“Kia Fakatata Atu a Mutolu ke he Atua”
“Kia Fakatata Atu a Mutolu ke he Atua”
“Kia fakatata atu a mutolu ke he Atua, ti fakatata mai ai a ia kia mutolu.”—IAKOPO 4:8.
1, 2. (a) Ko e heigoa e mena ne fa talahau he tau tagata? (e) Ko e heigoa e tomatomaaga ne foaki e Iakopo, mo e ko e ha kua lata ai?
“HA HA mo tautolu e Atua.” Ko e tau kupu ia kua fakamanaia e tau fakamailogaaga fakamotu mo e tau tapulu kautaha he tau kautau. “In God we trust” nukua fakatata he tau tupe mao mo e tau tupe pepa loga he vaha fou nei. Ko e mena fa talahaua ma e tau tagata ke talahau kua ha ha ia lautolu e fakafetuiaga tata mo e Atua. Ka e nakai kia to talitonu a koe, ke moua moli e fakafetuiaga pihia kua nakai kuenaia ke tutala hagaao ki ai po ke fakatata noa e tau fakamailogaaga?
2 Kua fakakite he Tohi Tapu nukua maeke ke moua e fakafetuiaga mo e Atua. Kua lata ni ke gahua ki ai. Kua lata foki he falu Kerisiano fakauku he senetenari fakamuaaki ke fakamalolo e fakafetuiaga ha lautolu mo Iehova ko e Atua. Ti lata ai he leveki Kerisiano ko Iakopo ke hataki falu hagaao ke he ha lautolu a tau fatuakiloto he tino mo e galo he mea fakaagaga. I loto he fakatonuaga ia, ne foaki e ia e tomatomaaga malolo lahi nei: “Kia fakatata atu a mutolu ke he Atua, ti fakatata mai ai a ia kia mutolu.” (Iakopo 4:1-12) Ko e heigoa e kakano ha Iakopo he talahauaga “fakatata atu”?
3, 4. (a) Ko e heigoa ne liga fakamanatu ke he falu tagata totou ha Iakopo, ke he talahauaga “fakatata atu a mutolu ke he Atua” he senetenari fakamuaaki? (e) Ko e ha kua mauokafua a tautolu nukua maeke ke o atu ke he Atua?
3 Ne fakaaoga e Iakopo e tau kupu nukua mahani ke he tokologa he tau tagata totou hana. Ne foaki he Fakatufono faka-Mose ke he tau ekepoa e tau fakaakoaga tonuhia ke he puhala ke “fakatata atu,” po ke o atu, ki a Iehova ma e tau tagata hana. (Esoto 19:22) Ti kua fakamanatu ai ke he tau tagata totou ha Iakopo, kua nakai lata ke fakateaga ke he aho ha Iehova hane hoko mai. Ko Iehova ko e lilifu ne mua ue atu he lalolagi mo e lagi katoatoa.
4 Ke he taha fahi, tuga ne mailoga he taha tagata fakaako Tohi Tapu, “ko e tomatomaaga nei [ia Iakopo 4:8] kua fakakite e onoonoaga mitaki ne malolo lahi.” Kua iloa e Iakopo na uiina fakaalofa tumau e Iehova e tau tagata nakai mitaki katoatoa ke fakatata lahi atu ki a Ia. (2 Nofoaga he Tau Patuiki 15:2) Ne hafagi he poa ha Iesu e puhala ke o atu ki a Iehova ke he kakano ne mua atu. (Efeso 3:11, 12) He vaha nei, ko e puhala ke o atu ke he Atua kua hafagi ke he totou miliona! Ka e maeke fefe, mogoia, a tautolu ke fakaaoga e magaaho mitaki lahi nei? To kikite a tautolu ke he tolu e puhala ka maeke ia tautolu ke fakatata lahi atu ki a Iehova ko e Atua.
