“Ko e Atua ko e Fakaalofa a Ia”

“Ko e tagata kua nakai fakaalofa, kua nakai iloa e ia e Atua; ha ko e Atua ko e fakaalofa a ia.”—1 IOANE 4:8.

1-3. (a) Ko e heigoa e talahauaga ne taute he Tohi Tapu hagaao ke he fua he fakaalofa ha Iehova, mo e puhala fe ne kehe ai e talahauaga nei? (e) Ko e ha ne pehe e Tohi Tapu “ko e Atua ko e fakaalofa a ia”?

KO E tau mahani oti ha Iehova kua tokoluga, mitaki katoatoa, mo e futiaki. Ka ko e fakaalofa e fua ha Iehova ne futia lahi. Kua nakai fai mena ka futia fakamalolo a tautolu ki a Iehova ke tuga e fakaalofa hana. Fiafia ai, ko e fakaalofa foki e fua hana ne mua. Iloa fefe e tautolu e mena ia?

² Ne talahau he Tohi Tapu taha mena hagaao ke he fakaalofa ne nakala talahau hagaao ke he falu fua ne mua ha Iehova. Ne nakai talahau he tau Tohiaga Tapu ko e malolo e Atua po ke ko e fakafili tonu e Atua po ke ko e pulotu foki e Atua. Kua toka ia ia e tau fua ia ti ko e punaaga mua ue atu ke he tau mena tolu oti ia. Ka e, hagaao ke he fakaalofa, kua fai mena hokulo ne talahau ia 1 Ioane 4:8: “Ko e Atua ko e fakaalofa a ia.” E, kua hokulo e holofa he fakaalofa ia Iehova. Ko e aga pauaki ni hana a ia. Talahau ai, liga manamanatu a tautolu ki ai ke he puhala nei: ko e malolo ha Iehova kua omoi a ia ke gahua. Ko e fakafili tonu mo e pulotu hana kua takitaki e puhala kua gahua a ia. Pete ia, kua fakalagalaga he fakaalofa ha Iehova a ia ke gahua. Ti ko e fakaalofa hana kua fakakite tumau e puhala kua fakaaoga e ia falu he hana tau fua.

³ Kua fa talahau ko Iehova ko e fakakiteaga ne mua he fakaalofa. Ko e mena ia, ka manako a tautolu ke ako hagaao ke he fakaalofa, kua lata ia tautolu ke ako hagaao ki a Iehova. O mai la tautolu mogoia ke kumikumi ke he falu he tau vala he fakaalofa nakai fakatatai ha Iehova.

Ko e Gahua Ue Atu he Fakaalofa

4, 5. (a) Ko e heigoa e fakaalofa ue atu he fakamauaga tuai? (e) Ko e ha kua pehe a tautolu kua fakalataha a Iehova mo e hana Tama ke he pipiaga malolo lahi he fakaalofa ne taute?

⁴ Kua fakakite e Iehova e fakaalofa ke he tau puhala  loga ka e taha mai ia lautolu ne mua atu e kehe. Ko e heigoa? Ko e fakafano mai he Tama hana ke matematekelea mo e mate ma tautolu. Maeke ia tautolu ke talahau fakahako ko e gahuahuaaga ue atu nei he fakaalofa he fakamauaga tala tuai. Ko e ha kua talahau e tautolu pihia?

