TOKNIUAN ipan kachtopa siglo melak onochikaujkej kinnojnotsaskej miyekej tlaltikpakchanejkej itech “kuajli tlajtojli” (Mat. 24:14). Sekimej hasta oyajkej okseki países. Se neskayotl, Pablo, itlatitlankauj Cristo, oyaj kampa aman noixmati ken Turquía niman ompa miyekan otenojnots ijkuak oyajka ken misionero. * Kanaj 2,000 xiuitl sakin, ipan 2014, miyekej chikauak otenojnotsatoj Turquía. ¿Akinomej oyajkej ompa niman tleka okichiujkej?

Ipan Turquía nemij kanaj 2,800 tenojnotskej. San ika, ipan yejon país chantij ipantsin 79 millones tlaltikpakchanejkej. Yejuin kijtosneki ika nemi se tenojnotsketl itech 28,000 akin ompa chantij. San xkonemili, tenojnotskej san achijtsitsintin tlaltikpakchanejkej yokinnojnotskej ipan yejon país. Ika yejon, miyekej chikauak otenojnotsatoj ompa pampa nonekiya kinnojnotsaskej melak miyekej hasta kampa ueliskiaj san ipan achijtsin tonaltin. Ipan yejon tonaltin, 550 tokniuan akin tlajtouaj turco niman chantiyaj ipan okseki países oyajkej Turquía niman ijkon ontenojnotsaskej iuan tokniuan akin ompa chantij. ¿Tlenon ouel onochiuj ika yejuin?

Miyekan onotenojnots. Se tlanechikojli ipan Estambul okijto: “Pampa tlaltikpakchanejkej nochiuiyan kimitayaj iteixpantijkauan Jehová, techtlajtoltiayaj tla onkatka se ueyi tlanechikojli”. Ipan ueyikalpan itoka Izmir, se tlanechikojli okijkuilo: “Se tlakatl akin tekitiya kampa notelketsaj taxis, okinisiui se tlayekanketl niman okitlajtolti: ‘¿Tlenon panotok? Xkeman ijkin nentekitiyaj’”. Kuajli nesi ika pampa miyekej chikauak otenojnotsatoj ompa otlamojkaitakej tlaltikpakchanejkej.

Tokniuan akin ualeuayaj itech okseki países melak okinyolpakti tenojnotsaskej. Steffen akin ualeua Dinamarca okijto: “Nochi tonaltin niueliya nikinnojnotsa akin xkeman kikakiyaj itech Jehová. Nikmachiliaya ika yemelak nikchiujtoya makixmatikan itoka Jehová”. Se tokniuj itoka Jean-David akin ualeua Francia okijkuilo: “San ipan se calle miyek horas tiuejkauiyaj titenojnotstokej. ¡Melak kualtsin katka! Miyekej tlaltikpakchanejkej xkimixmatiyaj iteixpantijkauan Jehová. Ipan miyek kaltin, melak  kuajli techkakiyaj, tikimititiayaj se video niman tikinkauiliayaj se amatlakuilojli”.

550 tokniuan okitemakakej kanaj 60,000 amatlajkuiloltin san ipan ome semanas. Ken tikitaj, pampa miyekej chikauak otenojnotsatoj ouel melak miyekan onotenojnots.

Oueyiyak pakilistli ipan tenojnotsalistli. Pampa miyekej chikauak otenojnotsatoj, tokniuan akin ompa chantij okinpaleui noijki makinekikan tenojnotsaskej. Miyekej opeujkej kinemiliaj chikauak tenojnotsaskej, hasta onochiujkej 82 precursores regulares ipan 12 metstin ika tlayekapan.

Tokniuan akin ooneujkaj oksekan okijtokej ika pampa oyajkej kampa miyekej chikauak otenojnotsatoj okinpaleui ipan intenojnotsalis hasta ijkuak yonokuepkaj inpaís. Se tokniuj siuatl chanej Alemania itoka Şirin okijkuilo: “Tokniuan chanejkej Turquía melak ueltokej tenojnotsaj san kanon. Nejua nikmachilia ouijtika nikchiuas yejon, pampa melak ninomojtia. San ika, ouel onikchiuj pampa oniaj kampa miyekej chikauak otenojnotsatoj, inneskayo tokniuan akin ompa chantij niman teoyotl onechpaleui. ¡Hasta oniuel onitenojnots niman onikintemakak amatlajkuiloltin pitentsitsintin ipan metro! Aman xok ninomojtia ijkon ken yeuejkaui”.

Se tokniuj chanej Alemania itoka Johannes okijto: “Oniuel seki tlen onechpaleui ipan notenojnotsalis. Tokniuan ipan Turquía melak kinekij kinnojnotaskej miyekej tlaltikpakchanejkej niman kichiuaj nochiuiyan ijkuak uelij tenojnotsaj. Oniknemili noijki ijkon nikchiuas ijkuak oninokuep Alemania. Niman aman nikinnojnotsa miyekej, xijkon ken yeuejkaui”.

Se tokniuj siuatl chanej Francia itoka Zeynep okijto: “Pampa chikauak onitenojnotsato iuan miyekej, onechpaleui ipan notenojnotsalis. Onechpaleui manikpiya chikaualistli niman manitlaneltoka itech Jehová”.

