1, 2. ¿Tlenon san noijki tikixnamikij tlen okixnamijkej judíos akin onokuepkej Jerusalén? (Xkita recuadro “ Tlen opanok ipan itonaluan Ageo, Zacarías niman Esdras”).

 ¿KEMANTIKA timajmana ipampa tlen uelis panos ika tlayekapan? Kanaj xok tikpiya motekiyo niman xtikmati kenon uelis tikinmakas tlen kinpoloua mochanejkauan noso kanaj tiknemilia ika uelis kimijtlakos tlauejli tlen onka ipampa política. Noso kanaj timajmana pampa mitstlaueltokaj niman mitsixnamikij kampa titenojnotsa. Tla tejua ijkin mopan nochiujtika, melak mitsyolchikauas tikitas kenon Jehová okinpaleui israelitas ijkuak okixnamijkej itlaj ken yejuin.

² Judíos akin youejkaujkaj Babilonia ononek chikauak kipiyaskej intlaneltokil niman ijkon kikauaskej nochi tlen ompa kipiayaj niman yaskej kampa miyekej itech yejuamej nion xtlaixmatiyaj. Sakin ika judíos oajsikej Jerusalén, xkipiayaj tlen ika nopanoltiskej, onkatka tlauejli ipampa política niman noijki intlauelikniuan opeuj kimixnamikij. Miyekej melak ouijtika okitakej tlapaleuiskej manochijchiua iteopan Jehová. Yejua ika, kanaj ipan 520 ijkuak xpeuaya xiuitl 1, Jehová okomintitlan teotlajtokej Ageo niman Zacarías niman ijkon makinyolchikauatij judíos (Ageo 1:1; Zac. 1:1). Ken tikitaskej, tlen okichiujkej yejuin teotlajtokej melak otepaleui. San ika, 50 xiuitl sakin, yejuin judíos oksejpa okikajkaujkej intekiyo. Kuakon, Esdras, se tlakatl akin melak kuajli kijkuilouaya tlanauatijli, onokuep Jerusalén niman ijkon kinyolchikauas niman kinpaleuis makiueyichiuakan Jehová ijkon ken yejua kitlajtlani (Esd. 7:​1, 6).

3. ¿Tlenon tiknankiliskej ipan yejuin tlamachtijli? (Proverbios 22:19).

 ³ Teotlajtoltin tlen okinteneujkej Ageo niman Zacarías, okinpaleui itekipanojkauan toTajtsin akin yeuejkaui onenkej para más matlaneltokakan itech Jehová, maski okixnamijkej tlen ouijtika. Niman noijki uelis techpaleuis tejuamej matitlaneltokakan itech Jehová maski san tlenon tikixnamikiskej (xpoua Proverbios 22:19). Ipan yejuin tlamachtijli tikitaskej tlen toTajtsin okimijli itekipanojkauan itechkopa Ageo niman Zacarías, niman noijki tikitaskej tlen okichiuj Esdras. Ijkon uelis tiknankiliskej yejuin: ¿kenon okimijtlako judíos nochi tlen okixnamijkej sakin ika onokuepkej Jerusalén?, ¿tleka noneki chikauak tiktekichiuiliskej toTajtsin ijkuak tikixnamiktoskej tlen ouijtika? niman ¿tlenon techpaleuis más matitlaneltokakan itech Jehová maski san tlenon tikixnamikiskej?

4, 5. ¿Kanaj tleka judíos xok ika inyojlo kichiuayaj intekiyo?

⁴ Ijkuak judíos oajsikej Jerusalén, ononek kichiuaskej miyek tekitl. Nimantsin opeuj kichijchiuaj tlaixpan kampa kiuentlaliliskej Jehová niman okipeualtijkej teopan (Esd. 3:​1-3, 10). San ika, okikajkaujkej intekiyo. ¿Tleka? Pampa yejuamej xsan yayaj ontlapaleuiayaj kampa kichijchiuayaj teopan, noijki nonekiya kinchijchiuaskej inkaluan, tokaskej niman kintlakualtiskej inchanejkauan (Esd. 2:​68, 70). Noijki, intlauelikniuan opeuj kinemiliaj kenon uelis kinteltiskej niman ijkon maka makichijchiuakan teopan (Esd. 4:​1-5).