⁵ Ne ui he Tohi Tapu a Iesu “ko e uluaki he tau mena oti kana kua eke.” (Kolose 1:15) Kia manamanatu la—ko e Tama ha Iehova kua moui fakamua ato fai lalolagi mo e lagi katoatoa. Fiha mogoia e leva he nonofo e Matua mo e Tama? Ne fuafua he falu saienetisi kua 13 e piliona tau he lalolagi mo e lagi katoatoa. Ka e, pete ni ka hako e fuafuaaga, to nakai leva ti fakakite e loa he moui he Tama uluaki ha Iehova! Ko e heigoa hana ne taute he vaha loa nei? Kua fekafekau olioli e Tama ko e “iki gahua,” he Matua hana. (Tau Fakatai 8:30, NW; Ioane 1:3) Ti gahua tokoua a Iehova mo e Tama hana ke tufugatia e tau mena oti ne toe. Ko e tau magaaho olioli mo e fiafia ha ia ha laua! Ko hai ia tautolu, mogoia, kua maeke ke maama e malolo he pipiaga ne ha ha ai ke he vaha loa lahi he magaaho pihia? Maali ai, kua kaufakalataha a Iehova ko e Atua mo e Tama hana ha ko e pipiaga malolo lahi ne kua taute.

6. He magaaho ne papatiso a Iesu, fakakite fefe e Iehova hana tau logonaaga hagaao ke he Tama Hana?

⁶ Pete he pihia, ne fakafano mai e Iehova e Tama hana ke he lalolagi ke fanau ko e tama mukemuke he tagata. He taute pihia ke he falu hogofulu tau, ne fakafolau e Iehova e fakalatahaaga tata lahi mo e Tama fakahelehele hana i luga he lagi. Mo e levekiaga lahi, ne kitekite mai a Ia he lagi he lahi hake a Iesu ke eke mo tagata mitaki katoatoa. He kavi ke 30 e tau he moui, ne papatiso a Iesu. Ne vagahau fakaperesona mai e Matua i luga he lagi: “Ko e haku a tama fakahele hanā, kua fiafia na au kia ia.” (Mataio 3:17) He kitia kua taute fakamoli e Iesu e tau mena oti kua perofeta, tau mena oti ne ole ki a ia, liga kua fiafia lahi e Matua hana!—Ioane 5:36; 17:4.

7, 8. (a) Ko e heigoa kua hoko a Iesu ki ai he Nisana 14, 33 V.N., ti lauia fefe hana Matua he lagi? (e) Ko e ha ne fakaata e Iehova hana Tama ke matematekelea mo e mate?

⁷ Ka e fefe e logonaaga ha Iehova ia Nisana 14, 33 V.N., he afo ti tapaki he matakau vale a Iesu? He va, tauanu, mo e tamoto ki a Iesu? He fahi a ia, ti mahehe tuga e tau lipine e tua hana?  He pao fao e tau lima mo e tau hui hana, ke he pou akau mo e toka he tautau ai ka e amuamu atu e tau tagata a ia? Fefe e logonaaga he Matua he tagi hake e Tama fakahele hana ki a ia he kokoho a ia he mamahi? Fefe e logonaaga ha Iehova he fafagu e Iesu e fafagu fakahiku hana, ti ko e fakamua laia tali mai he kamataaga he tau tufugatiaaga oti kua mole atu e Tama fakahele Hana?—Mataio 26:14-16, 46, 47, 56, 59, 67; 27:26, 38-44, 46; Ioane 19:1.

⁸ Ha kua fai logonaaga a Iehova, ko e mamahi ne hoko ki a ia ha ko e mate he hana Tama kua mua atu ke he malolo he tau kupu ha tautolu ka talahau. Ko e mena kua maeke ke fakakite ko e manatu ha Iehova ne fakaata ai ke tupu. Ko e ha ne fakafita he Matua ni a ia ke he tau mamahi pihia? Ne fakakite e Iehova taha mena homo ue atu ki a tautolu ia Ioane 3:16—ko e kupu he Tohi Tapu ne aoga lahi ti kua ui ai ko e Evagelia tote. Ne talahau: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” Ti ko e manako he Atua kua fakakatoatoa ke he mena nei: ko e fakaalofa. Nakai la fai fakaalofa ne mua ue atu ia kua fakakite pihia.

