Ijkuak se toamigo kualo pampa melak xkuajli nomachilia, kanaj xtikmatiskej tlenon tikchiuaskej. San ika, uelis tikititiskej ika melak tiktlasojtlaj, tla tikpaleuiyaj makixiko yejon kokolistli.

“Cada se de nemejuamej noneki nemis listo para nentlakakiskej” (SANTIAGO 1:19).

Tla kuajli tijkakij tlen techijlia se toamigo, uelis melak tikpaleuiskej. Maka xnemili ika nonekis tiknankilis nochi tlen mitsijlia. Xkititi ika kuajli tikaktika niman ika yemelak tikneki tikpaleuis. Xyejyeko tikasikamatis kenon nomachilia niman maka nimantsin xnemili ika nopopolojtika. Xmatsto ika kemantika moamigo uelis kijtos itlaj tlen xkinekiya kijtos, niman kanaj sakin noyolkokos pampa ijkon okijto (Job 6:2, 3).

“Xkinyoleuakan on yejuan notsinkixtiaj” (1 TESALONICENSES 5:14).

Kanaj moamigo melak ajmankamiki noso kinemilia ika yejua xkeman yes ken oksekimej, yejua ika, xkititi ika melak tiktlasojtla. Tla ijkon tikchiua, uelis tikyolseuis niman tikyolchikauas, maski tla xtikmatis tlenon tikijlis.

“Sen tetlajsojkaikniu nochipa tenotski” (PROVERBIOS 17:17).

Xkijli ika tikneki tikpaleuis. Maski tla tiknemilia ika itikmati kenon uelis tikpaleuis, más kuajli yes tla tiktlajtoltia tlenon uelis tikchiuas ipampa. Tla moamigo xueli mitsijlia kenon kineki makipaleuikan,  xkijli ika tla kineki uelis san sekan nenmonejnemiskej, nemontlakouaskej noso tikpaleuis ijkuak tlachipauas ichan noso ijkuak kichiuas okseki tekitl (Gálatas 6:2).

“Xpiyakan ijyouilistli” (1 TESALONICENSES 5:14).

Kanaj moamigo xnochipa kinekis tlajtos, san ika, xkilnamikti ika tejua nochipa tiknektos tijkakis. Xmatsto ika ipampa on kokolistli moamigo kanaj uelis kichiuas noso kijtos itlaj tlen mitsyolkokos, kanaj xok kineki kichiuas tlen yonenkijtokaj nenkichiuaskej noso kanaj peua kualani. Ijkuak tikpaleuis moamigo xkijyoui niman xkasikamati (Proverbios 18:24).

“Ninokojtilia nikititis noamiga ika nejua nochipa niknektos nikpaleuis. Nikmatstika ika xnochipa uelis nikyektlalis tlen kixnamiktika noamiga, san ika, ninokojtilia nochipa nijkakis ijkuak yejua kineki yakaj iuan tlajtos. Ijkuak ijkon nikchiua yejua kuajli nomachilia” (Farrah, a akin kipiya se iamiga tlen kipiya depresión clínica, trastornos alimentarios niman ansiedad).

“Nikpiya se noamiga akin melak nechyolchikaua niman melak nechtlasojtla. Se tonajli, onechijli manitlakuati ichan niman onexchijchiuili tlakuajli tlen melak uelik. Pampa melak ika noyojlo oninomachili ouel onikijli nochi tlen nikmachiliaya. ¡Yejon melak onechpaleui!” (Ha-eun, akin kipiya depresión clínica).

“Melak noneki titeijyouis. Ijkuak nosiuatsin kichiua itlaj tlen nechkualania ninokojtilia nikilnamikis ika ijkon kichiua ipampa on kokolistli tlen kipiya. Yejon nechpaleuiya maka manikualani niman manikasikamati nosiuatsin” (Jacob, akin isiuatsin kipiya depresión clínica).

“Nosiuatsin melak nechpaleuiya niman melak nechyolchikaua. Ijkuak melak najmankamiki yejua xkeman nexchiualtia manikchiua itlaj tlen xnikneki nikchiuas. Niman pampa yejua kineki kuajli maninomachili, kemantika hasta xok kichiua tlen kuelitaskia kichiuas. Melak nikpatiojkaita nosiuatsin pampa yejua xsan itech tlanemilia niman nochipa kinektok nechpaleuis” (Enrico, akin kipiya trastorno de ansiedad).