HE FANAU laia e tama taane haaku ko Gary he 1958, ne mailoga e au kua fai lekua. Ka e hogofulu la e mahina ato iloa he tau ekekafo e tuaga he gagao haana ti lima e tau ato fakamooli he tau pulotu i London e gagao ia. Ko e momoko ha ia haaku he magaaho ne fanau e tama fifine haaku ko Louise, hiva e tau he mole e fanau ha Gary, ne kitia kua pihia foki a ia ka e mua atu e kelea ke he ha Gary.

“Moua tokoua e fanau haau he gagao LMBB syndrome, a to nofo na koe mo e gagao ia,” he tala mai fakaeneene he tau ekekafo ki a au. He magahala ia, tote lahi e mena kua iloa ke he gagao nakai fa mahani nei ne lauia e tau tegatega he tino. Ko e tau mena ne fa mailoga ai ko e fakahegihegi ti fano fakahaga ti pouli e tau mata, gako, fai matalima po ke matahui lafi ki luga, fakatuai e tupu he tino, ai fakatau gahua e tino mo e manamanatuaga, tau gagao suka, gugu, mo e nakai gahuahua mitaki e tau fuaifi. Ti kua uka lahi ke leveki e tau tama haaku. He kumikumiaga ne nakaila leva ia, kua fuafua ai ko e 1 mai he 125,000 e tagata i Peritania ne moua he gagao nei, ka kua tokologa atu foki ne nakai kelea lahi.

Nakai leva e fai taane au ti tutala au mo e taha he Tau Fakamoli a Iehova, ne mailoga agataha e au e kupu mooli. Ka e nakai fiafia e taane haaku. Ha ko e gahua tupe haana ati hikihiki tumau e nonofoaga ha mautolu, ti nakai maeke ia au ke fakalataha ke he fakapotopotoaga. Pete ia, ne matutaki au ke totou e Tohi Tapu mo e liogi ki a Iehova. Ko e mafanatia ha ia ke totou “to eke a Iehova mo kolo tokoluga ma lautolu ne malipilipi, ko e kolo tokoluga ke he tau vaha matematekelea” mo e ko e ‘mena nakai tiaki e Iehova a lautolu kua kumi kia ia’!​​—Sala. 9:9, 10.

Ko Gary ne fakakaupā ni e maama he tau mata haana, mogo ne ono e tau haana, ne fakafano atu a ia ke nofo he aoga pauaki he kaukau tahi he faahi toga ha Igilani. Ne hea mai tumau a ia he telefoni ki a au ka fai mena ne tupetupe ki ai, ti maeke au ke lagomatai a ia ke maama e tau matapatu fakaakoaga he Tohi Tapu. Fai tau he mole e fanau a Louise, ne moua au he gagao multiple sclerosis mo e fibromyalgia. Ne liu mai a Gary ki kaina he aoga fakaako he mogo ne 16 e tau. Ka kua kelea fakahaga ni e tau mata haana, ti hoko ke he 1975 kua pouli haana tau mata. He 1977 ne toka he taane haaku a mautolu.

Nakai leva e liu mai a Gary, ne putoia a mautolu ke he tau matagahua he fakapotopotoaga fiafia, ti papatiso au he 1974. Ne loto fakaaue lahi au he mogo ne lagomatai he taha motua a Gary ke fehagai mo e tau hikihikiaga he tino haana he magahala he tau tau fuata mui haana. Ne lagomatai he falu Fakamoli au mo e tau gahua kaina, ti fakahiku ne kotofa he tau faahi leveki lagomatai he matakavi e tokolima ia lautolu ke eke mo tau leveki pauaki ma mautolu he kaina. Ko e monuina mooli anei!

Ne matutaki a Gary ke holo ki mua he kupu mooli ti papatiso he 1982. Ne manako lahi a ia ke paionia fakakū. Ti fifili au ke fakatauō mo ia he gahua paionia ti fai tau ne matutaki au ke taute pihia. Ne fiafia lahi e tama taane haaku, ti fai magaaho he mole ne hūhū e leveki takaiaga ki a ia, “He ha he holo atu ke paionia tumau, ma Gary?” Koenaia he fakamafanaaga ne lata ia Gary ke moua, hoko ke he 1990 ne eke a ia mo paionia tumau.