Puhala ne Fakamafana e Iehova a Tautolu he Hana Fakaalofa

9. Ko e heigoa ne manako a Satani ke talitonu e tautolu hagaao ke he onoonoaga ha Iehova ki a tautolu, ka ko e heigoa ne fakamafana e Iehova ki a tautolu?

⁹ Pete ia, kua mafuta hake e huhu aoga: Kua fakaalofa kia e Atua ki a tautolu fakatagata? Kua talia he falu na fakaalofa e Atua ke he tau tagata oti kana, tuga ne talahau ia Ioane 3:16. Ka kua tuga logona hifo e lautolu, ‘Kua nakai fakaai e Atua ke fakaalofa ki a au ko e tagata tokotaha.’ Moli na makai a Satani ko e Tiapolo ke talitonu a tautolu ko e mena nakai fakaalofa po ke ofania e Iehova a tautolu. Ke he taha fahi, pete ni e nakai fai fakaalofa po ke fakateaga a tautolu tuga he manatu e tautolu, kua fakamafana e Iehova a tautolu kua aoga oti a tautolu ko e tau fekafekau tua fakamoli hana.

10, 11. Fakakite fefe he fakataiaga ha Iesu ke he tau manu ikiiki kua uho a tautolu ki mua ha Iehova?

¹⁰ Ma e fakatai, manamanatu ke he tau kupu ha Iesu ne fakamau ia Mataio 10:29-31. He fakatata e aoga he hana tau tutaki, ne pehe a Iesu: “Nakai kia fakafua ua e manu ikiiki ke he asari? Nakai to foki taha ia laua ke he kelekele ka noa mo e Matua ha mutolu. Ka kua oti kana he totou ha mutolu a tau lauulu. Ko e mena ia, ua matakutaku ai a mutolu; mena mua a mutolu ke he tau manu ikiiki loga.” Manamanatu la ke he kakano he tau kupu ia ke he tau tagata fanogonogo ha Iesu he senetenari fakamua.

¹¹ He vaha ha Iesu na totogi tote e tau manu ikiiki ne fakafua mo tau mena kai. Ko e taha e tupe tote, kua moua he tagata fakatau ua e manu ikiiki. Ka e talahau e Iesu he magaaho fakamui, hagaao ke he Luka 12:6, 7, ka fakaaoga he tagata ua e tupe, to nakai moua e ia fa e manu ikiiki, ka e lima. Ko e manu lele lafi ki ai ne tuga na nakai fai totogi. Liga ko e tau manu fakateaga a ia ki mua he tau tagata, ka e fefe e onoonoaga he Tufuga ki a lautolu? Ne pehe a Iesu: “Ka e nakai nimo foki taha a lautolu [pihia foki e taha ne lafi atu] ki mua he Atua.” Liga kamata tuai a tautolu ke kitia e manatu ha Iesu. Ha kua aoga lahi e taha e manu ki a Iehova, ti mua atu e aoga he tagata mogoia! Tuga he talahau e Iesu, ne iloa e Iehova e tau talahauaga takitaha hagaao ki a tautolu. Moli ai, kua totou e tau lauulu takitaha ha tautolu!

12. Ko e ha kua iloa e tautolu na moli a Iesu he magaaho ne tutala a ia kua totou oti e tau lauulu ha tautolu?

¹² Liga manatu falu kua nakai moli e onoonoaga ha Iesu ke he mena nei. Ka kia manamanatu la hagaao ke he liu tu mai. Liga kua iloa lahi ni e Iehova  a tautolu ke maeke ke liu tufugatia foki a tautolu! Kua mokoina e ia a tautolu ati manatu e ia e tau matafeiga oti, fakalataha mo e tau talagaaga he tino ha tautolu mo e tau tau oti ha tautolu he manamanatuaga mo e tau fakafitaaga. Ti ke totou e tau lauulu ha tautolu—ne kavi ke 100,000 ne tupu he taha e ulu—ko e matagahua tote ka fakatatai ki ai. Ko e fulufuluola ha ia he tau kupu ha Iesu kua fakamafanatia a tautolu na ofania e Iehova a tautolu ko e tau tagata takitaha!

