FAI tau kua mole ki tua, ko Rúbia (1), ko e matakainaga kua 30 e tau he moui he mogonei ne fina atu ke ahiahi ki a Sandra (2), ko e paionia ne gahua he fakapotopotoaga tote he faahi toga i Parasili. He ahiahi atu, ne fai mena ne tupu ti aamotia lahi a Rúbia mo e hiki ai e puhala moui haana. Ko e heigoa e mena ia? O mai la a tautolu ke kumikumi e tali mai ia Rúbia.

“Ne uta e Sandra au ke ahiahi e fifine kua fakaako Tohi Tapu mo ia. He fakaako ai, ne talahau noa ni e fifine: ‘Sandra, tokotolu e tama fifine he gahuaaga haaku kua manako ke fakaako e Tohi Tapu, ka e tala age au ki a lautolu ke fakatali to hoko e magaaho ha lautolu. Iloa e au kua fitā e puke e setulu haau he tau katoa nei.’ Ne ofo lahi au. Ko e tau tagata kua manako ke iloa a Iehova ne kua lata ke fakamau hifo e tau higoa ke  fakatali! He fakapotopotoaga haaku i kaina, ne uka lahi au ke moua taha e fakaako. He magaaho tonu ia ni, he kaina he tagata fakaako Tohi Tapu, ne logona hifo e au e manako lahi mahaki ke lagomatai e tau tagata he maaga tote haana. Nakai leva ne toka e au e taone lahi ne nofo ai au ti hiki atu ke he taone ne paionia ai a Sandra.”

Ko e heigoa e mena ne tupu ki a Rúbia? Ne talahau e ia: “He ua e mahina he hiki atu ki ai, ne taute e au 15 e fakaako Tohi Tapu mo e​—tiaki la—​ne nakai leva, tuga a Sandra, kua fai fakamauaga foki au he tau tagata kua fakatali!”

Ko Diego (3), ko e matakainaga taane he tau atu tau 20, ne ahiahi atu ke he ua e paionia hane gahua i Prudentópolis, ko e taone tote he faahi toga i Parasili. Ne lauia lahi a ia he ahiahi atu ia; ti omoomoi a ia ke liu manamanatu hifo ke he fekafekauaga haana. Ne fakamaama e ia: “Ne tote e gahua haaku he fakapotopotoaga he gahoa ni e tulā he tau mahina takitaha ke he fekafekauaga. Ka ko e magaaho ne ahiahi atu au ke he tau paionia ia mo e fanogonogo ke he tau mena tutupu ne talahau e laua, ne mafiti au ke fakatatai e aga fiafia ha laua mo e aga fakateaga haaku ke he fekafekauaga. He kitia e au e fiafia mo e olioli ha laua, ne manako au ke he moui haaku ke fai kakano lahi pihia tuga ha laua.” He mole e ahiahi ia, ne kamata a Diego ke paionia.

Tuga a Diego, ko e fuata Fakamoli nakai a koe kua taute e gahua fakamatala mo e fina atu ke he tau feleveiaaga Kerisiano ka e he magaaho taha kua logona hifo kua fano fakahaga e fekafekauaga haau ke tuga e matagahua fa mahani, kua nakai alaala? Ka pihia, maeke nakai a koe ke taute e tau hikiaga he moui haau ke fakaatā a koe ke moua e olioli he fekafekau he matakavi kua manako lahi ke he tau tagata fakailoa he Kautu? Mailoga ai, ko e manatu ke toka e puhala moui tokotoko mitaki kua liga uka lahi ki a koe. Ka kua tokologa e tau fuata ne kua fifili ke taute pihia. Ne loto malolō a lautolu ke hikihiki e tau foliaga fakatagata ha lautolu mo e tau manako ke maeke ke fekafekau fakalahi ki a Iehova. Ma e taha fakafifitakiaga foki, onoono la ki a Bruno.

Fai tau kua mole ki tua, ko Bruno (4), kua 28 e tau he moui mogonei, ne fakaako he aoga tā leo kofe talahaua,  mo e ko e foliaga haana ke eke mo takitaki he matakau tā leo kofe. Ne holo mitaki e tau fakaakoaga haana ti lagaloga e uiina a ia ke takitaki e matakau tā leo kofe symphony. Hane amanaki a ia ke he feua mitaki lahi. “Pete ia,” ne ui a Bruno, “kua logona hifo e au kua fai mena agaia kua galo he moui haaku. Kua fakatapu e au e moui haaku ki a Iehova, ka e iloa e au kua nakaila foaki katoatoa ia au ki a ia, ti fakatupetupe he mena ia au. Ne tala age e au ki a Iehova he liogi hagaao ke he tau logonaaga haaku, ti tutala foki au ke he tau matakainaga taane ne kua fai iloaaga lahi i loto he fakapotopotoaga. He manamanatu fakahokulo ki ai, ne fifili au ke tuku fakamua e fekafekauaga haaku ke he tā leo kofe haaku, toka e aoga tā leo kofe, mo e taute e gahua fekafekau he matakavi ne manako lahi ke he tau tagata fakamatala he Kautu.” Gahuahua fēfē e fifiliaga haana?

