Ipan Biblia onotekitilti tlajtojli “yoliuilistli” para notlajtolkuepas tlajtojli ika griego anástasis, niman yejuin tlajtojli kijtosneki “oksejpa xmotelketsa noso xmokuiteua”. Ijkuak kiyolitiaj yakaj, oksejpa nokuiteua niman tlanemilia niman kichiua ijkon ken ijkuak ximikiya (1 Corintios 15:12, 13).

 Ipan Tlajkuiloltin Hebreas noso Antiguo Testamento xuajnestiuj tlajtojli yoliuilistli. San ika, kema kijtoua ika uelis yoliuiskej akin yomijkej. Teotlajtoketl Isaías okijkuilo yejuin: “Pero on yejuan motlapejpeniluan yejuan mikij, oksejpa nemiskej; maski yomikaj oksejpa yoliuiskej” (Isaías 26:19; Job 14:13-​15; Daniel 12:​2, 13).

 ¿Kanon yoliuiskej akin yomijkej? Sekimej yoliuiskej iluikak para tekiuajtiskej iuan Cristo (2 Corintios 5:1;Apocalipsis 5:​9, 10). Biblia kijtoua ika akin yoliuiskej iluikak, yejuamej akin “achtoj yoliskej niman nokuiteuaskej”. Yejuin techititia ika sakin, oksekimej noijki yoliuiskej (Apocalipsis 20:6). Niman on akin sakin kinyolitiskej, yoliuiskej nikan ipan tlaltikpaktli (Salmo 37:29).

 ¿Kenon yoliuiskej akin yomijkej? ToTajtsin yokimakak kojtilistli Jesús para makinyoliti akin yomijkej (Juan 11:25). Jesús kitekitiltis yejuin kojtilistli para kinyolitis nochimej akin nemij ipan tlalkontli. Niman akin yoliuiskej oksejpa tlanemiliskej niman kilnamikiskej tlen kichiuayaj achto mikiskiaj (Juan 5:​28, 29). Akin yoliuiskej ne iluikak, xok kipiyaskej itlalnakayo ken tejuamej, pampa yejuamej yoliuiskej ken espíritus. San ika, akin yoliuiskej ipan tlaltikpaktli, oksejpa kipiyaskej intlalnakayo ken kipiayaj, san ika, xok kualoskej (Isaías 33:24; 35:​5, 6; 1 Corintios 15:42-​44, 50).

 ¿Akinomej yoliuiskej? Biblia kijtoua ika ipan tlaltikpaktli “yoliuiskej nochimej yejuan yolmelajkej niman on yejuan xyolmelajkej” (Hechos 24:15). Niman intech on yolmelajkej akin yoliuiskej nemiskej Noé, Abrahán niman Sara (Génesis 6:9; Hebreos 11:11; Santiago 2:​21). Niman intech on xyolmelajkej nemiskej akin xkeman okixmatkej Jehová niman xouel okitlakamatkej.

 Aman tej, akin xkinekij kitlakamatiskej toTajtsin niman xkinekij nopatlaskej, xkeman yoliuiskej. Yejuamej mikiskej para nochipa (Mateo 23:33; Hebreos 10:26, 27).

 ¿Kemanon yoliuiskej akin yomijkej? Biblia yokijtojka ika tlapejpeniltin peuaskej yoliuiskej ijkuak Cristo peuaskia tekiuajtis ne iluikak niman yejua opeuj tekiuajti ipan 1914 (1 Corintios 15:21-​23). Niman akin yoliuiskej nikan, peuaskej yoliuiskej ijkuak Jesús peuas tekiuajtis mil xiuitl chika tlaltikpaktli nokuepa se xochitlalpan (Lucas 23:43; Apocalipsis 20:​6, 12, 13).

 ¿Tleka uelis tikneltokaskej ika yoliuiskej akin yomijkej? Biblia tlajtoua itech chiknauimej akin okinyolitijkej niman noijki kijtoua ika teixpan okinyolitijkej (1 Reyes 17:17-​24; 2 Reyes 4:​32-​37; 13:20, 21; Lucas 7:​11-​17; 8:​40-​56; Juan 11:38-​44; Hechos 9:​36-​42; 20:​7-​12; 1 Corintios 15:​3-6). Temojkatlachialti ken Jesús okiyoliti Lázaro, yejua ikipiaya naui tonajli ika yomijka niman Jesús teixpan okiyoliti (Juan 11:39, 42). Itlauelikniuan Jesús xouel okijtojkej ika yejuin xmelauak opanok niman hasta kinekiyaj kimiktiskiaj Jesús niman Lázaro (Juan 11:47, 53; 12:​9-​11).

 Biblia kijtoua ika toTajtsin uelis kinyolitis akin yomijkej. ToTajtsin xkilkaua kenon katkaj ikoneuan achto mikiskej. Niman pampa yejua melak kojtik, xitlaj uelis kitsakuilis makinyoliti (Job 37:23; Mateo10:30; Lucas 20:37, 38). San ika, yejua xsan uelis kinyolitis akin yomijkej, yejua kineki kinyolitis. Biblia techijlia kenon nomachilis toTajtsin ijkuak kinyolitis akin nemiskej ipan yejuin tlaltikpaktli: “Niman tinechitas ikan tetlajsojtlalistli pampa tejua otinechchijchiu” (Job 14:15).

Tlen sekimej kinemiliaj itech yolseuilistli

 Tlen sekimej kinemiliaj: Ijkuak yakaj yoliui ialma tlen xueli miki oksejpa nosetilia iuan itlalnakayo.

 Tlen melauak: Biblia techititia ika akin miki xkipiya se alma tlen ok yoltika (Eclesiastés 9:5, 10). Kuakon, ijkuak yakaj kiyolitiaj xkijtosneki tla ialma oksejpa kisetilia iuan itlalnakayo, yej kijtosneki ika akin omijka, oksejpa nemi ijkon ken nemiya achto mikiskia.

 Tlen sekimej kinemiliaj: Miyekej akin yoliuiskej oksejpa nimantsin kinpopoloskej.

 Tlen melauak: Biblia kijtoua ika “on yejuan okichijkej tlen xkuajli, yoliskej niman nokuiteuaskej para kintlajtlakolmakaskej” (Juan 5:​29). Aman tej, yejuamej kintlajtlakolmakaskej ipampa tlen kichiuaskej sakin ika yokinyolitijkej niman xipampa tlen okichiujkej achto mikiskiaj. Jesús okijto: “On mikatsitsimej kakiskej notlajtol nejua yejuan niiKoneu Dios, niman on yejuan kitlakamatiskej nemiskej” (Juan 5:​25). Tla akin yoliuiskej kikakij itlajtol Cristo noso kichiuaj tlen yejua kinnauatia, intokayo notlaliskej ipan amoxtli tlen kijtoua akinomej kipiyaskej nemilistli (Apocalipsis 20:12, 13).

 Tlen sekimej kinemiliaj: Akin yoliuij oksejpa kipiyaj intlalnakayo ijkon ken kipiayaj achto mikiskiaj.

 Tlen melauak: Ijkuak yakaj miki, itlalnakayo ijtlakaui niman nokuepa tlajli (Eclesiastés 3:​19, 20).