Fakatumau ke “Kia Iloa” e Atua
5, 6. Fakamaama fefe he fakafifitakiaga ke he tama ko Samuela e mena ka putoia ke he “kia iloa” e Atua?
5 Hagaao ki a Ioane 17:3, ne pehe a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” Ko e heigoa e kakano ha Iesu he magaaho ne talahau e ia “kia iloa” e Atua? Ne mailoga he tau tagata fakaako tokoluga ke he tau vagahau ko e kakano he kupu ne fakaaoga he faka-Heleni tuai kua fai mena ne putoia ki ai—ko e gahua fakatumau, ka liga takitaki atu ke tata lahi e fakafetui mo e taha tagata.
6 Ke o mai ke iloa lahi e Atua, nakai ko e manatu fou a ia he vaha ha Iesu. I loto he tau Tohiaga Tapu Heperu, ke fakatai ki ai, ne totou e tautolu he magaaho ne tama agaia a Samuela, ne “nakaila iloa e ia a Iehova.” (1 Samuela 3:7) Pehe kia e mena nei kua tote lahi e mena ne iloa e Samuela hagaao ke he hana Atua? Nakai. Ha kua liga lahi e fakaakoaga he tau matua hana mo e he tau ekepoa ki a ia. Ka e, ko e kupu Heperu ne fakaaoga i loto he kupu tohi ia, he hagaao ke he taha tagata fakaako tokoluga, kua maeke ke “fakaaoga ma e fakafetui ne mua ue atu.” Kua nakaila hoko a Samuela ke iloa lahi a Iehova, ke tuga he magaaho fakamui ka fekafekau a ia mo tagata fakahokohoko kupu ha Iehova. He fakatumau a Samuela ke tupu hake, ne hoko moli a ia ke iloa a Iehova, ti moua e fakafetuiaga fakatagata tata mo ia.—1 Samuela 3:19, 20.
7, 8. (a) Ko e ha kua nakai lata a tautolu ke fakalolelole he tau fakaakoaga hokulo he Tohi Tapu? (e) Ko e heigoa falu a kupu moli hokulo he Kupu he Atua ne kua lata ia tautolu ke fakaako?
7 Kua iloa nakai e koe a Iehova ke eke ke tata lahi e fakafetui mo ia? Ke taute pihia, kua lata ia koe ke “kia manako lahi” ma e tau mena kai fakaagaga ne foaki he Atua. (1 Peteru 2:2) Kia nakai ni makona ke he tau fakaakoaga mukamuka. Kia lali ke ako falu fakaakoaga hokulo he Tohi Tapu. (Heperu 5:12-14) Kua fakalolelole kia he tau fakaakoaga ia a koe, he manatu kua uka lahi e tau mena ia ke ako? Ka pihia, kia manatu ko Iehova ko e “Faiaoga Homo Ue Atu.” (Isaia 30:20, NW) Kua iloa e ia e puhala ke fakahoko e tau kupu moli hokulo ke he tau manamanatuaga nakai mitaki katoatoa he tau tagata. Ti maeke ia ia ke fakamonuina e tau laliaga makutu hau ke maama e tau mena ne fakaako e ia ki a koe.—Salamo 25:4.
8 Ko e ha he kumikumi hifo ki a koe ni hagaao ke he falu he “tau mena hokulo ia he Atua”? (1 Korinito 2:10) Nakai ko e tau mataulu tala fakateaga anei ke tuga ne fetokoaki e tau tagata fioloti mo e tau akoako ki ai. Ko e tau taofiaga aoga a ia ne foaki e lotomatala fuluola hagaao ke he manamanatuaga mo e loto he Matua fakaalofa ha tautolu. Ke fakatai ki ai, ko e lukutoto, ko e “mena galo,” mo e tau maveheaga kehekehe nukua fakaaoga ai e Iehova ke fakamonuina aki e tau tagata hana mo e fakamoli hana tau finagalo—ko e tau mena nei mo e falu a matapatu tala pihia foki ko e tau mataulu tala fakafiafia mo e palepale lahi ma e kumikumiaga mo e fakaakoaga fakatagata.—1 Korinito 2:7.
