TAU VALA TALA I MUA | PUHALA KE AOGA LAHI MAI HE TOTOUAGA HE TOHI TAPU
Ko e Heigoa ka Fakalagalaga e Fiafia?
Ahumate kia po ke atihake? To fēfē e totouaga he Tohi Tapu ki a koe? Fakavē ni ke he puhala ne totou e koe. Kitekite la ke he tau mena ka taute e koe ke fakalahi e fiafia haau ki ai.
Fifili e fakaliliuaga he vagahau kua hako mo e foou. Ka totou e koe e tohi ne loga e tau kupu uka po ke tuai ne nakai iloa e koe, to liga nakai fiafia a koe he totou ai. Ko e mena ia kia kumi e Tohi Tapu ne mukamuka ke maama e vagahau ne tohi aki mo e hokotia ke he loto haau. Ka e he magaaho taha, kua lata ke hako mo e mitaki e fakaliliuaga. *
Fakaaoga e tau matini hila foou. He vahā nei kua lolomi e Tohi Tapu mo e moua foki ke he puhala digital. Maeke falu Tohi Tapu ke totou he initanete po ke moua mai ke totou ni he tagata he tau komopiuta, tau tepelete, po ke tau selafoni. Falu Tohi Tapu ne ha ha ai foki e tau puhala kua maeke a koe ke fakakia mafiti e tau kupu he taha Tohi Tapu foki he vala tala ia po ke fakatatai e tau fakaliliuaga loga. Ka manako a koe ke fanogonogo ki ai ka e nakai totou, kua fai tapakiaga foki e Tohi Tapu. Tokologa ne fiafia ke fanogonogo ki ai ka heke he tau peleōafi, unu mena, po ke taute falu gahua ne maeke ke fanogonogo ki ai. Fakaaoga e puhala kua felauaki mitaki mo koe.
Fakaaoga e tau koloa fakaako Tohi Tapu. Maeke he tau koloa fakaako Tohi Tapu ke lagomatai a koe ke aoga lahi mai he totouaga haau. Ha ha i ai e tau mepe ke he tau matakavi he Tohi Tapu ka lagomatai a koe ke moua e tau matakavi he totouaga haau mo e iloa katoa e tau mena tutupu. Ko e tau vala tala tuga i loto he mekasini nei po ke he “Bible Teachings” he faahi kupega hila jw.org, ka lagomatai a koe ke kumikumi e kakano he tau vala tala he Tohi Tapu.
Hikihiki e puhala haau. Ka tuga ko e matagahua makimaki e totou e Tohi Tapu katoa, he ha he kamata ke totou e vala ne omoomoi pauaki ki a koe? Ka manako a koe ke iloa e tau tagata mahuiga he Tohi Tapu, liga lali a koe ke totou e tau tala ne fakavē ke he tau tagata. Ko e fakataitaiaga he puhala ia i loto he puha “ Kumikumi ke he Tohi Tapu ke Iloa e Tau Tagata i Loto.” Po ke manako a koe ke totou ke he tau matakupu he Tohi Tapu po ke fakapapahiaga he tau mena ne tutupu. Lali ke fakaaoga e taha he tau puhala nei.
^ para. 4 Tokologa ne mailoga ko e New World Translation of the Holy Scriptures kua hakotika, falanaki ki ai, mo e mukamuka lahi foki ke totou. Ko e Tohi Tapu nei ne taute he Tau Fakamoli a Iehova, kua moua ai ke he molea e 130 e vagahau. Maeke a koe ke moua e lagaki mai he faahi kupega hila jw.org po ke moua mai he JW Library app. Po ke ka manako a koe, maeke e Tau Fakamoli a Iehova ke ta atu e lagaki ke he kaina haau.