Ne hiki atu a Bruno ke he taone ko Guapiara (puke tagata liga ko e 7,000), kavi ke he 260 e kilomita mai he taone ko São Paulo. Ko e hikiaga lahi a ia. He talahau e ia: “Ne hiki atu au ke he fale ne tote mo e nakai fai filisa, televisoni, po ke matutakiaga Initanete. Ka e ha ha he fale e falu mena foki ne nakaila moua e au tali ma​i—ko e katene lakau kai mo e ulu akau kai!” He fekafekau he fakapotopotoaga tote i ai, he lagataha he faahi tapu ne fafao e Bruno he kato haana e tau mena kai, vai, mo e tau tohi ti fina atu he pasikala afi haana ke fakamatala ke he tau maaga tua. Tokologa e tagata he matakavi ia ne nakaila logona ia e tala mitaki. “Ne taute e au kavi ke he 18 e fakaako Tohi Tapu,” he talahau e ia. “He kitia e tau tagata fakaako nei ne taute e tau hikiaga ke he tau momoui ha lautolu ne fakafiafia lahi mahaki ki a au!” Lafi e ia: “He magaaho ia, ne mailoga e au kua moua tuai e au e mena ne galo he moui haaku—ko e logonaaga fiafia lahi mahaki ne moua mai he tuku fakamua e tau mena he Kautu. Liga nakai moua e au e mena nei kaeke kua tutuli ni au he tau foliaga ke muhukoloa.” Ti leveki fakatupe fēfē e Bruno a ia i Guapiara? Mo e mamali ai ne pehē a ia: “He fakaako e falu ke tā kitara.” Ko e takitaki tā leo kofe agaia ni a ia ka e he taha puhala foki.

Ko Mariana (5), kua 20 tumā e tau tau moui haana mogonei, ne tatai e tuaga mo Bruno. Ne gahua loea a ia, ka e pete ni e gahua totogi lahi haana, ne nakai makona mooli a ia. Pehē a ia: “Ne logona hifo e au kua tuga e tagata kua ‘kai e matagi.’” (Fakama. 1:17) Falu matakainaga taane mo e fifine ne fakamafana a ia ke manamanatu ke he paionia. He mole e manamanatu ki ai, ko Mariana  mo e tau kapitiga haana ko Bianca (6), Caroline (7), mo Juliana (8), ne fifili ke lagomatai e fakapotopotoaga i Barra do Bugres, ko e taone mamao ne tata ki Polivia, ne totou afe e tau maila he mamao mo e kaina ha lautolu. Ko e heigoa foki ne tupu?

Ne pehē a Mariana: “Ko e manako haaku ke nofo i ai ke he tolu e mahina. Ka e hoko ke he matahiku he mogoia, ne kua taute e au 15 e fakaako Tohi Tapu! Ka kua lata e tau tagata fakaako Tohi Tapu ia ke lagomatai fakalahi ke holo ki mua he kupu mooli. Ati nakai loto malolō au ke tala age ki a lautolu ko e fano fai au. Ne lata ni au ke nofo.” Ne pihia ni e mena ne taute he tau matakainaga fifine tokofā oti ia. Ti kua fai kakano mooli nakai e puhala moui ha Mariana ha ko e gahua foou haana? Pehē a ia: “Ha kua fakaaoga e Iehova au ke lagomatai e tau tagata ke hiki e tau momoui ha lautolu ke he mitaki ati kua fiafia lahi au. Ko e fakamonuinaaga ma haaku ke iloa kua fakaaoga e au he mogonei e magaaho mo e malolō haaku ke taute e taha mena kua aoga mooli.” Kua fakamaama e Caroline e tau logonaaga he tau matakainaga fifine tokofā oti ia: “Ka takoto au he pō, ne fiafia lahi au ha kua gahua malolō au ke tutuli e tau mena he Kautu. Kua hagaaki e moui haaku ke he puhala ke lagomatai e haaku a tau tagata fakaako Tohi Tapu. Kua mitaki lahi ke kitia a lautolu hane holo ki mua. Kua logona hifo e au e moolioli he tau kupu: “Kia kamata e mutolu mo e kitekite, kua mitaki a Iehova.”​—Sala. 34:8.

Kua fiafia mooli a Iehova ke kitia kua tokologa fakahaga e tau matakainaga fuata taane mo e fifine he lalolagi katoa kua “eke poa mo loto” po ke fakamakai a lautolu ke fakamatala e tala mitaki ke he haana Kautu he tau matakavi mamao! (Sala. 110:3; Fakatai 27:11) Ko lautolu oti ia kua gahua fakamakai, ne moua e fakamonuinaaga ha Iehova.​—Fakatai 10:22.