9, 10. (a) Ko e ha kua haofia kelea e fakaikaluga, mo e heigoa ka lagomatai a tautolu ke kalo mai ai? (e) Ka hoko atu ke he iloilo ki a Iehova, ko e ha kua lata ia tautolu ke ukufakina ke fakatokolalo?
9 He tupu e iloilo hau ke he tau kupu moli fakaagaga hokulo, kia fakaeneene ke he haofia kelea ka hau fakalataha mo e iloilo—ko e fakaikaluga. (1 Korinito 8:1) Kua haofia kelea e fakaikaluga, ha kua fakamamao e tau tagata mai he Atua. (Tau Fakatai 16:5; Iakopo 4:6) Kia manatu, kua nakai fai kakano e tagata ke hula ke he hana iloilo. Ke fakatai, kia mailoga e tau kupu mai he kamataaga he tohi ne kumikumi atu ke he tolomakiaga fou he tagata ke he tau mena fakasaiene: “Ka lahi e mena ka iloa e tautolu, to mailoga lahi e tautolu e tote he tau mena ne iloa e tautolu. . . . Ko e tau mena oti ne ako e tautolu kua tote lahi ka fakatai atu ke he tau mena ne nakaila ako ia e tautolu.” Kua hauhau mitaki e aga fakatokolalo pihia. Mogonei, ka hagaao atu ke he lahi ue atu he iloilo—ko e iloilo ha Iehova ko e Atua—kua ha ha foki ia tautolu e kakano lahi ke tumau ke fakatokolalo. Ko e ha?
10 Mailoga falu a talahauaga faka-Tohi Tapu hagaao ki a Iehova. “Kua hokulo lahi hāu a tau manatu.” (Salamo 92:5) “Nakai maeke ke fakamatala hana [Iehova] iloilo.” (Salamo 147:5) “Ti nakai maeke ke kumikumi hana [Iehova] pulotu.” (Isaia 40:28) “Oi, oi! ko e hokulo he tanakiaga he iloilo mo e fioiaaga he Atua!” (Roma 11:33) Maaliali ai, to nakai maeke ia tautolu ke iloa e tau mena oti ne ha ha ai hagaao ki a Iehova. (Fakamatalaaga 3:11) Kua fakaako e ia ki a tautolu e tau mena homo ue atu, ka e to tumau ni ke toka i mua ha tautolu e tau iloilo loga ke ako atu foki ki ai. Ti nakai kua loto fakaohooho mo e fakatokolalo e amaamanakiaga ia ki a tautolu? He ako atu a tautolu, mogoia, kia fakatumau a tautolu ke fakaaoga e iloilo ha tautolu mo fakaveaga ke fakatata lahi atu ki a Iehova mo e ma e lagomatai ke he falu ke taute pihia—ka e nakai fakaaoga ke fakatokoluga hake aki a tautolu ke he falu.—Mataio 23:12; Luka 9:48.
Kia Fakakite e Fakaalofa Hau ma Iehova
11, 12. (a) Kua lata ke lauia fefe a tautolu he iloilo ne iloa e tautolu hagaao ki a Iehova? (e) Fakakite he heigoa nukua fakamoli e fakaalofa he tagata ke he Atua?
11 Latatonu ai, ne taute he aposetolo ko Paulo e matutakiaga he vahaloto he iloilo mo e fakaalofa. Ne tohia e ia: “Ko e haku a liogi hanai, kia fakatupu lahi ue atu ha mutolu a fakaalofa, mo e [“iloilo tonu,” NW], katoa mo e loto matala oti kana.” (Filipi 1:9) He nakai fakatokoluga e tau loto ha tautolu, ko e tau kupu moli oti ne ako e tautolu hagaao ki a Iehova mo e hana tau finagalo kua lata ke fakatolomaki aki e fakaalofa ha tautolu ma ha tautolu a Matua he lagi.
