¿YEMELAK UELIS TIKTLAPEJPENIS TLEN TIKNEKI MOPAN MAPANO IKA TLAYEKAPAN? Sekimej kineltokaj ika tlen panos ipan innemilis iijkuiliujtok niman ika toTajtsin kijtoua tlenon panos ipan innemilis. Ika yejon, ijkuak xnochiua tlen kinekiyaj, san uajnosiaujkauaj niman kijtouaj: “Ijkon iijkuiliujtoya”.

Oksekimej san uajnamanaj ijkuak kitaj ika xueli noyektlalia tlen xkuajli niman tlen tetlajyouiltia ipan yejuin tlaltikpaktli. Kanaj kiyejyekouaj kuajli kipiyaskej innemilis, san ika, xuelij kuajli nemij pampa onka guerras, kokolistli, pampa nemij akin kichiuaj tlen xkuajli noso pampa panoua itlaj tlen tlaixpoloua. Ika yejon, sekimej notlajtoltiaj, ¿tleka ok tikyejyekojtoskej kuajli tinemiskej?

Yemelak ika tlen panotok kanaj uelis kipatlas tlen tiknemiliayaj tikchiuaskej (Eclesiastés 9:11). San ika, tinochimej uelis tiktlapejpeniskej tlenon tiknekij topan mapano ika tlayekapan. Biblia temachtia ika toseselti noneki tiktlapejpeniskej tlen tiknekij topan mapano. Matikitakan tleka ijkon tikijtouaj.

Ijkuak israelitas ikalakiskiaj ipan tlajli tlen yokimijlikaj kinmakaskej, toTajtsin itechkopa Moisés okimijli: “Niktlalia nemilistli niman mikilistli nemixpan, tlateochiualistli niman tlauijuikaltilistli; niman nemejuamej noneki nenkitlapejpeniskej nemilistli niman ijkon uelis ninnemiskej, nemejuamej niman nemokoneuan, xtlasojtlakan Jehová nemoTajtsin, xkakikan itlajtol, niman xmopepechokan itech” (Deuteronomio 30:15, 19, 20).

“Niktlalia nemilistli niman mikilistli nemixpan, tlateochiualistli niman tlauijuikaltilistli; niman nemejuamej noneki nenkitlapejpeniskej nemilistli” (Deuteronomio 30:19).

Kema ijkon, toTajtsin okinmakixti israelitas itech Egipto kampa kintlajyouiltiayaj, niman okinkauili manemikan ika pakilistli ipan Tlajli tlen yokijtoka kinmakas. San ika, yejuamej nonekiya itlaj kichiuaskiaj niman ijkon kiseliskiaj yejon tlateochiualistin, nonekiya kitlapejpeniskej nemilistli. ¿Kenon? Kitlasojtlaskiaj toTajtsin, kikakiskiaj iTlajtol niman xkeman kikauaskiaj.

Aman, tejua noijki noneki tiktlapejpenis tlenon tikchiuas, niman tlen tiktlapejpenia nesis ipan tlen mopan panos ika tlayekapan. Tla tiktlapejpenia tiktlasojtlas toTajtsin, tijkakis itlajtol niman xkeman tijkauas, tiktlapejpenijtoskia nemilistli tlen xkeman tlamis ipan se xochitlalpan. San ika ¿kenon tikchiuas nochi yejuin?

Ika iespíritu santo toTajtsin, Juan, itlatitlankauj Cristo, okijkuilo ika “Dios yejua tetlajsojtlalistli”, niman yejuin tlen melak ueyi ikualneskayo toTajtsin (1 Juan 4:8). Ika yejon, ijkuak Jesús okitlajtoltijkej katlejua tlanauatijli melak ueyixtoya, yejua otlanankili: “Xtlajsojtla on moTeko Dios ikan nochi moyojlo, ikan nochi moalma niman ikan nochi motlamachilis” (Mateo 22:37). Se nouika iuan toTajtsin pampa kitlasojtla, xpampa kimakasi noso maski xkasikamati kitlakamati. San ika ¿tleka noneki matiktlasojtlakan toTajtsin?

Tlasojtlalistli tlen toTajtsin kimachilia inpampa tlaltikpakchanejkej ijkon ken tajtin kimachiliaj tlasojtlalistli inpampa inkoneuan. Maski tajtin tlajtlakolejkej, nokojtiliaj kinmachtiskej inkoneuan, kinyolchikauaskej, kinpaleuiskej niman kinyektlaliskej ika tlasojtlalistli pampa kinekij mapakikan niman kuajli manemikan ipan innemilis. Niman, ¿tlenon kichiaj tajtin itech inkoneuan? Kinekij ika makintlasojtlakan niman makipatiojkaitakan nochi tlen kimijliaj pampa kinpaleuis. ¿Xmelak ika nochia ika toTajtsin iluikakchane, akin xkipiya tlajtlakojli, matiktlasojtlakan  niman matiktlasojkamachilikan tlen yokichiuj topampa?

