MELAK teyolkoko ijkuak moixnamik mitskajkayauas. Yemelak ika sekimej yokitlapopoluijkej imixnamik pampa yonoyolkuepkej niman aman oksejpa yopeuj kuajli nemij. * San ika, maski tla notlapopoluiaj noso ka, akin kikajkayauaj melak tlajyouiya. ¿Tlenon uelis kinpaleuis maka melak maajmankamikikan akin ijkon inpan yonochiuj?

Miyekej akin yokinkajkayaujkej melak yokinpaleui tlen kijtoua Biblia maski melak noyolkokouaj. Yejuamej yokasikamatkej ika toTajtsin kita ijkuak chokaj niman kita kenon tlajyouijtokej (Malaquías 2:13-16).

“Ijkuak ajmantli nechyolajmanaya, otinechyolchikauj niman otinechyolseui” (Salmo 94:19, TNM).

Bill kilnamiki: “Ijkuak nikpouaya yejuin texto, nikmachiliaya ika Jehová * nechyolseuijtoya, ijkon ken kichiuaskia se tajtli akin tetlasojtla”.

“NoTEKO, tejua nochipa tikchiua on tlen tikprometeroua intech on yejua nochipa mitstlakamatij” (Salmo 18:25).

Carmen, akin iueuentsin kikajkayaujtinemiya miyek metstin, kijtoua: “Noueuentsin onechkajkayauj, san ika, nikmatstoya ika Jehová xkeman nechkauaskia niman ika xkeman nechyolkokoskia”.

“Maka itlaj xkonmatstiakan, yej nochipa xchiuakan oración. Xtlajtlanilikan Dios tlen mechp[o]loua [...]. Niman Dios mechmakas yolseuilistli más ueyi yejuan xakaj uelis kajsikamatis. Niman in yolseuilistli kejeuas nemoyojlo” (Filipenses 4:6, 7).

Sasha kijtoua: “Miyekpa nikpouaya yejuin texto. Niman ijkuak más nikchiuaya teoyotl, más nikmachiliaya ika toTajtsin nechpaleuiaya manikpiya yolseuilistli”.

Nochimej akin yotikinteneujkej okimachilijkaj ika xok ueliskiaj kixikoskej inajmankayo. San ika, yejuamej otlaneltokakej itech Jehová, niman Biblia okinpaleui. Bill kijtoua: “Nitlaneltokas itech Jehová onechpaleui ijkuak xok nikmatiya tlenon nikchiuas. ToTajtsin xkeman onechkauj ijkuak melak najmankamikiya” (Salmo 23:4).