12 Ka e moli, tokologa ne talahau ke fakaalofa ke he Atua ka e nakai fakamoli. Liga kua fakamoli a lautolu hagaao ke he tau logonaaga malolo ne tutupu hake he tau loto ha lautolu. Ko e tau logonaaga pihia kua mitaki, po ke nava foki ki ai, he magaaho ni ka fakalautatai mo e iloilo tonu. Ka kua nakai tatai e tau logonaaga ia mo e fakaalofa moli ma e Atua. Ko e ha a ia? Mailoga la e puhala ne fakamaama he Kupu he Atua e fakaalofa pihia: “Ko e fakaalofa ke he Atua hanai, kia omaoma a tautolu ke he tau poaki hana.” (1 Ioane 5:3) Ko e fakaalofa ki a Iehova, mogoia, kua fakamoli ni he magaaho ka fakakite ke he tau gahua omaoma.
13. Lagomatai fefe he matakutaku mahani Atua a tautolu ke fakatata e fakaalofa ha tautolu ma Iehova?
13 To lagomatai he matakutaku mahani Atua a tautolu ke omaoma ki a Iehova. Ko e ofogia hokulo nei mo e fakalilifu ma Iehova nukua tupu mai he iloa a ia, he ako hagaao ke he tapu katoatoa, fakahekeaga, malolo, fakafili tonu, pulotu, mo e fakaalofa hana. Ko e matakutaku pihia kua mua atu e aoga ke fakatata atu ki a ia. Ko e moli, kia mailoga e mena ne talahau he Salamo 25:14: “Kua fakafetui a Iehova mo lautolu kua matakutaku kia ia.” Ti kaeke ha ha ia tautolu e matakutaku mitaki ke nakai fakaita ha tautolu a Matua fakahele he lagi, maeke ia tautolu ke fakatata lahi atu ki a ia. To lagomatai he matakutaku mahani Atua a tautolu ke fanogonogo ke he fakatonuaga pulotu ne fakamau he Tau Fakatai 3:6: “Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” Ko e heigoa e kakano he mena ia?
14, 15. (a) Ko e heigoa falu fifiliaga ne fehagai a tautolu ki ai he tau momoui he tau aho oti? (e) Maeke fefe a tautolu ke taute e tau fifiliaga ke he puhala ne fakaata e matakutaku mahani Atua ha tautolu?
14 Kua lata ia koe ke taute e tau fifiliaga he tau aho oti, tau fifiliaga lalahi mo e ikiiki. Ke tuga anei, ko e heigoa ka tutala a koe mo e hau a tau kapitiga gahua, tau kapitiga aoga, mo e tau katofia ki ai? (Luka 6:45) To fakailoilo nakai a koe ke he tau matagahua ne fakatoka i mua hau, po ke kumi e koe taha puhala ke fakaoti fakamafiti aki ai? (Kolose 3:23) To fakatata lahi atu nakai a koe ki a lautolu ne tote po ke nakai fakakite e fakaalofa ki a Iehova, po ke lali nakai a koe ke fakamalolo e tau fakafetuiaga hau mo e tau tagata loto fakaagaga? (Tau Fakatai 13:20) Ko e heigoa ka taute e koe, pete ni ke he tau puhala ikiiki, ke fakatolomaki e tau mena he Kautu he Atua? (Mataio 6:33) Kaeke kua takitaki he tau matapatu fakaakoaga faka-Tohiaga Tapu pihia tuga ne tohi mai e tau fifiliaga hau he tau aho oti, kua mailoga moli e koe a Iehova ke he “hāu a tau puhala oti.”
