Teueuentsin niman tesiuatsin akin kichiuaj ijkon ken yokijtokej, nochipa kitaj kenon san sekan nemiskej niman yejon kichiua ika kuajli manomachilikan. Pampa kuajli kimatstokej yejuin, maski san tlenon kixnamikiskej, nochipa san sekan nemiskej.

Sekimej akin yononamiktijkej san sekan nemij pampa infamilia niman inamigos ijkon kinchiualtiaj. San ika, más kuajli yeskia tla san sekan nemiskiaj pampa notlasojtlaj niman notlakaitaj.

TLEN BIBLIA KIJTOUA: “On tlakatl maka ma nokakaua […] iuan isiuau” (1 Corintios 7:11).

“Tla tikchiua tlen otikijto ijkuak otimonamikti, mitspaleuis maka nimantsin xkualani. Noijki mitspaleuis xtetlapopolui niman xtetlajtlanili mamitstlapopoluikan. Niman, maski onias tlauejli, nemejuamej san sekan ninnemiskej” (Micah).

Tla akin yononamiktijkej xkichiuaj ken yokijtokej, kuakon, ijkuak onias tlauejli uelis kinemiliskej ika xnasikamatij niman kitejtemoskej kenon nokauaskej.

“Miyekej kinemiliaj ika uelis nonamiktiskej niman sakin nokauaskej. Tla tiknemilia ijkon tikchiuas, kijtosneki ika xkeman otiknemili tikchiuas ken otikijto” (Jean).

XMOTLAJTOLTI YEJUIN

¿Tlenon tikchiua ijkuak timokualania iuan moixnamik?

• ¿Tiknemilia ika xkuajli pampa otimonamikti?

• ¿Tiknemilia ika más kuajli yeskia tla timonamiktiskia iuan okse?

• ¿Tikijtoua itlaj ken yejuin: “Nimitskauas” noso “niktejtemos okse akin más manechtlasojtla”?

Tla tikijtoua ika kema noso ijkon tiknemiliani, kuakon noneki más timokojtilis tikchiuas ken yotikijto.

SAN SEKAN XMOTLAJTOLTIKAN YEJUIN:

• ¿Xok tikchiujtokej tlen yotikijtokaj? Tla ijkon, ¿tleka?

• ¿Tlenon techpaleuis niman ijkon tikchiuaskej tlen yotikijtokej?

TLEN UELIS TIKCHIUAS

• Xkijkuilouili se carta moixnamik kampa makijto ika tiktlasojtla.

• Xtlali ifoto moixnamik kampa titekiti noso ipan mocartera.

• Mojmostla xkonnotsa moixnamik ijkuak tinemis ipan motekiyo noso ijkuak oksekan tiauj.

TLEN BIBLIA KIJTOUA: “Se tlakatl xuelis kixelos on tlen Dios okisentlalij” (Mateo 19:6).