13. Fakakite fefe he mena ne tupu ke he Patuiki ko Iehosafata e mena kua kumi a Iehova ke he tau mena mitaki ia tautolu pete ni he nakai mitaki katoatoa a tautolu?

¹³ Kua fakakite he Tohi Tapu e taha mena foki kua fakamafana a tautolu he fakaalofa ha Iehova. Kua kumi a ia mo e uho e mena mitaki i loto ia tautolu. Manamanatu la, ma e fakatai, e patuiki mitaki ko Iehosafata. He taute he patuiki e mena goagoa, ne tala age e perofeta ha Iehova ki a ia: “Ko e mena ia kua hoko ai ki luga hau e ita mai ia Iehova.” Ko e manatu hokulo ha a ia! Ka kua nakai oti he mena ia e fekau ha Iehova. Ne fakaholo atu: “Ka e pete ia kua moua e tau mena mitaki kia koe.” (2 Nofoaga he Tau Patuiki 19:1-3) Ti kua nakai fakamatapouli he ita tututonu ha Iehova a ia ke he “tau mena mitaki” ia Iehosafata. Kua nakai kia fakamafana ke iloa ko e Atua ha tautolu kua kumi ke he mitaki ia tautolu pete ni kua nakai mitaki katoatoa a tautolu?

Ko e Atua kua ‘Mautali ke Fakamagalo’

14. Ka agahala a tautolu, ko e heigoa e tau logonaaga mamafa kua moua e tautolu, ka e aoga fefe a tautolu mai he fakamagaloaga ha Iehova?

¹⁴ Ka agahala a tautolu, ko e fakaita, ma, mo e tokihala kua fakatupu a tautolu ke logona kua nakai aoga a tautolu he fekafekau ki a Iehova. Manatu, mogoia, ko Iehova kua ‘mautali ke fakamagalo.’ (Salamo 86:5) E, ka fakatokihala e tautolu ha tautolu a tau hala mo e lali fakalahi ke nakai liu fatiaki, kua liga aoga a tautolu ke he fakamagalo ha Iehova. Manamanatu la ke he mena kua fakamaama he Tohi Tapu e puhala homo ue atu nei he fakaalofa ha Iehova.

15. Tuku fakamamao fefe e Iehova e tau agahala ha tautolu mai ia tautolu?

¹⁵ Ne fakaaoga he salamo a Tavita taha talahauaga malolo ke fakamaama aki e fakamagaloaga ha Iehova: “Tuga ne vaha mamao e fahi uta mo lalo, kua fakamamao pihia e [I]a ia tautolu ha tautolu a tau holifono.” (Salamo 103:12) Mamao fefe e fahi uta mai he fahi lalo? Ko e kakano, kua tumau e fahi uta ke mamao ligo ke he mena ke manatu ki ai mai he fahi lalo; ko e tau fahi ua ia kua nakai maeke ke matutaki. Ne mailoga he taha tagata fakaako tokoluga, ko e kakano he talahauaga nei ko e “mamao ligoligo; kua mamao atu matua ke he mena kua maeke ia tautolu ke manamanatu ki ai.” Ne tala mai he tau kupu omoi agaga ha Tavita ki a tautolu ko e magaaho ne fakamagalo e Iehova a tautolu, ne tuku e ia e tau hala ha tautolu ke mamao ia tautolu ke he mena ne manamanatu ki ai a tautolu.

16. Ka fakamagalo e Iehova e tau hala ha tautolu, ko e ha kua lata ke mafanatia a tautolu kua kitia e ia a tautolu nukua mea he magaaho fakamui?