Okichiuj tokniuan kuajli manouikakan. Pampa san sekan nemiyaj niman notlasojtlayaj maski ualeuayaj ipan okseki países okichiuj nochipa makilnamikikan. Jean-David, akin yotikteneujkaj, okijto: “Otikitakej kenon kuajli otechselijkej tokniuan. Techitayaj ken akin imiuan nouikayaj niman ken inchanejkauan. Kuajli otechselijkej ipan inchan. Nejua  nikmatstoya ika tiikniujtin ipan nochi tlaltikpaktli, pampa miyekpa yonikpoujka ipan toamatlajkuiloluan. San ika, aman nejua onikitak yejuin. Okichiuj melak kuajli maninomachili pampa niktekichiuilia Jehová. Melak niktlasojkamachilia ipampa yejuin tlateochiualistli”.

Se tokniuj chanej Francia itoka Claire okijto: “Tinochimej kentla tiyeskiaj san se familia, maski tla tiualeuayaj Alemania, Dinamarca, Francia noso Turquía. Yeskia kentla toTajtsin kichiuaskia ika maka maonia tlen techxeloua”.

Stéphanie, akin chanej Francia, okijto: “Pampa otiajkej kampa miyekej tokniuan chikauak otenojnotsatoj, otechmachti ika tlen kichiua san sekan matinemikan xsan pampa san noijki ken titlanemiliaj noso totlajtol, yejuin kichiua tlasojtlalistli tlen tikmachiliaj ipampa Jehová”.

Miyekej tokniuan akin chikauak otenojnotsatoj, okinemilijkej yaskej onchantiskej Turquía niman ijkon tlapaleuiskej ika ueyi tekitl tlen ompa onka. Sekimej yoyajkej niman melak notlasojkamati tlen kichiuaj.

Se neskayotl, sekan san nemiyaj 25 tokniuan tenojnotskej. Ipan miyek xiujtin san nemiya se tlayekanketl. San ika, ipan 2015, chikuasen tokniuan itech Alemania niman Países Bajos onochantitoj niman otlapaleuitoj ompa. ¡San matikonnemilikan kenon melak opajkej tokniuan!

¿Kenon nomachiliaj tokniuan akin tlapaleuijtokej ipan Turquía seki tonaltin? Ken nochimej, yokixnamijkej itlaj tlen ouijtika, san ika, yokipixkej miyek tlateochiualistin. Matikitakan tlen kijtouaj sekimej.

Se tokniuj akin yononamikti itoka Federico, akin kipiya kanaj 40 xiuitl, okikaujteuj ichan España. Yejua kijtoua: “Pampa xnikpiya miyek tlemach, kichiua kuajli maninomachili niman nechkauilia manikchiua tlen melak ueyi kijtosneki”. ¿Techijlia matiktekichiuilikan toTajtsin ijkon? Yejua kijtoua: “¡Kema! Ijkuak tias ipan okse país tikominpaleuis oksekimej makixmatikan Jehová, tikteititia ika titlaneltoka itech. Yemelak tikmachilis kenon yejua mitstlajpiyas”.

 Rudy, se tokniuj akin yononamikti niman chanti ipan Países Bajos akin kipiya kanaj 60 xiuitl, kijtoua: “Melak techyolpaktia ika titlapaleuiyaj kampa onka ueyi tekitl niman tikinnojnotsaskej miyekej akin xkeman kikakij itech toTajtsin. Tikitaskej kenon yolpakij ijkuak kimatij tlen melauak, kichiua matiyolpakikan”.

Sascha, se tokniuj akin ikipiya ipantsin 40 xiuitl ika yononamikti, noijki okikaujteuj ichan Alemania. Yejua kijtoua: “Nochipa ijkuak niauj nontenojnotsa, nikinnextia akin xkeman kikakiyaj itech toTajtsin. Melak nechyolpaktia nikinpaleuis makixmatikan Jehová”.

Atsuko, se tokniuj siuatl chanej Japón akin yononamikti niman kipiya kanaj 35 xiuitl, kijtoua: “Yeuejkaui nochipa niknekiya totoka mauajla Armagedón. San ika, ijkuak oniaj Turquía, oniktlasojkamachili Jehová ika ok kiteititia ijyouilistli. Ijkuak nikita kenon Jehová kiyekana tenojnotsalistli ipan nochi tlaltikpaktli, kichiua melak manikneki ninouikas iuan”.

Alisa, se tokniuj siuatl chanej Rusia akin kipiya ipantsin 30 xiuitl, kijtoua: “Niktekichiuilis Jehová ipan yejuin tekitl yonechpaleui manikita ika yejua melauak yolkuajli” (Sal. 34:8). Noijki kijtoua: “Xnikita Jehová san ken noTaj, noijki nikita ken se akin melak kuajli iuan ninouika, akin melak kuajli nikixmati maski san tlenon mapano. Ipan nonemilis yonikpix miyek tlen yonechyolpakti, yonikixmat tlen kualtsin niman yonikseli tlateochiualistin”.

Pampa miyekej chikauak otenojnotsatoj Turquía, melak miyekej yokikajkej kuajli tlajtoltin itech Tekiuajyotl. San ika, ok onka kampa poliui notenojnotsas. Tokniuan akin onochantitoj Turquía mojmostla kinnextiaj akin xkeman kikakiyaj itech Jehová. ¿Tikuelitaskia titlapaleuis kanaj kampa noijki ijkin? Tla kema, xkilnamiki tlen kijtoua Juan 4:35: “Xkitakan nochimej on tlaltikpaktlakamej. Yejuamej no ijki ken se ueyi tlatoktli yejuan yochikau para nopixkas”. ¿Ueliskia titlapaleuis ipan se país kampa “tlatoktli yejuan yochikau para nopixkas”? Tla ijkon, xchiua aman tlen noneki niman ijkon sakin uelis titlapaleuis. Kuajli xmatsto ika chikauak titenojnotsas “nochiuiyan ipan in tlaltikpaktli” kichiuas xseli miyek tlateochiualistin (Hech. 1:8).