Tau Huhu Mai he Tau Tagata Totou

Kaeke logona he Kerisiano e tau leo, kakano kia kua fakamatematekelea fakatemoni a ia?

Nakai. Pete he talahau kua fakakite ni he tau temoni a lautolu ke he puhala ia, kua tokologa e tau tagata takitokotaha ne logona e tau leo po kua fakafita ke he tau logonaaga ne uka ke fakamaama mo e faguna ne kua iloa ai ha ko e puhala kumikumi, kua moua e lautolu e lekua fakaekekafo.

Pihia foki he senetenari fakamua, kua kitia maaliali ai ko e tau fakamatematekelea fakatemoni mo e tau gagao fakafahi tino kua tatai ni e tau hufiaaga. Ia Mataio 17:14-18, ne totou a tautolu hagaao ke he tama tane ne fakamalolo e Iesu. Pete he kitia ke he tama e tau fakamailoga he gagao vikoia kelea lahi, ko e hana matematekelea kua fakatupu he temoni. Ka e, he magaaho fakamua atu ne tamai e moto tagata matematekelea ki a Iesu ke fakamalolo, kua putoia ai ki a lautolu nei e falu he “tau tagata kua heketia he tau temoni, mo e tau tagata kua gagao he vikoia.” (Mataio 4:24) Kitia maaliali ai, ko e falu tagata gagao he vikoia kua nakai heketia he tau temoni. Ko e ha lautolu a tau lekua ko e tau mena fakafahi tino.

Kua hokotaki ai ko e falu ne matematekelea ke he schizophrenia, ko e gagao ne fa mahani ke tului aki e tau vai ekekafo, kua logona e tau leo po ke moua falu a fakamailoga ke tuga ko e taha mena kehe lahi. * Ko e falu gagao fakafahi tino kua liga fakatupu foki e okaoka he manamanatuaga ati liga manatu hehe e falu nukua fakatupu ni he tau temoni. Ko e mena ia, pete kua nakai manako e tagata ne talahau ke logona e tau leo po kua fakafita ke he falu logonaaga faguna ke tiaki e fakamatahavala fakatemoni, kua lata tonu ai ke fakamafana ki a ia ke kumikumi ko e fai fakamaamaaga fakafahi tino nakai ke he mena hane fakafita a ia ki ai.

[Matahui Tala]