⁵ Judíos noijki xkuajli nemiyaj pampa xkipiayaj tlen ika nopanoltiskej niman onkatka tlauejli ipampa política. Ijkuakon, akin tlayekanaya Persia kiyekantoya Jerusalén. Sakin ika omik tekiuaj Ciro ipan 530 ijkuak xpeuaya xiuitl 1, Cambises, akin okitekipatlak okinek kinotlatkitis Egipto. Ijkuak ompa yaya, kanaj isoldados niman yejua opanokej Israel niman okinchiualtijkej judíos makinmakakan atl, tlakuajli niman kampa nokauaskej. Nochi yejuin okichiuj ika judíos makixnamikikan tlen xkuajli. Ijkuak tekiuaj, Darío I, opeuj tekiuajti, miyekej opeuj tlaixnamikij niman opeuj onka tlauejli ipampa política ne Persia. Nochi yejuin okichiuj ika judíos akin yonokuepkaj Jerusalén makitakan ouijtika kinmakaskej tlen kinpoloua inchanejkauan. Yejua ika, sekimej opeuj kinemiliaj ika xinonekiya kiyektlaliskej iteopan Jehová (Ageo 1:2).

6. ¿Tlenon más okixnamijkej judíos, niman tlenon okimijli Zacarías? (Zacarías 4:​6, 7, TNM).

⁶ (Xpoua Zacarías 4:​6, 7, TNM). b Judíos xmás kipiayaj tlen ika nopanoltiskej, kipiayaj tlauejli ipampa política niman intlauelikniuan opeuj kintlaueltokaj. Ipan 522 ijkuak xpeuaya xiuitl 1, intlauelikniuan okichiujkej maka sa makichijchiuakan iteopan Jehová. San ika, Zacarías okimijli judíos ika Jehová kinpaleuiskia ika iespíritu santo niman ijkon matlamikan intekiyo. Ipan 520, tekiuaj Darío okichiuj oksejpa manochijchiua iteopan Jehová, noijki okinmakak seki tomin judíos niman okinnauati tekiuajkej akin nisiuj nemiyaj ika makinpaleuikan (Esd. 6:​1, 6-10).

7. ¿Kenon okinteochiujkej judíos pampa onokojtilijkej kichiuaskej tlen toTajtsin kintlajtlaniliaya?

 ⁷ Itechkopa Ageo niman Zacarías, Jehová okimijli judíos ika tla nokojtiliayaj kichijchiuaskej iteopan, yejua kinpaleuiskia (Ageo 1:​8, 13, 14; Zac. 1:​3, 16). Yejua ika, ipan 520 ijkuak  xpeuaya xiuitl 1, judíos oksejpa opeuj kichijchiuaj teopan niman otlankej san ipan kanaj makuijli xiuitl. Maski okixnamijkej tlen ouijtika, onokojtilijkej kichiuaskej tlen toTajtsin kintlajtlaniliaya. Yejua ika, Jehová okinmakak tlenon ika kichijchiuaskej teopan niman tlenon ika kichikauaskej intlaneltokil. Ijkon, ouel okiueyichiujkej Jehová ika nochi inyojlo (Esd. 6:​14-16, 22).

8. ¿Kenon Ageo 2:4 techpaleuiya kachtopa matikchiuakan tlen toTajtsin kineki? (Noijki xkita nota).