¹⁶ Kua lali nakai a koe ke utakehe e ila mai he tapulu mama tea? Liga pete ni ko e tau laliaga mitaki hau, kua kitia agaia e ila. Mailoga la e puhala ne fakamaama e Iehova hana malolo ke fakamagalo: “Pete he tuga e ie kula ha mutolu a tau hala, to hina ia po ke kiona; pete ni he kula a ia po ke ie kula uhi, to eke ni ke tuga ne tau fulu mamoe.” (Isaia 1:18) Ko e kakano he kupu “kula” ko e lanu kula uteute. * Ko e “kula uhi” ko e taha lanu unoko he tau ie vali. Kua nakai fakaai ia tautolu, ke he tau laliaga ni ha tautolu ke utakehe e ila he hala. Ka kua maeke ia Iehova ke uta e tau hala ne tuga e kula mo e kula uhi mo e eke ai ke tuga ne kiona po ke tau fulu mamoe. He fakamagalo e Iehova e tau hala ha tautolu, kua nakai lata ia tautolu ke logona to hahamo tukulagi e tautolu e ila he tau hala pihia ke he moui katoa ha tautolu.

17. Ke he puhala fe ne tolo e Iehova e tau agahala ha tautolu ki tua hana?

¹⁷ He lologo fakaaueina aamotia ne fafati e Hesekia he mole e maulu mai a ia he gagao mate, ne tala age a ia ki a Iehova: “Kua liti e koe haku a tau hala oti ki tua hau.” (Isaia 38:17) Kua fakakite he mena nei a Iehova ke uta e tau hala he tagata taute hehe ne tokihala mo e tolo a lautolu ki tua Hana, ko e mena ne nakai kitia ai e Ia mo e nakai liu mailoga foki a lautolu. Hagaao ke he taha tohi, ko e manatu ne fakamaama mai kua liga talahau: “Kua  taute e koe e [tau hala haku] ke tuga kua nakai ni tupu.” Nakai kia mafanatia lahi e mena ia?

18. Fakakite fefe he perofeta ko Mika he magaaho ka fakamagalo a Iehova, kua tatafi kehe katoatoa e ia e tau agahala ha tautolu?

¹⁸ He maveheaga he liu fakafouaga, ne fakakite he perofeta ko Mika hana mauokafua to fakamagalo e Iehova e tau tagata tokihala hana: “Ko hai kia e Atua ke tatai mo koe kua . . . nakai manatu ke he tau holifono ha lautolu ne toe he hana tufaaga? . . . To liti foki e ia e tau hala oti ha lautolu ke he tau mena hokulo he tahi.” (Mika 7:18, 19) Manamanatu la ke he kakano he tau kupu ia ki a lautolu ne momoui he tau vaha Tohi Tapu. Kua maeke kia ke liuaki mai taha mena ne liti “ke he tau mena hokulo he tahi”? Ti kua fakakite he tau kupu ha Mika ka fakamagalo mai e Iehova, kua utakehe tukulagi e ia e tau hala ha tautolu.

“Ko e Fakaalofa Hofihofi Noa he Atua ha Tautolu”

19, 20. (a) Ko e heigoa e kakano he vepi Heperu “fakakite e fakaalofa noa”? (e) Fakakite fefe he Tohi Tapu e tau logonaaga ne ha ha he matua fifine ma e tama mukemuke hana ke fakaako a tautolu hagaao ke he fakaalofa hofihofi noa ha Iehova?

¹⁹ Ko e fakaalofa hofihofi noa taha vala he fakaalofa ha Iehova. Ko e heigoa e fakaalofa hofihofi noa? He Tohi Tapu, kua ha i ai e fakafetuiaga fetataaki he vahaloto he fakaalofa hofihofi noa mo e fakaalofa noa. Ne folafola he falu kupu Heperu mo e Heleni e kakano he fakaalofa hofihofi noa. Ke fakatai ki ai, ko e vepi Heperu ra·chamʹ, ne fa fakaliliu “fakakite e fakaalofa noa.” Ko e kupu Heperu nei, ne fakahagaao ni e Iehova ki a ia ni, kua fakatatai ke he kupu ma e “manava” mo e maeke ke fakamaama ko e “fakaalofa hofihofi noa he matua fifine.”