15 Ti tuga ia, fakalataha mo e tau fifiliaga takitaha ne taute e tautolu, kua lata a tautolu ke takitaki he manatu nei: ‘Ko e heigoa la ne manako a Iehova ke taute e au? Ko e heigoa la e puhala ka fiafia lahi a ia ki ai?’ (Tau Fakatai 27:11) Ke fakakite e matakutaku mahani Atua he puhala nei ko e puhala mitaki ue atu ke fakakite e fakaalofa ha tautolu ma Iehova. To omoi foki he matakutaku mahani Atua a tautolu ke tumau ke loto mea—he tuaga fakaagaga, tau mahani, mo e fakatino. Manatu, i loto he kupu tohi taha ia ne fakamafana e Iakopo e tau Kerisiano ke “fakatata atu a mutolu ke he Atua,” ne tomatoma foki e ia: “Ko e tau tagata hala na e, kia holoholo a ha mutolu a tau lima, ko mutolu, ko e tau tagata lotolotoua kia fakamea ha mutolu a tau loto.”—Iakopo 4:8.
16. He foaki ki a Iehova, ko e heigoa ka nakai iloa katoatoa e tautolu, ka ko e heigoa ka kautu tumau a tautolu ke taute?
16 Haia, ke fakakite e fakaalofa ha tautolu ma Iehova kua nakai kuenaia ke kalo mai he tau mena kelea. Kua omoi foki he fakaalofa a tautolu ke taute e tau mena hako. Ke tuga anei, maeke fefe ia tautolu ke tali atu ke he fakamokoi mua ue atu ha Iehova? Ne tohia e Iakopo: “Ko e tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki, mai luga e tau mena ia, kua hifo mai mai he Matua he maama.” (Iakopo 1:17) Moli, he magaaho ka foaki e tautolu e tau koloa ha tautolu ki a Iehova, kua nakai pehe ke fakakoloa e tautolu a ia. Ha ko e tau koloa mo e tau mena oti ko e hana ni. (Salamo 50:12) Mo e he magaaho ka foaki e tautolu e tau magaaho mo e malolo ha tautolu ki a Iehova, kua nakai fakapuke e tautolu e manako ne kua fita he maeke ia ia. Pihia foki ka nakai mahalo a tautolu ke fakamatala e tala mitaki he Kautu he Atua, kua maeke ia ia ke fakaaoga e tau maka ke fakapuloa! Ti ko e ha, mogoia, ne foaki ki a Iehova e tau koloa ha tautolu, tau magaaho, mo e malolo? Ke taute pihia kua fakakite e tautolu e fakaalofa ha tautolu ki a ia fakalataha mo e loto, solu, manamanatuaga, mo e malolo katoa.—Mareko 12:29, 30.
17. Ko e heigoa ka omoi a tautolu ke foaki fakamakai ki a Iehova?
17 He magaaho ka foaki e tautolu ki a Iehova, kua lata ia tautolu ke taute mo e fiafia, “ha kua fakaalofa e Atua kia ia kua foaki mo e fakamakai.” (2 Korinito 9:7) Ko e matapatu fakaakoaga ne fakamau ia Teutaronome 16:17 ka lagomatai a tautolu ke foaki fakamakai: “Kia takitaha e tagata ke lata mo e tau mena ha ha ia ia, ke lata mo e monuina kua foaki mai ai e Iehova hau a Atua kia koe.” He magaaho ka manamanatu a tautolu ke he puhala ne fakamokoi mai a Iehova ki a tautolu, kua logona e tautolu e manako ke foaki fakamakai ki a ia. Ko e tau foakiaga pihia kua fakafiafia aki e loto hana, tatai ai ke he mena fakaalofa tote mai he tama fakahele ne fakafiafia aki e matua. He fakakite e fakaalofa ha tautolu ke he puhala nei ka lagomatai a tautolu ke fakatata lahi atu ki a Iehova.