⁸ Tikmatij ika sa achijtsin poliui para yejkos ueyi tlajyouilistli. Yejua ika, melak noneki matikinnojnotsakan oksekimej ijkon ken toTajtsin yotechnauati (Mar. 13:10). San ika, kanaj ouijtika ijkon tikchiuaskej ijkuak xmás tikpiyaj tlen ika topanoltiskej noso ijkuak tekiuajkej xtechkauiliaj matitenojnotsakan. ¿Tlenon techpaleuis chikauak matitenojnotsakan itech iTekiuajyo toTajtsin? Noneki nochipa matikilnamikikan ika “Jehová akin kinyekana akin tlaixnamikij” c touan nemi. Yejua techpaleuis tla kachtopa tikchiuaj tlen kineki niman xsan titlanemiliaj itech tlen tejuamej techpoloua. Kuakon, xnoneki tomojtiskej (xpoua Ageo 2:​4, TNM). d

9, 10. ¿Kenon tokniuj Oleg niman Irina okitakej ika melauak tlen kijtoua Mateo 6:33?

⁹ Matikitakan tlenon ipan onochiuj tokniuj Oleg niman isiuauj Irina, e akin tlapaleuiyaj ken precursores. Sakin ika otlapaleuitoj ipan okse tlanechikojli, xok okipixkej intekiyo pampa ipan inpaís xmás onkatka tomin. Maski ipan  se xiuitl san kemantika kipiayaj tekitl, nochipa okitakej kenijki Jehová niman noijki tokniuan melak okinpaleuijkej. ¿Tlenon okinpaleui matlaxikokan? Oleg, akin kachtopa melak noyolkokouaya, kijtoua: “Opeuj más chikauak titenojnotsaj, yejon otechpaleui matitlanemilikan itech tlen más ueyi kijtosneki”. Chika yejua niman isiuauj kitejtemouayaj tekitl, noijki chikauak tenojnotsayaj.

¹⁰ Se tonajli, sakin ika yotenojnotsatoj, se akin nisiuj chanti kampa yejuamej okimijli ika se inamigo okinkauilito ome bolsas tlen kipiayaj tlakuajli. Yejuin inamigo ijkon okichiuj maski chantiya kanaj 160 kilómetros ika uejka. Oleg kijtoua: “Ipan yejon tonajli oksejpa otikitakej kenon Jehová niman tokniuan akin nemij ipan tlanechikojli najmanaj topampa. Kuajli tikmatstokej ika Jehová xkeman kimilkaua itekipanojkauan, maski tlen tikixnamikij nesi kentla xuelis noyektlalis” (Mat. 6:33).

11. ¿Tlenon techmakas Jehová tla kachtopa tikchiuaj tlen yejua kineki?

¹¹ Jehová kineki matikinpaleuikan oksekimej mamakisakan niman manochiuakan inomachtijkauan Cristo. Ijkon ken otikitakej ipan  párrafo 7, Ageo okinyolchikauj judíos matlamikan makichijchiuakan teopan. Kentla tla kimijliskia oksejpa makipeualtikan makichijchiuakan teopan niman makimilkauakan xiujtin ijkuak xtlaj okichiujkej. Kentla kipopoloskiaj nochi niman oksejpa peuaskiaj. Tla ijkon kichiuayaj, Jehová kinteochiuaskia (Ageo 2:​18, 19). Tejuamej noijki tikmatstokej ika Jehová techteochiuas tla tokojtiliaj tikchiuaskej tlen yejua yotechtlajtlanili.

12. ¿Tleka Esdras niman oksekimej judíos akin iuan oyajkej Jerusalén nonekiya melak chikaujtos intlaneltok?

¹² Ipan 468 ijkuak xpeuaya xiuitl 1, Esdras oyaj desde Babilonia hasta Jerusalén iuan oksekimej judíos. Nonekiya melak chikaujtos intlaneltok niman ijkon yaskiaj. Pampa nejnemiskiaj kampa melak tlatemojtikan niman kitkiyaj miyek oro niman plata tlen oksekimej yokitemakakaj, ueliskiaj nimantsin kintlachtekiliskiaj (Esd. 7:​12-16; 8:31). Niman xsan yejon, noijki ueliskia itlaj kinchiuiliskiaj ne Jerusalén pampa xmiyekej ompa chantiyaj niman tepantin niman puertas xmás kuajli onkatkaj. ¿Kenon tlen okichiuj Esdras techpaleuiya más matitlaneltokakan itech Jehová?

13. ¿Tlenon okipaleui Esdras más matlaneltoka itech Jehová? (Noijki xkita nota).

