Matakutaku ki a Iehova​—Kia Fiafia!

‘Fiafia e tagata kua matakutaku kia Iehova.’—SALAMO 112:1.

1, 2. Ko e heigoa kua tamai he matakutaku ki a Iehova?

NAKAI mukamuka ke moua e fiafia. Kua falanaki e fiafia mooli he taute e tau fifiliaga hako, he taute e mena kua hako, mo e fuluhi kehe mai he mena hepe. Ko e ha tautolu a Tufuga, ko Iehova, ne foaki mai haana a Kupu, ko e Tohi Tapu, ke fakaako a tautolu ke he puhala ke olioli e moui mitaki. He tutuli mo e muitua e takitakiaga ha Iehova, ti fakagahua e matakutaku ke he Atua, kua maeke ia tautolu ke makona mo e fiafia mooli.—Salamo 23:1; Tau Fakatai 14:26.

² He vala tala nei, to fakatutala a tautolu ke he tau fakataiaga he Tohi Tapu mo e vahā nei ne fakakite kua foaki he matakutaku mooli ke he Atua e malolō ke he tagata ke totoko e manako ke taute e mena hepe mo e malolō ke taute e mena hako. To kitia e tautolu kua maeke he matakutaku mahani Atua ke tamai e fiafia he omoi a tautolu ke fakahako e puhala hepe, tuga ne taute he Patuiki ko Tavita. To kitia foki e tautolu e matakutaku ki a Iehova ko e tufaaga uho mooli kua foaki he tau matua ke he tau tama ha lautolu. Mooli, kua talahau mai he Kupu he Atua ki a tautolu: “[“Fiafia,” NW] e tagata kua matakutaku kia Iehova.”—Salamo 112:1.

Liu Moua e Fiafia ne Galo

3. Ko e heigoa ne lagomatai a Tavita ke kautu mai he tau agahala haana?

³ He talahau ai he vala tala fakamua, ne kaumahala a Tavita ke he tolu e magaaho kehe lahi ke fakakite e matakutaku mahani Atua mitaki mo e agahala ai. Pete ia, ko e tali haana ke he akonaki ha Iehova kua eke a ia mo tagata matakutaku Atua. Ko e fakaheke mo e fakalilifu haana ma e Atua kua omoi a ia ke talahau e agahala haana, fakahakohako e puhala, ti liu fakatū e fakafetuiaga mitaki mo Iehova. Pete kua tamai he agahala haana e matematekelea ki a ia mo e falu, ne matutaki e taliaaga ha Iehova ke lalago mo e fakamonuina e tokihala mooli haana. Maeke mooli he  fakafifitakiaga ha Tavita ke fakamalolō e tau Kerisiano he vahā nei ne liga mokulu ke he agahala kelea lahi mahaki.

4. Lagomatai fēfē he matakutaku ke he Atua e tagata ke liu moua e fiafia?

⁴ Mailoga e mena ne tupu ki a Sonja. * Pete he eke mo tagata fakamatala tumau, ne feoaki a Sonja mo e tau tagata ne mahani kelea, ti putoia ke he mahani nakai Kerisiano, ti tuku a ia ki tua he fakapotopotoaga Kerisiano. He matala e manamanatuaga haana, ne taute e Sonja e tau mena oti kua lata ke fakahako e fakafetuiaga haana mo Iehova. Fai magaaho, ne liu a ia talia mai ke he fakapotopotoaga. He tau mena oti nei, ne nakai mahala e manamanatuaga ha Sonja ke fekafekau ki a Iehova. Fakahiku, ne liu a ia taute e fekafekauaga paionia mau. Ati mau a ia ke he motua Kerisiano mitaki, ti fekafekau fiafia a laua he fakapotopotoaga. Pete kua tokihala a Sonja ha kua lifa fakakū mai he puhala Kerisiano, ne fiafia a ia ha kua lagomatai he matakutaku Atua haana a ia ke liu mai.

Mitaki ke Matematekelea Ka e Nakai Agahala

5, 6. Fakamaama e puhala mo e kakano ne lagaua e fakahao e Tavita e moui a Saulo.

