Mavehe e Atua ke he perofeta ko Aperahamo to taha mai he tau fanau haana ka tamai e tau monuina ke he “tau motu oti kana he lalolagi.” (Kenese 22:18) Ko hai a ia?

Kavi ke he 2,000 tau kua mole, foaki he Atua e malolō ki a Iesu, ko ia e tama ne tupu mai he ohi a Aperahamo ke taute e tau mana lalahi. Fakakite mai he tau mana ia ko e maveheaga ki a Aperahamo to hoko mai ke he tau motu he puhala ia Iesu.​—Kalatia 3:14.

Ko e tau mana ne taute e Iesu kua lagomatai ke kitia ko ia kua fifili he Atua ke fakamonuina e tau tagata oti kana, mo e fakakite foki he tau mana ia e puhala ka fakaaoga he Atua a ia ke fakamonuina tukulagi e tau tagata oti kana. Mailoga e puhala kua fakakite he tau mana ha Iesu e falu aga mitaki haana.

Fakaalofa hohofi​—Fakamaulu e Iesu e tau tagata gagao.

Lagataha ne ole e lepela ki a Iesu ke fakamaulu a ia. Piki atu a Iesu ki a ia mo e pehē: “Mena loto au ki ai.” Ne maulu agataha e gagao lepela.​—Mareko 1:40-42.

Fakamokoi​—Fagai e Iesu e tau tagata ne hoge.

Nakai manako a Iesu ke ō hoge e tau tagata. Lagaloga e fagai e Iesu e tau tagata tokoafe he fakaloga e tau areto mo e tau ika ikiiki gahoa. (Mataio 14:17-21; 15:32-38) He oti e kai, ne mamakona e tau tagata oti ti loga agaia e mena kai ne toe.

Fakaalofa hofihofi noa​—Fakaliu tu mai e Iesu a lautolu ne mamate.

He “fakaalofa hohofi,” ne fakaliu tu mai e Iesu e tama taane ne tokotaha ni he fifine takape ne momoko ti nakai fai tagata foki ke leveki a ia.​—Luka 7:12-15.