¹³ Esdras yokitaka kenon Jehová kipaleuiaya ikalpan ijkuak kixnamikiyaj tlen ouijtika. Ipan 484 ijkuak xpeuaya xiuitl 1, ijkuak tekiuaj Asuero otlanauati makinmiktikan nochimej judíos akin nemiyaj Persia, kanaj Esdras chantiya ne Babilonia (Est. 3:​7, 13-15). Ueliskia kimiktiskiaj. Niman ijkuak judíos okimatkej tlen tekiuaj Asuero otlanauati nochimej melak onajmankej, “nosauayaj, chokayaj, ajmankatsajtsiyaj” niman kitlajtlaniliayaj Jehová makinmakixti (Est. 4:3). Matiknemilikan kenon onomachilijkej Esdras niman judíos ijkuak okitakej kenon nochi onopatlak: akin kinemilijtoyaj kinmiktiskiaj judíos yejuamej okinmiktijkej (Est. 9:​1, 2). Tlen Esdras ijkuakon okixnamik, kanaj melak kipaleuiskia ika tlen sakin kixnamikiskia, niman yejon okichiuj más makineltoka ika Jehová nochipa kitlajpiya ikalpan. f

14. ¿Tlenon ouel se tokniuj ijkuak xok kipiaya tekitl?

¹⁴ Ijkuak tikitaj kenon Jehová techtlajpiya ijkuak tikixnamikij tlen ouijtika, más itech titlaneltokaj. Matikitakan tlen ipan onochiuj Anastasia, se tokniuj siuatl akin chanti Europa del Este. Akin imiuan tekitiya kichiualtiayaj  manokalakti ipan política, ika yejon, yejua ononek kikauas itekiyo niman ijkon xkinpaleuis. Anastasia kijtoua: “Pampa nochipa nikpiaya tekitl xkeman nechpolouaya tomin”. Noijki kijtoua: “Onikijli Jehová tlen nopan nochiujtoya, niman onikitak kenon yejua melak onechtlajpix. Tla kemantika oksejpa xok nikpiya tekitl, xninomojtis. Nikmatstika ika noTajtsin akin nemi ne iluikak nechtlajpiyas aman, niman nochipa ijkon kichiuas”.

15. ¿Tlenon okichiuj ika Esdras nochipa matlaneltoka itech Jehová? (Esdras 7:​27, 28).

¹⁵ Esdras okitak kenon Jehová okipaleui. Pampa okinemili kenon Jehová miyekpa yokipaleuijka, okichiuj ika nochipa itech matlaneltoka. Matitlanemilikan itech tlajtojli “yejua nemiya nouan” tlen nesi ipan Esdras 7:​27, 28 (xpoua). Ipan libro tlen kipiya itoka, Esdras, makuilpa okintekitilti tlajtoltin tlen san noijki kakistisnekij (Esd. 7:​6, 9; 8:​18, 22, 31).

16. ¿Kemanon uelis tikitaskej kenon Jehová techpaleuiya? (Noijki xkita tlaixkopinajli).

¹⁶ Jehová uelis techpaleuis ijkuak techtlatlataskej. Ken ijkuak nonekis tiktlajtlaniliskej akin techtlakeua matechmaka seki tonaltin niman ijkon uelis tiaskej ipan toueyitlanechikol, noso matechkauili matikpatlakan horas ijkuak titekitij niman ijkon xtopolouiliskej nion se tlanechikojli. Ijkuakon, uelis tikitaskej kenon Jehová techpaleuiya. Melak techmojkatlachialtis kenon kichiuas, niman yejon techpaleuis más itech matitlaneltokakan.

17. ¿Kenon tikmatij ika Esdras melak yolyemanki katka ijkuak okixnamik tlen ouijtika? (Xkita tlaixkopinajli tlen nesi ixpan yejuin revista).