Ati Hake e Fakafetuiaga Tata Lahi he Puhala he Liogi
18. Ko e ha ne mitaki ai ke manamanatu ke he puhala ke fakatolomaki aki e aoga he tau liogi ha tautolu?
18 Ko e tau magaaho ne liogi fakatagata ai a tautolu nukua foaki ki a tautolu e magaaho aoga lahi—tau magaaho ma e tutala tokoua ni mo e mena galo ke he ha tautolu a Matua he lagi. (Filipi 4:6) Ha ko e liogi ko e puhala ne mua atu e aoga ke fakatata lahi atu ke he Atua, kua mitaki lahi ke fakamanou mo e manamanatu ke he aoga he ha tautolu a liogi. Nakai ke pehe kua lata e tau liogi ke iloilo mo e pulotu lahi e tau fakatutalaaga, ka kua lata ni ke talahau fakamoli mai he loto. Maeke fefe a tautolu ke fakatolomaki e aoga he tau liogi ha tautolu?
19, 20. Ko e ha kua lata ke manamanatu fakahokulo fakamua to liogi a tautolu, mo e heigoa falu matakupu kua latatonu ma e manamanatu fakahokulo pihia?
19 Liga lata ia tautolu ke lali ke manamanatu fakahokulo fakamua ato liogi a tautolu. Kaeke manamanatu fakamua a tautolu, kua maeke ia tautolu ke talahau fakatonu mo e fai kakano e tau liogi ha tautolu, ati kalo mai he fatiaki tumau e tau alaga kupu ne mahani ki ai mo e mautali ke mafuta hake ke he manamanatuaga. (Tau Fakatai 15:28, 29) Liga kia manamanatu ke he falu mataulu tala ne totoku e Iesu he hana a liogi fakatai ti manamanatu ke he puhala ne hagaao ai e tau mena nei ke he ha tautolu ni a tau tutuaga ka liga lagomatai. (Mataio 6:9-13) Ke fakatai ki ai, liga huhu na tautolu ki a tautolu ni ko e heigoa e vala tote kua amanaki a tautolu ke taute ke he finagalo ha Iehova he lalolagi nei. Liga talahau nakai e tautolu ki a Iehova e manako ha tautolu ke fai fakaaogaaga ki a ia ke he mena kua lata mo e ole lagomatai ki a ia he taute ha kotofaaga ni ne foaki mai e ia ki a tautolu? Kua mamafa kia a tautolu he tau kapaletu hagaao ke he tau manako koloa ha tautolu? Ko e heigoa e tau hala ha tautolu ne lata ke fakamagalo, mo e ki a hai kua lata ia tautolu ke fakamagalo fakalahi atu ki ai? Ko e heigoa e tau kamatamata ne fakamatematekelea aki a tautolu, mo e mailoga nakai e tautolu kua mafiti lahi e manako ha tautolu ma e puipuiaga ha Iehova hagaao ke he tau mena ia?
20 Lafi ki ai, liga manatu e tautolu e tau tagata ne iloa e tautolu kua lata pauaki ma e lagomatai ha Iehova. (2 Korinito 1:11) Ka kia nakai nimo, ke foaki e tau fakaaue. Kaeke fakamanou a tautolu mo e manamanatu hagaao ki ai, maeke ia tautolu ke mailoga e tau kakano ke fakaaue ki a Iehova mo e fakaheke ki a ia he tau aho takitaha ma e tau mitaki loga hana. (Teutaronome 8:10; Luka 10:21) Kua fai aoga foki ka lafi mai he taute pihia—kua maeke ke lagomatai a tautolu ke moua e onoonoaga mitaki mo e fakaaueina he moui.
21. Ko e fakaako ke he tau fakafifitakiaga faka-Tohiaga Tapu fe ka liga lagomatai a tautolu ka o atu a tautolu ki a Iehova he liogi?