⁵ Kua mua atu e mitaki mogoia, ka lagomatai he matakutaku Atua a koe ke kalo mai he agahala he magaaho fakamua. Tupu mooli e mena nei ki a Tavita. He taha magahala ne tutuli e Saulo a Tavita mo e tau kautau ne tolu e afe, ne fina atu a ia ke he ana ne fakamumuli ai a Tavita mo e kau haana. Ne fakaohooho he tau tagata a Tavita a ia ke keli a Saulo. Nakai kia kua tuku atu e Iehova e fi hagahagakelea ke he tau lima ha Tavita? Ne totolo fakaeneene atu a Tavita ki a Saulo mo e hehele e kala tapulu haana. Ha kua matakutaku a Tavita ke he Atua, ne fakahukia he mena nakai hagahagakelea ia e manamanatuaga haana. Ne hataki e Tavita e tau tagata haana ne ita, he pehē: “Kia fakamamao e Iehova ia au ke eke ai e au e mena na ke he haku a iki, ko ia ne fakauku e Iehova, ke fakahoko ai haku lima kia ia, ha ko ia ne fakauku ai e Iehova.” *—1 Samuela 24:1-7.

⁶ Ke he taha magaaho foki, ne heapi a Saulo he po, ti ‘fakapulumohea e Iehova’ a ia mo e matakau katoa haana. Ne o atu fakatotomo a Tavita mo e nefiu loto malolō haana ko Apisai ke he lotouho he heapi mo e tūtū ai ke he mena ne mohe a Saulo. Ne manako a Apisai ke tamate a Saulo. Ka e taofi e Tavita a ia, he hūhū: “Ko hai ke fakaolo atu hana lima kia ia ne fakauku e Iehova ka e noa a ia mo e hala?”—1 Samuela 26:9, 12.

7. Ko e heigoa ne taofi a Tavita mai he agahala?

⁷ Ko e ha ne nakai kelipopo e Tavita a Saulo he lagaua e moua ia? Ha kua mua atu e matakutaku haana ki a Iehova ke he matakutaku haana ki a Saulo. Mai he matakutaku mitaki ke he Atua, ne mautauteute a Tavita ke matematekelea, kaeke kua lata, ka e nakai agahala. (Heperu 11:25) Ha ha ia ia e mauokafua katoatoa ke he levekiaga a Iehova ma e tau tagata Haana mo e ki a ia fakatagata. Ne iloa e Tavita ko e omaoma mo e falanaki ke he Atua to tamai e fiafia mo e tau monuina loga, ka ko e fakaheu e Atua ka tamai e nakai fakafiafia e Atua. (Salamo 65:4) Ne iloa foki e ia to fakamooli he Atua e maveheaga Haana ke eke a Tavita mo patuiki mo e to utakehe a Saulo he magaaho mo e puhala ni Haana.—1 Samuela 26:10.

Tamai he Matakutaku Atua e Fiafia

8. Eke fēfē e mahani a Tavita i lalo he peehiaga mo fakafifitakiaga?

⁸ Ha ko e tau Kerisiano, amanaki a tautolu ke he vaiga, favaleaga, mo e falu kamatamata. (Mataio 24:9; 2 Peteru 3:3) He falu magaaho, kua liga moua e tautolu e tau mena uka ne putoia e tau matakainaga tapuaki. Pete ia, iloa e tautolu kua kitia e Iehova e tau mena oti kana, logona e tau liogi ha tautolu mo e ke he magaaho tonu, to fakahakohako e ia e tau mena oti fakatatau ke he finagalo haana. (Roma 12:17-21; Heperu 4:16) Ko e mena ia, he nakai matakutaku ke he tau tagata totoko ha tautolu, kia matakutaku a tautolu ke he Atua mo e ono ki a ia ke laveaki a tautolu. Tuga a Tavita, kua nakai manako a tautolu ke taui atu, po ke fakahui e tautolu e tau matapatu fakaakoaga tututonu ke kalo mai he matematekelea. He fakahikuaga, kua tamai he mena nei e fiafia. Ka e fēfē?

9. Foaki e fakataiaga he matakutaku ke he Atua ne fua mai e fiafia pete ne favaleaga.

 ⁹ “Manamanatu au ke he taha matua fifine mo e tama fifine tote haana ha ko e tu uho Kerisiano ha laua kua nakai fakatau e laupepa ne lalago e matakau politika,” he talahau he misionare kua leva i Aferika. “Ne tafolo fakakelea he tau tagata taane tokologa a laua ti fekau a laua ke o ki kaina. He o a laua, kua lali e matua fifine ke fakamafana e tama fifine haana ne momoko, hane taufetului ke maama e kakano ne tupu e mena nei. Kua nakai fiafia a laua he magaaho ia, ka e ha ha ia laua e manamanatuaga meā. Fakahiku, ne fiafia lahi a laua ha kua omaoma a laua ke he Atua. Ane mai fakatau e laua e tau laupepa ne lalago e tau matakau politika, to fiafia lahi e moto tagata. To age he tau tagata taane e tau lupo inu humelie ti koli viko ia laua ke hoko atu ki kaina. Ane mai iloa kua fakahui he tama fifine mo e matua fifine haana, to eke a laua mo tau tagata ne nakai fiafia mooli he lalolagi.” Ne fakahao he matakutaku ke he Atua a laua mai he tau mena ia.