²⁰ Ne fakaaoga he Tohi Tapu e tau logonaaga he matua fifine ma e tama mukemuke hana ke fakaako a tautolu hagaao ke he kakano he fakaalofa hofihofi noa ha Iehova. Pehe mai e Isaia 49:15: “To nimo kia he fifine hana tama kai huhu, ke nakai fakaalofa [ra·chamʹ] a ia ke he tama ne fanau ai e ia? Mena nimo foki ia lautolu na, ka e nakai ni nimo ia au a koe.” Kua uka ke manamanatu to nimo he matua fifine ke feaki mo e tokaga ke he tama kai huhu hana. Ha ko e mena kua lolelole e tama mukemuke; he aho mo e po kua manako e tama ma e leveki mo e fakaalofa hohofi he matua fifine. Ka kua tokihala ni, he kua talahaua e tau tiakiaga fakamatua fifine, mua atu ke he “tau aho uka” nei. (2 Timoteo 3:1, 3) “Ka e,” he fakapuloa e Iehova, “nakai ni nimo ia au a koe.” Ko e fakaalofa hofihofi noa ne ha ha ia Iehova ma e tau fekafekau hana kua mua ue atu ai e malolo ke he ha logonaaga hofihofi noa pauaki ka manamanatu a tautolu ki ai—ko e fakaalofa hofihofi noa ne fa logona hifo he matua fifine ma e tama mukemuke hana.

21, 22. Ko e heigoa ne tupu ke he tau Isaraela i Aikupito i tuai, ti tali atu fefe a Iehova ke he tau tagi ha lautolu?

²¹ Maeke fefe a Iehova, tuga e matua fakaalofa ke fakakite e fakaalofa hofihofi noa? Kua kitia  maali e fua nei he puhala ne fehagai a ia mo e motu ha Isaraela i tuai. He matahiku he senetenari ke 16 aki F.V.N., kua totou miliona e tau Isaraela ne fakatupa i Aikupito, nukua kaka e favale ki a lautolu. (Esoto 1:11, 14) He fakaatukehe ha lautolu, ne tagi lagomatai e tau Isaraela ki a Iehova. Tali atu fefe e Atua he fakaalofa hofihofi noa?

²² Kua aamotia e loto ha Iehova. Ne talahau e ia: “Kua kitekite ni au ke he matematekelea he haku motu ha i Aikupito, kua fanogonogo foki e au ke he tagi ha lautolu . . . kua kitia e au ha lautolu a mamahi.” (Esoto 3:7) Kua nakai kitia e Iehova e tau mamahi he tau tagata hana po ke logona e tau tagi fakatutu ha lautolu ka e nakai fai logonaaga ma lautolu. Ko Iehova ko e Atua fakaalofa hohofi. Mo e ko e fakaalofa hohofi—ko e tuaga ke logona e mamahi he falu—kua matutaki lahi ke he fakaalofa hofihofi noa. Ka e nakai ni fai logonaaga a Iehova ma e tau tagata hana; nukua omoi a ia ke gahuahua ma lautolu. Ne talahau he Isaia 63:9: “Ne laveaki mai e ia a lautolu ke he hana fakaalofa mo e hana totonu.” Mo e “lima malolo,” ne laveaki mai e ia e tau Isaraela i Aikupito. (Teutaronome 4:34) He mole mai, ne foaki e ia ki a lautolu e tau mena kai mana mo e laveaki a lautolu ke he motu fua loga ma lautolu ni.

23. (a) Fakamafana fefe he tau kupu ha salamo a tautolu kua manamanatu a Iehova ki a tautolu takitokotaha? (e) He tau puhala fe ne lagomatai e Iehova a tautolu?

