, maamaaga, lotomatala, mo e pulotu ki a lautolu kua lali ke kumi ai. Ko e lahi e kumi ha tautolu ki ai mo e fakaaoga ai, to mitaki lahi foki e fakafetuiaga ha tautolu mo Iehova ko e Atua. Ti ko e fakafetuiaga tata ha tautolu mo ia to puipui a tautolu ka fehagai a tautolu mo e kamatamata. Ka fakatata tumau a tautolu ki a Iehova mo e matakutaku ki a ia, to eketaha a tautolu ke kalo mai he agahala. (Sala. 25:14; Iako. 4:8) Ko e tuaga kapitiga ha tautolu mo Iehova mo e pulotu ne foaki e ia ki a tautolu to lagomatai a tautolu ke taute e tau fifiliaga pulotu ne taute a ia ke fiafia mo e puipui e tufaaga ha tautolu.