10, 11. Ko e heigoa e tau fua mitaki ne moua he taha fifine ne matakutaku ke he Atua?

¹⁰ Ko e fakakite e matakutaku mahani Atua kua fua mai foki e fiafia ka fehagai mo e tau kamatamata ne putoia e fakalilifu ma e fakatapuaga he moui. He magaaho ne fatu a Mary he tama ke toluaki, ne fakamalolō he ekekafo a ia ke fakatotama. “Kua halauka lahi e tuaga haau,” he tala age e ia. “To fai magaaho ka hagahagakelea lahi a koe ti mate ato 24 e tulā. To mate foki e tama mukemuke. Ko e ha tuaga ni, nakai iloa mooli ai to malolō e tama mukemuke.” Kua fakaako Tohi Tapu a Mary mo e Tau Fakamoli a Iehova ka e nakai la papatiso ia. “Ka e,” pehē a Mary, “kua fifili tuai au ke fekafekau ki a Iehova, ti mauokafua au ke fakatumau ke omaoma ki a ia, pete ne mena ka tupu.”—Esoto 21:22, 23.

 ¹¹ He fakafua tama haana, ne fakatumau a Mary ke fakaako e Tohi Tapu mo e leveki e magafaoa haana. Fakahiku ne fanau ai e tama. “Uka fakatote e fanau he tama nei ke he tau tama ua fakamua, ka e nakai hoko ke he tuaga vihi lahi mahaki,” he talahau e Mary. Ne lagomatai he matakutaku Atua a Mary ke fakatumau e manamanatuaga mitaki, mo e nakai leva ti papatiso a ia. He lahi hake e tama mukemuke, ne ako foki e ia ke matakutaku ki a Iehova, ti kua gahua a ia he la ofisa he Tau Fakamoli a Iehova mogonei.

‘Fakamalolō a Koe ha ko Iehova’

12. Fakamalolō fēfē he matakutaku ke he Atua a Tavita?

¹² Kua nakai ni fakamahao e matakutaku a Tavita ki a Iehova ke nakai taute e mena hepe. Ne fakamalolō a ia ke fifili tonu mo e fakailoilo i lalo he tau tutuaga uka. Ke he taha e tau mo e fa e mahina, ne fakamumuli a Tavita mo e tau tagata haana mai ia Saulo i Tikelaka i Filisitia. (1 Samuela 27:5-7) He magaaho ne o e tau tagata, ne tugi he tau Amaleka fōfō mena e taone mo e kaiha e tau hoana, tau tama, mo e tau fuifui manu oti he tau tagata taane. He liliu mai mo e kitia e mena ne tupu, ne momoko lahi a Tavita mo e tau tagata taane haana. Ne liliu mafiti e maanu ke he ita ti tutala e tau tagata ha Tavita ke pinimaka a ia. Pete ne tupetupe, ne nakai fakaatukehe a Tavita. (Tau Fakatai 24:10) Ne omoi he matakutaku ke he Atua a ia ke fuluhi ki a Iehova, ti ‘fakamalolō a ia ha ko Iehova.’ Fakalataha mo e lagomatai he Atua, ne tamate e Tavita mo e tau tagata haana e tau Amaleka ti liuaki e tau mena oti.—1 Samuela 30:1-20.

13, 14. Maeke fēfē he matakutaku ke he Atua ke lagomatai e taha Kerisiano ke taute e tau fifiliaga mitaki?

¹³ Kua fehagai foki e tau fekafekau he Atua he vahā nei mo e tau tutuaga ne lata ke falanaki ki a Iehova mo e fakamalolō ke fifili tonu. Tuga e fakatai ki a Kristina. He vahā fuata ha Kristina ne fakaako Tohi Tapu a ia mo e Tau Fakamoli a Iehova. Ka e manako a ia ke eke mo fifine ta piano he konesete, ti mafiti e holo ki mua haana. Mua atu, ne logona e ia e maimainā ke fakamatala ati hopoate ke talia e tau matagahua ka papatiso. He matutaki a Kristina ke fakaako e Kupu he Atua, ne kamata a ia ke mailoga e malolō ia. Ne fakaako a ia ke matakutaku ki a Iehova, ti mailoga e ia kua amanaki a Iehova ke he tau fekafekau haana ke fakaalofa ki a ia mo e loto, manatu, solu, mo e malolō katoa. (Mareko 12:30) Ne omoi he mena nei a ia ke tukulele a ia ki a Iehova mo e papatiso ai.