Ipan tlajtojli tlen kachtopa ika onoijkuilo Biblia, ijkuak noijtoua titlakakis miyekpa kijtosneki titetlakamatis. ¿Xmelak ika yejuin tlen tajtin kinekij makichiuakan inkoneuan ijkuak kimijliaj: “Xnechkaki”? Kuakon, tijkakiskej itlajtol toTajtsin kijtosneki tikmatiskej tlen techtlajtlanilia niman tikchiuaskej. Pampa aman toTajtsin xtlajtoua inuan tlaltikpakchanejkej, uelis tijkakiskej tla tikpouaj iTlajtol, Biblia, niman tla tikchiuaj tlen ompa techijlia (1 Juan 5:3).

Jesús kinekiya kiteititis ika melak noneki matijkakikan itlajtol toTajtsin, ika yejon, se tonajli okijto: “Xsan ikan tlaxkajli uelis nemis on tlakatl, yej no ikan nochi tlajtojli yejuan Dios kijtoua” (Mateo 4:4). Melak ueyi kijtosneki tikpiyaskej tlaixmatilistli tlen ualeua itech toTajtsin xijkon ken tlakuajli. ¿Tleka? Tekiuaj Salomón, akin melak tlamachilise katka, okijto: “Tlamachilistli tepaleuiya ijkon ken tomin tepaleuiya, san ika, tikpiyas tlaixmatilistli tepaleuiya tikmatis yejuin: Akin kipiya tlamachilistli kipaleuiya manemi” (Eclesiastés 7:12). Tlamachilistli niman tlaixmatilistli tlen ualeua itech toTajtsin uelis techtlajpiyas niman techpaleuis kuajli matiktlapejpenikan ojtli tlen noneki: tlen techuikas ipan nemilistli tlen xkeman tlamis.

Ipan tlamachtijli tlen opanok, otikteneujkej yejuin tlen Jesús okijto: “Pitstik puerta niman pitsauak ojtli tlen teuika itech nemilistli, niman xmiyekej akin kinextiaj” (Mateo 7:13, 14, TNM). Tla tiknekij tiaskej ipan yejon ojtli, melak techpaleuiskia tla nemiskia yakaj akin matechyekana niman ijkon tajsiskej kampa tiknekij: itech nemilistli tlen xkeman tlamis. Ika yejon, noneki xkeman tijkauaskej toTajtsin (Salmo 16:8). San ika ¿kenon uelis tikchiuaskej?

Mojmostla tikpiyaj miyek tekitl tlen noneki tikchiuaskej niman okseki tlen noijki tikuelitaskiaj tikchiuaskej. Pampa melak miyek tikpiyaj tlen tikchiuaskej, tikpiyaj achijtsin tiempo niman ijkon titlanemiliskej itech tlen toTajtsin kineki matikchiuakan. Ika yejon, Biblia techtlalnamiktia: “Kuajli xmotakan sa no nemejuamej ken nemouikaskej. Ma ka xmouikakan ken on yejuan xtlajmatkej, yej xmouikakan ken tlajmatkej. Nochi on tonaltin xtekitiltikan para on tlen kuajli, pampa on tonaltin sanoyej xkuajkualtin” (Efesios 5:15, 16). Xtijkauaskej toTajtsin kijtosneki tikasikamatiskej ika melak ueyi kijtosneki iuan touikaskej (Mateo 6:33).

Maski xuelis tikpatlas tlen yeuejkaui opanok, kema uelis tiktlapejpenis tejua iuan mochanejkauan tlen nenkinekij kuajli nemopan mapano ika tlayekapan. Biblia temachtia ika toTajtsin iluikakchane, Jehová, melak techtlasojtla niman techijlia tlen kineki matikchiuakan. Xkita yejuin tlajtoltin tlen teotlajtoketl Miqueas okijto:

“Yejua yomitsijli, tlaltikpakchane, tlen kuajli. ¿Niman tlenon oksejpa mitstlajtlanilia Jehová? ¡San xchiua tlen melajki, xtlasojkaita tlasojtlalistli tlen xtekaua, niman ika yolyemanilistli xkistinemi iuan moTajtsin!” (Miqueas 6:8).

¿Tikistinemis tejua iuan toTajtsin? Tla tikselia tlen mitsijlia, tikselis tlateochiualistin tlen yejua kinmakas akin imiuan nouika. Tejua tikmati tlenon tiktlapejpenis.