21 Maeke foki he kumikumi ke fakatolomaki e tau liogi ha tautolu. Ha ha ai e tau liogi mitaki lahi he tau tane mo e tau fifine tua fakamoli ne fakamau i loto he Kupu he Atua. Ke tuga anei, kaeke fehagai a tautolu mo e lekua uka lahi nukua fakatupetupe ki a tautolu mo e ke fakamatakutaku foki e tau momoui ha tautolu po ke he tau fakahele ha tautolu, liga totou a tautolu ke he liogi ha Iakopo hagaao ke he feleveiaaga hana i mua mo e hana taokete vale, ko Esau. (Kenese 32:9-12) Po ke liga kumikumi a tautolu ke he liogi ne totoku he Patuiki ko Asa he magaaho ne fakamatakutaku he matakau Aitiope ne kavi ke taha e miliona e tau tagata he Atua. (2 Nofoaga he Tau Patuiki 14:11, 12) Kaeke tupetupe a tautolu ke he lekua ne fakanekeneke ke tamai e kelea ke he higoa mitaki ha Iehova, kua lata mogoia ke mailoga e liogi ha Elia ki mua he tau tagata tapuaki ha Paala he Mouga ko Karamelu, ke tuga e liogi ha Nehemia hagaao ke he tuaga kelea muikau i Ierusalema. (1 Tau Patuiki 18:36, 37; Nehemia 1:4-11) He totou mo e manamanatu fakahokulo ke he tau liogi pihia ka fakamalolo e tua ha tautolu mo e foaki mai ki a tautolu e tau manatu ke he puhala fe kua mitaki lahi ke o atu ki a Iehova mo e tau kapaletu ne fakamamafa aki a tautolu.
22. Ko e heigoa e lauga he tau ma e 2003, mo e heigoa ka liga huhu ne tautolu ki a tautolu he falu magaaho ke he magahala he tau katoa?
22 Maaliali ai, kua nakai fai lilifu lahi mahaki, nakai fai foliaga tokoluga foki, ka ke omaoma ni e fakatonuaga ha Iakopo ke “fakatata atu a mutolu ke he Atua.” (Iakopo 4:8) Kia taute pihia e tautolu he fakatupu ki mua e iloilo ha tautolu ke he Atua, he lali ke fakakite fakalahi atu e fakaalofa ha tautolu ki a ia, mo e he ati hake e fakafetui tata lahi mo ia he tau liogi ha tautolu. Ke he tau katoa he 2003, he mauloto e tautolu e Iakopo 4:8 ko e lauga he tau, kia tumau a tautolu ke kumikumi hifo ki a tautolu ni nukua fakatata lahi moli atu nakai a tautolu ki a Iehova. Ka e kua, mogoia, e vala fakamui he fakamauaga ia? Ko e kakano fe ka “fakatata mai ai a [Iehova] kia mutolu,” ti heigoa e tau monuinaaga ka tamai? Ko e vala tala ne mui mai ka fakatutala ke he mena nei.
Manatu Nakai e Koe?
• Ko e ha kua kakano lahi ke fakatata lahi atu ki a Iehova?
• Ko e heigoa e falu foliaga ka liga fakatokatoka e tautolu ke kia iloa a Iehova?
• Fakatata fefe e tautolu kua fakaalofa fakamoli a tautolu ki a Iehova?
• Ko e tau puhala fe ka liga ati hake e tautolu e fakafetui kua mua ue atu mo Iehova he liogi?
[Tau Huhu he Fakaakoaga]
[Blurb he lau 12]
To eke e lauga he tau ma e 2003 ko e: “Kia fakatata atu a mutolu ke he Atua, ti fakatata mai ai a ia kia mutolu.”—Iakopo 4:8.
[Fakatino he lau 9]
He motua fakahaga, ne hokotia a Samuela ke iloa lahi a Iehova
[Fakatino he lau 12]
Ko e liogi ne totoku e Elia he Mouga ko Karamelu ko e fakafifitakiaga mitaki ma tautolu