 Ne lagaua e iihi a Gary ke taute e hui pula, taute fakamua he 1999 mo e ke lagauaaki he 2008, ka e mua atu e hagahaga kelea he tau gagao ha Louise. Ne fanau mai a ia mo e mata pouli, ti ko e magaaho ne kitia e au e taha matahui lafi ki luga he taha he tau hui haana, ne iloa e au kua moua foki a ia he gagao LMBB syndrome. Ne kitia ke he tau kumikumiaga ki a ia kua lekua foki e tau faahi kehekehe i loto he tino haana. He tau tau kua mole, ne lalahi e tau iihi haana mo e lafi ki ai lagalima e iihi he tau fuaifi. Ne moua a ia he suka tuga a Gary.

Ha kua mataala ke he tau hagahagakelea ka tupu mai he mogo ka iihi ai, ne tutala tuai a Louise ke he tau tagata iihi, tau tagata fakamohe, mo e matakau gahua ke fakamaama e tau fifiliaga haana ke lata mo e tau puhala fakaekekafo ne nakai fakaaoga e toto. Ko e fua, ne fiafia a ia ke he fakafetuiaga mitaki haana mo lautolu oti ne leveki fakamitaki a ia ke he tau matematekelea haana.

Ko e kaina ha mautolu, ko e lotouho he tau matagahua ke tapuaki ki a Iehova. Ato hoko mai e tau matini hila foou, ne loga e tulā haaku ne totou ki a Gary mo Louise. Ko e mogonei kua moua e tau CD, tau DVD, mo e tau tapakiaga he www.isa4310.com, kua maeke ia mautolu oti ke muitua ke he setulu fakaako Tohi Tapu he tau faahi tapu takitaha he tau mogo kehekehe, ti maeke ia mautolu ke fai tali he tau feleveiaaga Kerisiano.

Ko e tau tali ha Gary ne fa ako manatu he falu mogo, ti ka fai lauga a ia he Aoga Fekafekau Fakateokarasi, ne maeke a ia ke lauga ke he tau kupu ni haana. Ne kotofa a ia mo fekafekau lagomatai he 1995 ti lavelave tumau he Fale he Kautu, he fakafeleveia e tau matakainaga he fakapotopotoaga mo e lagomatai ke he lakau fakatagitagi.

Ko e tau matakainaga Fakamoli ne fakatauō mo Gary he gahua he fonua, ne fa omoi e lautolu e nofoa fakataveli ne fakaaoga e ia ha ko e gugu haana. Taha e Fakamoli ne lagomatai a ia ke taute e fakaako Tohi Tapu mo e tagata ne fiafia. Maeke foki a Gary ke fakamafana e Kerisiano ne kua 25 e tau he lolelole fakaagaaga. Ko laua na mogonei kua fakalataha ai ke he tau feleveiaaga Kerisiano.

He hiva e tau ha Louise, ne fakaako he tupuna fifine haana a ia ke tia e tau koloa mafana, ti fakaako e au mo e taha he tau tagata leveki a ia ke tia e tau koloa kalaie. Ha kua fiafia a ia ke tia he fakaaoga e nila, ne tia e ia e tau kafu mafana lanu kehekehe ma e tau fanau mukemuke ti pihia foki mo lautolu ne momotua i loto he fakapotopotoaga. Ne taute foki e ia e tau laupepa fakafeleveia he pilipili aki e tau fakatino ikiiki. Ko lautolu ne moua e tau laupepa nei ne tokiofa ai e lautolu. He tau tau fuata mui ha Louise, ne fakaako a ia ke lomitohi. Mogonei, he lagomatai he komopiuta pauaki ne maeke ke tutala, kua feleveia tumau a ia mo e tau kapitiga ke he meli hila. Ne papatiso a Louise he 17 e tau he moui. He tau magahala he matagahua fakamatala pauaki, ne fiafia a maua ke paionia fakakū tokoua. Tuga a Gary, ne ako manatu e Louise e tau kupu tohi ke fakakite e tua ke he tau maveheaga he Atua ke he lalolagi ka “fakaala ai e tau mata he tau tagata mata pouli” mo e “to nakai pehe mai foki taha kua nofo ai, Kua gagao au.”​​—Isaia 33:24; 35:5.

Ko e loto fakaaue ha ia ha mautolu ma e tau kupu mooli uho i loto he Kupu omoomoi ha Iehova! Kua pukeina e tau loto ha mautolu he fakaaue ke he lalagoaga fakaalofa he fakapotopotoaga ha mautolu, ane mai nakai fai lagomatai pihia ko e laulahi he tau gahua ha mautolu to nakai maeke ke taute. Ti mua atu ha kua lagomatai e Iehova, kua fai kakano mooli e tau momoui ha mautolu.