Kan nimonechkowaj, yej tayaka̱naj ayá̱ tataniáj. Ijkó̱n ken mochi̱waya kua̱ tsi̱ntiʼ tanechko̱lis cristiana, yej kita̱liáj iga matayaka̱nakan yawij yej welij makima̱nawi̱kan itanechko̱lis Dios (Hechos 20:28). Ini̱nmej tajta̱gamej kipiáj miak fe pan Dios, yejeme̱n kiyaka̱naj wan kima̱nawiáj tanechko̱lis ken kijtowa Biblia: «Amo xiktejteki’chi̱wakan (o iga mitschaltiáj), sino xiyo̱lpa̱kikan iga xikchi̱wakan ijkó̱n ken Dios kineki. Wan amo xiki̱xtilijnekikan tomin sinoke xikchi̱wakan iga ankinekij» (1 Pedro 5:1-3). ¿Kén te̱pale̱wiáj?

Te̱manawiáj. Yej tayaka̱naj kiojkuiltiáj tanechko̱lis wan kima̱nawiáj iga amo mamowejkatili̱kan de Dios. Yejeme̱n kimatij iga Dios kimaʼ iní̱n ye̱kti tekipanol, inó̱n iga ayá̱ te̱ijliáj matikchi̱wakan yej yejeme̱n kinekij, sino te̱pale̱wiáj iga matiye̱ʼonokan wan matipa̱kikan (2 Corintios 1:24). Ijkó̱n ken se̱ pastor kima̱nawiá sejse̱ de iovejas, yej tayaka̱naj motekitiliáj iga maki̱xmatikan nochi tokni̱wan yej onokej pan itanechko̱lis Dios (Proverbios 27:23).

Te̱nextiliáj matikchi̱wakan yej Dios kineki. Cada semana, yej tayaka̱naj kipano̱ltiáj tamachtilismej pan tanechko̱lis, iní̱n te̱pale̱wiá iga matikpiakan ma̱j fe (Hechos 15:32). Ini̱nmej tajta̱gamej te̱ijliáj kan matitajto̱lmoya̱wakan wan te̱nextiliáj kén matikchi̱wakan, wan no̱ tajto̱lmoya̱waj wan nejeme̱n.

Te̱yolketsaj sejse̱ de tejeme̱n. Iga welij matonokan ma̱j ina̱ Dios, yej tayaka̱naj te̱paxa̱lowiliáj pan tocha̱n wan tajtowaj wan tejeme̱n pan Kajli kan timonechkowaj. Yejeme̱n no̱ te̱pale̱wiáj wan te̱yo̱ltaliáj kua̱ te̱tajto̱ltiliáj la Biblia. (Santiago 5:14, 15).

Yej tayaka̱naj aya̱san tapale̱wiáj pan tanechko̱lis, yejeme̱n no̱ tekipanowaj wan kipiáj se̱ familiaj yej moneki makimakakan te̱ yejeme̱n kinekij. Moneki matikye̱ʼitakan ini̱nmej tokni̱wan iga pux tekipanowaj (1 Tesalonicenses 5:12, 13).

• ¿Kén tapale̱wiáj yej tayaka̱naj pan tanechko̱lis?

• ¿Kén kine̱xtiáj iga te̱nekij cada sejse̱ de tejeme̱n?