Yej tajto̱lmoya̱waj de Jehová moi̱xmatij iga tamachtiáj pan Biblia. Inó̱n iga, onoʼ escuela iga los precursores. Ompa momachtiáj kén maye̱ʼtajto̱lmoya̱wakan (2 Timoteo 4:5).

Escuela del Servicio de Precursor. Iní̱n se̱ escuela de seis días iga precursores regulares wan wel mochi̱wa pan se̱ Kajli kan Monechkowaj yej Tajto̱lmoya̱waj de Jehová. Welij yawij yej kipiájya se̱ xiwiʼ iga precursores. Ompa kipale̱wiáj iga maonokan ma̱j ina̱ Jehová, wan iga wel maye̱ʼtajto̱lmoya̱wakan wan iga amo makikajte̱wakan iní̱n tekipano̱lis.

Escuela iga Evangelizadores del Reino. Iní̱n escuela de o̱me meses iga chokomej, takomej wan iga yej na̱miktitokej. Ompa wel yawij yej kipiáj 23 a 65 xiwi’, wan yej kiwi̱gaj miak xiwiʼ iga precursores wan yej kinekij matapale̱wi̱ti pan seuʼ a̱ltepe̱ʼ kan moneki ma̱j yej tajto̱lmoya̱waj. Wan yejeme̱n ken kua̱ kijtowaj: «¡Nigaj nono’! Nej xine̱ti̱tani (o xine̱ojmaga)», ijkí̱n kichi̱waj ken Jesucristo yej wa̱laj pan Ta̱jli (Isaías 6:8; Juan 7:29). Kua̱ yawij seuʼ la̱j, anka moneki makikajte̱wakan sekin tejté̱ wan mamomatikan pan seuʼ a̱ltepe̱ʼ, seuʼ clima wan makikua̱kan takual yej aki̱xmatij. Anka moneki no̱ iga mamomachti̱kan seuʼ tajto̱l. Pan iní̱n escuela momachtiáj cualidades espirituales yej kipale̱wiskej kua̱ maya̱kan pan seuʼ a̱ltepe̱ʼ. Kimachtiskej iga wel ma̱j maye̱ʼtekipanokan iga Jehová wan iga ia̱ltepe̱ʼ.

Escuela Bíblica de Galaad de la Watchtower. Galaad kijto̱sneki pan hebreo «komati temej yej kine̱xtiá tejté̱». Iní̱n escuela tsi̱ntiʼ pan 1943. Desde inó̱n xiwiʼ, ma̱j de 8.000 yej momachtijkej pan iní̱n escuela tekipanowaj ken misioneros wan nemi tajto̱lmoya̱waj pan nochi Ta̱jli (Hechos 13:47). Kua̱ achto asikej los misioneros pan Perú, áya onoya nise̱ tanechko̱lis, wan a̱man onoʼ ma̱j de 1.000. Wan kua̱ asikej Japón, onoya menos de 10 yej tajto̱lmoya̱waj, wan a̱man onoʼ ma̱j de 200.000. Pan cinco meses, moye̱ʼmachtiáj Itajto̱l Dios wan momachtiáj kén makipale̱wi̱kan wan makiyo̱lketsakan tanechko̱lismej iga matajto̱lmoya̱wakan pan nochi Ta̱jli. Wel yawij ompa precursores especiales, misioneros, yej tayaka̱naj de circuito o yej tekipanowaj pan Betel.

• ¿Té íga mochi̱wa Escuela del Servicio de Precursor?

• ¿A̱ʼ yéj wel yawij pan Escuela iga Evangelizadores del Reino?