MA E TAU HOA
1: Maveheaga
KO E KAKANO
Ko e tau taane mo e tau hoana kua taute e maveheaga ke he fakamauaga ha laua kua onoono ki ai ko e pipiaga tumau, ti feaki e logonaaga haohao mitaki he vahāloto ha laua. Igatia e taane mo e hoana mo e mauokafua to tumau e fakamauaga ha laua pete e tau magaaho uka.
Falu hoa ne fakaohooho ke nonofo tumau ha ko e peehiaga he tau kapitiga po ke magafaoa. Ka e mua atu e maveheaga ne fakavē ke he fefakaalofaaki mo e fefakalilifuaki.
MATAPATU FAKAAKOAGA HE TOHI TAPU: “Aua foki neke mavehe e tane mo e hana hoana ni.”—1 Korinito 7:11.
“Ka taute e koe e maveheaga ke he fakamauaga haau to nakai mafiti a koe ke ita. Kua mafiti a koe ke fakamagalo mo e mafiti ke fakamolemole. Onoono a koe ke he tau lekua ko e tau mena vihi ka e nakai ko e tau mena ke tau vevehe.”—Micah.
KAKANO NE AOGA
Ka fehagai mo e tau lekua, ko e tau hoa ne nakai fai maveheaga kua liga fakahiku, ‘Nakai tatai a maua’ ti kumi puhala ke fakaoti e fakamauaga.
“Tokologa e tagata ne mau kua iloa kaeke ke nakai kautū e fakamauaga ha laua ti tau vevehe a laua. Ka fai taane mo e fai hoana e tau tagata kua fitā a lautolu he manamanatu ke he tau vevehe, ti ko e maveheaga ha lautolu kua hepe mai ni he kamataaga.”—Jean.
MENA KE TAUTE E KOE
MANAMANATU HIFO
Ka uhouho he taufetoko . . .
-
Logona hifo kia e koe kua tokihala a koe he mau ke he hoa haau?
-
Kua mohemiti kia a koe ke he tagata kehe foki?
-
Talahau kia e koe e tau mena tuga e “Tiaki fai e au a koe” po ke “Fano fai au ke kumi e taha tagata ne loto fakaaue ki a au”?
Ka tali a koe ē ke he taha po ke loga he tau hūhū ia, ko e magaaho anei ke fakamalolō e maveheaga haau.
TUTALA MO E HOA HAAU
-
Kua tote hifo kia e tuaga he maveheaga he fakamauaga ha taua? Ka pihia, ko e ha?
-
Ko e heigoa e tau lakaaga ka taute e taua mogonei ke fakamalolō e maveheaga ha taua?
TAU PUHALA
-
Tohi tumau e lautohi fakaalofa ke he hoa haau
-
Fakakite e maveheaga haau he fakatū e tau ata he hoa haau he laulau haau he gahuaaga
-
Matutaki atu ke he hoa haau he tau aho takitaha kaeke ko koe he gahuaaga po ke he taha matakavi
MATAPATU FAKAAKOAGA HE TOHI TAPU: “Ko ia kua fakalataha he Atua, aua neke vevehe he taha tagata.”—Mataio 19:6.