¹⁴ Ne ole a Kristina ki a Iehova ma e lagomatai ke holo ki mua fakaagaaga. “Iloa e au e moui he tagata ta piano he konesete ne putoia e fano fenoga tumau mo e tau konotuleke ke ta piano ke hokotia ke 400 konesete he tau,” he fakamaama e Kristina. “Ti fifili au ke eke mo faiaoga ke lagomatai fakatupe aki au mo e gahua fakamatala tumau.” He magaaho ia, kua fitā a Kristina he setulu ke ta piano ke fakapā aki laia he fale konesete talahaua he motu haana. “Ko e konesete fakamua haaku kua eke ai mo konesete fakahiku,” he talahau e ia. Tali mai he magaaho ia ne mau a Kristina ke he motua Kerisiano. Kua fekafekau tokoua a laua ke he taha he tau la ofisa he Tau Fakamoli a Iehova. Ne fiafia a ia kua foaki e Iehova e malolō ke taute e tau fifiliaga hako ti maeke ia ia mogonei ke fakaaoga e tau magaaho mo e malolō ke he fekafekauaga Haana.

Ko e Tufaaga Uho

15. Ko e heigoa ne manako a Tavita ke foaki ke he tau tama haana, ti taute fēfē e ia?

¹⁵ “Ma fanau na e, o mai ā, kia fanogonogo mai kia au,” he tohi e Tavita. “Ti fakaako e au a mutolu ke matakutaku kia Iehova.” (Salamo 34:11) Ko e matua taane, ne amanaki a Tavita ke foaki ke he tau tama haana e tufaaga uho—ko e matakutaku mitaki ne mooli mo e lagotatai ki a Iehova. He tau kupu mo e tau gahua, ne fakatino e Tavita a Iehova, nakai ko e Atua pāpā maō mo e matakutakuina, he mautali ai ke kumi kelea ka moumou e tau matafakatufono Haana, ka ko e Matua fakaalofa, leveki, mo e fakamagalo ke he Haana tau tama he lalolagi. “Kua iloa e hai e tau mena hehe?” he hūhū e Tavita. Ti, he fakakite e mauokafua haana kua nakai hulu fakamatafeiga tumau e Iehova e tau hēhē ha tautolu, ne lafi e ia: “Kia fakamagalo mai kia au e tau hala galo.” Ne iloa e Tavita ka lali fakalahi a ia, to talia e Iehova e tau kupu mo e tau manatu haana.—Salamo 19:12, 14.

16, 17. Fakaako fēfē he tau matua e tau fanau ke matakutaku ki a Iehova?

 ¹⁶ Kua eke a Tavita mo fakafifitakiaga ma e tau matua he vahā nei. “Ne feaki he tau matua ha maua a maua ke he puhala ke fiafia ke he kupu mooli,” he talahau e Ralph, ne gahua tokoua he la ofisa he Tau Fakamoli a Iehova. “He ikiiki a maua, ne putoia e laua a maua he tau fakatutalaaga ke he tau matagahua he fakapotopotoaga, ti alaala lahi a maua ke he kupu mooli tuga na laua. Ne feaki e laua a maua ke talitonu ko e mena maeke ia maua ke taute e tau mena mitaki he fekafekauaga a Iehova. Ko e mena ia, ne leva e nonofo he magafaoa ha mautolu he motu ne lahi e manako lagomatai ma e tau tagata fakailoa he Kautu ti lagomatai ke fakatu e tau fakapotopotoaga foou.