¹⁷ Esdras melak yolyemanki katka niman nochipa kitlajtlaniliaya Jehová makipaleui. Ijkuak kimatiya ika xueliskia kichiuaskia tlen yokinauatijkaj, yejua nochipa kinotsaya toTajtsin (Esd. 8:​21-23; 9:​3-5). Ijkuak oksekimej okitakej kenon Esdras melak tlaneltokaya itech Jehová, noijki ijkon okichiujkej (Esd. 10:​1-4). Tla kemantika tiajmankamikij pampa xtikmatij kenon uelis tikinmakaskej tofamilia tlen kinpoloua, noijki noneki matiknotsakan toTajtsin niman kuajli matikmatstokan ika yejua techpaleuis.

18. ¿Tlenon techpaleuis más matitlaneltokakan itech Jehová?

¹⁸ Uelis más titlaneltokaskej itech Jehová tla tiyolyemankej niman tiktlajtlaniliaj matechpaleui, noijki tla tokauiliaj matechpaleuikan tokniuan. Erika, se tokniuj siuatl akin kinpiya yeyimej ikoneuan, nochipa otlaneltokak itech Jehová maski okixnamik tlen ouijtika. Yejua, omik iichpokatsin ijkuak xiuajnemiya niman omik iueuentsin. Ijkuak kilnamiki nochi tlen  ipan opanok, yejua kijtoua: “Miyekpa yonikitak kenon Jehová nechnankilia ika tlen kijtouaj niman ika tlen kichiuaj noamigos. Tla nejua nikimijlia tlen nopan nochiua, yejuamej más kuajli nechpaleuiyaj”.

19, 20. ¿Tlenon tiuelij itech judíos akin xouel onokuepkej Jerusalén?

¹⁹ Noijki miyek tlen tiuelij itech tlen okichiujkej judíos akin xouel onokuepkej Jerusalén kanaj pampa iuejueyimej katkaj, kualouayaj noso pampa nonekiya kintlajpiyaskej inchanejkauan. Maski xmiyek tlen kipiayaj, okinejkej okinpaleuijkej judíos akin onokuepkej Jerusalén ijkuak okinmakakej tlen kipiayaj (Esd. 1:​5, 6). Niman, kanaj 19 xiuitl sakin, judíos akin onokaujkej Babilonia ok kintitlaniliayaj tlen kipiayaj (Zac. 6:10).

²⁰ Maski xuelis miyek tikchiuaskej ken tikuelitaskiaj niman ijkon tiktekichiuiliskej Jehová, kuajli tikmatstokej ika yejua kipatiojkaita tlen tikchiuaj ipampa. ¿Kenon tikmatij yejuin? Ipampa tlen Jehová okijli teotlajtoketl Zacarías. Yejua okijli makichijchiua se corona ika oro niman plata tlen judíos akin onokaujkaj Babilonia okitemakakej (Zac. 6:11). Yejuin kualtsin corona kimilnamiktiskia ika yejuamej melak kuelitayaj kitemakaskej tlen kipiayaj (Zac. 6:14). Kuakon, kuajli tikmatstokej ika Jehová xkeman kilkaua tlen tejuamej tikchiuaj ipampa niman ijkon tiktekichiuiliskej maski tikixnamikij tlen ouijtika (Heb. 6:10).

21. ¿Tlenon techpaleuis maka matomojtikan maski san tlenon tikixnamikiskej?

²¹ Tikmatstokej ika ipan itlamiyan tonaltin ok tikixnamiktoskej miyek tlen ouijtika niman ika más tlaijtlakauis (2 Tim. 3:​1, 13). San ika, xnoneki tijkauiliskej ika yejon matechajmankamikti. Matikilnamikikan tlen Jehová okimijli itekipanojkauan ipan itonaluan Ageo: “Nejua nemouan ninemi […]. Maka xmomojtikan” (Ageo 2:​4, TNM; Ageo 2:5). Tejuamej kuajli tikmatstokej ika tla tokojtiliaj tikchiuaskej tlen Jehová kineki, yejua touan nemis. Tla tikchiuaj nochi tlen yotiuelkej itech iteotlajtoluan Ageo niman Zacarías niman itech tlen okichiuj Esdras, nochipa titlaneltokaskej itech Jehová, maski san tlenon mapano.