²³ Nakai fakakite ni e Iehova e fakaalofa hofihofi noa ke he tau tagata ni hana ko e matakau. Ko e Atua fakaalofa ha tautolu kua kapaletu lahi hagaao ki a tautolu ko e tau tagata takitokotaha. Nukua mamata fakamakau mai a ia ke he ha mamahi ne fakafita a tautolu ki ai. Ne tohia he salamo: “Ko e tau fofoga a Iehova kua hagao ia kia lautolu ne tututonu, mo e hana tau teliga foki ke he kalaga ha lautolu. Kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.” (Salamo 34:15, 18) Ti, lagomatai fefe mogoia e Iehova a tautolu takitokotaha? Kua nakai ni utakehe e ia e punaaga he mamahi ha tautolu. Ka kua taute e ia e tau foakiaga loga ma lautolu ne tagi lagomatai ki a ia. Ko e Kupu hana kua foaki e fakatonuaga gahuahua ne kua maeke ke taute taha mena kehe. He fakapotopotoaga, ne foaki e Iehova e tau leveki lata fakaagaga, ne ukufakina ke fakaata e fakaalofa hofihofi noa hana he lagomatai e falu. (Iakopo 5:14, 15) Ha ko e “fanogonogo liogi,” ne foaki e Iehova e ‘agaga tapu kia lautolu ka ole atu ai kia ia.’ (Salamo 65:2; Luka 11:13) Kua fakakite he tau foakiaga oti ia e “fakaalofa hofihofi noa he Atua ha tautolu.”—Luka 1:78.

24. Tali atu fefe a koe ke he fakaalofa ha Iehova?

²⁴ Nakai kia fiafia mogoia ke manamanatu ke he fakaalofa he Matua ha tautolu he lagi? He vala tala fakamua, ne fakamanatu ki a tautolu kua fakagahuahua e Iehova hana malolo, fakafili tonu, mo e pulotu ke he tau puhala fakaalofa ke lata mo e aoga ha tautolu. He vala tala nei, kua kitia e tautolu na fakakite fakahako e Iehova hana fakaalofa ma e tau tagata—ma tautolu takitokotaha foki—ke he tau puhala mua ue atu. Mogonei, igatia a tautolu mo e huhu hifo, ‘To tali atu fefe au ke he fakaalofa a Iehova?’ Kia tali atu a koe he fakaalofa ki a ia mo e hau a loto, manamanatuaga, solu, mo e malolo katoa. (Mareko 12:29, 30) Kia eke e puhala kua moui a koe he tau aho takitaha ke fakakite e manako he loto hau ke fakatata fakalahi atu ki a Iehova. Ti eke a Iehova, ko e Atua kua fakaalofa, ke fakatata fakalahi atu ki a koe—ke hoko ke he tukulagi tukumuitea!—Iakopo 4:8.

[Matahui Tala]

Manatu Nakai e Koe?

• Maeke fefe a tautolu ke iloa ko e fakaalofa e fua mua ue atu ha Iehova?

• Ko e ha kua talahau ko e fakafano mai e Iehova hana Tama ke matematekelea mo e mate ma tautolu ko e fakaalofa ue atu a ia nukua taute?

• Fakailoa mai fefe e Iehova ki a tautolu kua fakaalofa a ia ki a tautolu takitokotaha?

• Ko e heigoa e tau puhala malolo kua fakamaama mai he Tohi Tapu e fakamagaloaga ha Iehova?

[Tau Huhu he Fakaakoaga]

[Fakatino he lau 25]

‘Kua ta mai ai he Atua hana Tama fuataha’

[Fakatino he lau 26]

“Mena mua a mutolu ke he tau manu ikiiki loga”

[Credit Line]

© J. Heidecker/VIREO

[Fakatino he lau 28]

Maeke he logonaaga he matua fifine ke he hana tama mukemuke ke fakaako a tautolu hagaao ke he fakaalofa hofihofi ha Iehova