¹⁷ “Ko e mena ne fakatumau a maua ke he puhala hako ne nakai ko e tau matafakatufono pāpā maō loga ka ke he tau matua ha maua, kua mooli a Iehova ti totonu lahi mahaki mo e mitaki. Ne manako a laua ke iloa mitaki a Iehova mo e fakafiafia a ia, ti ako mai e maua e matakutaku mooli ke he Atua ia laua mo e fakaalofa ki a ia. Pete ka taute e maua taha mena hepe, ne nakai taute he tau matua ha maua a maua ke logona kua nakai fakaalofa mai a Iehova; po ke fakahala teao noa ni a maua he ita. Laulahi he tau magaaho, ne fekau e laua a maua ke nonofo mo e tutala ki a maua, falu magaaho ne hihina e tau mata he matua fifine he lali ke hokotia ke he tau loto ha maua. Ti kautu e mena ia. Ne ako mai e maua he tau kupu mo e tau gahua he tau matua ha maua ko e matakutaku ki a Iehova ko e mena mitaki lahi ti eke mo taha he Tau Fakamoli ko e olioli mo e fiafia, nakai ko e mena mamafa.”—1 Ioane 5:3.

18. Ko e heigoa ka moua e tautolu he matakutaku ke he Atua mooli?

¹⁸ He falu he “tau kupu fakamui a Tavita,” ne totou e tautolu: “Ko ia kua pule ke he tau tagata kua eke ai mo e tututonu; kua pule ai a ia mo e matakutaku ke he Atua; kua tuga ne maama ke he magaaho pogipogi a ia ka kua hake e la.” (2 Samuela 23:1, 3, 4) Ko Solomona ko e tama taane mo e huli ha Tavita ne mailoga e mooli ha kua ole a ia ke foaki age e Iehova ki a ia “e loto matala” mo e iloa “ke fifili ai e ia e mitaki mo e kelea.” (1 Tau Patuiki 3:9) Ne mailoga e Solomona ko e matakutaku ki a Iehova ko e puhala he iloilo mo e fiafia. Fakamui, ne fakakatoatoa e ia e tohi ha Fakamatalaaga ke he tau kupu nei: “Kia fanogonogo a a tautolu ke he fakahikuaga he tau mena oti ia, Kia matakutaku a ke he Atua, mo e omaoma ke he hana tau fakatufono; ha ko e mena ia kua lata ke eke he tau tagata oti kana. Ha ko e mena to fakafili he Atua e tau gahua oti, katoa mo e tau mena galo oti ni, ko e tau mena mitaki katoa mo e tau mena kelea.” (Fakamatalaaga 12:13, 14) Ka omaoma a tautolu ke he fakatonuaga ia, to moua mooli e tautolu “ko e taui he mahani fakatokolalo mo e matakutaku kia Iehova” ne nakai ni ko e iloilo mo e fiafia ka ko e “koloa, mo e lilifu mo e moui” foki.—Tau Fakatai 22:4.

19. Ko e heigoa ka fakamalolō a tautolu ke maama e “matakutaku ki a Iehova”?

¹⁹ Mai he tau fakafifitakiaga he Tohi Tapu mo e tau mena tutupu he vahā nei, kitia e tautolu e matakutaku mitaki ke he Atua ko e mena aoga ke he moui he tau fekafekau mooli ha Iehova. Nakai ni puipui he matakutaku ia a tautolu mai he taute e mena ne nakai fakafiafia e Matua ha tautolu he lagi ka kua foaki foki ki a tautolu e malolō ke fehagai mo e tau fi ha tautolu mo e fakamalolō ke fakauka ke he tau kamatamata mo e tau mena uka ne felauaki mo tautolu. Ko e mena ia, kia eketaha a tautolu oti, fuata mo e fuakau, ke fakaako e Kupu he Atua, manamanatu fakahokulo ke he mena ne ako e tautolu, mo e fakatata ki a Iehova he liogi tumau mo e mai he loto. He taute pihia, to nakai ni moua e tautolu e “iloilo ke he Atua” ka e maama foki e “matakutaku kia Iehova.”—Tau Fakatai 2:1-5.

[Tau Matahui Tala]

Maeke Nakai a Koe ke Fakamaama?

Maeke fēfē he matakutaku ke he Atua

• ke lagomatai e tagata ke kautu mai he agahala kelea lahi mahaki?

• ke tamai e fiafia pete ne tau kamatamata mo e favaleaga?

• ke fakamalolō a tautolu ke taute e finagalo he Atua?

• ke eke mo tufaaga uho ke he tau tama ha tautolu?

[Tau Hūhū he Fakaakoaga]

[Fakatino he lau 27]

Ne taofi he matakutaku ki a Iehova a Tavita mai he kelipopo e Patuiki ko Saulo

[Tau Fakatino he lau 29]

Ko e matakutaku ke he Atua ko e tufaaga uho ne maeke he tau matua ke foaki ke he tau tama ha lautolu