Tlen okijkuilo Juan 7:1-52
7 Ijkuak nochi yejuin yopanok, Jesús kistinemiya Galilea. Yejua xkinekiya yas Judea pampa judíos kitejtemojtoyaj kenijki kimiktiskej.
2 Yeajsitoya tonajli ijkuak judíos kichiuaskiaj iluitl de Kajkaltsitsintin.
3 Yejua ika, ikniuan okijlijkej: “Xkisa niman xuiya Judea para akin tikinmachtia noijki makimitakan milagros tlen tejua tikinchiua.
4 Pampa, ijkuak yakaj kineki ika nochimej makixmatikan, xsan ichtaka itlaj kichiua. Tla tejua tikchiua nochi yejuin, xmoteititi imixpan nochimej”.
5 Ijkon kijliayaj pampa ikniuan xitech tlaneltokayaj.
6 Kuakon, Jesús okimijli: “Xeajsi nohora, pero para nemejuamej san katlejua tonajli kuajli.
7 Gente xkipiya tleka mechtlauelitas, pero nejua nechtlauelitaj pampa nikteijlia ika xkuajli tlen kichiuaj.
8 Nemejuamej xuiyan ipan yejon iluitl. Nejua xenias ipan yejon iluitl pampa xeajsi nohora”.
9 Yejon okimijli niman onokauj Galilea.
10 Ijkuak ikniuan oyajkej ipan iluitl, yejua noijki oyaj pero san ichtaka.
11 Kuakon, judíos opeuj kitejtemouaj ipan iluitl niman ijkin kijtouayaj: “¿Kanon nemi yejon tlakatl?”.
12 Miyekej akin ompa nemiyaj san ichtaka kitejteneuayaj. Sekimej kijtouayaj: “Kuajli iyojlo”. Oksekimej kijtouayaj: “Ka, xkuajli iyojlo. San tekajkayaua”.
13 Pero xakaj itlaj kijtouaya teixpan pampa kinmakasiyaj judíos.
14 Ijkuak yekipiaya naui tonajli ika iluichijtoyaj, Jesús oyaj ne templo niman ompa opeuj temachtia.
15 Judíos mojkatlachiayaj niman kijtouayaj: “¿Tleka yejuin tlakatl melak kimixmati Tlajkuiloltin tla xoyaj escuela?”.*
16 Kuakon, Jesús okinnankili: “Xnejua noyaxka tlen nejua nitemachtia, iyaxka akin onechajtitlan.
17 Tla yakaj kineki kichiuas tlen toTajtsin kineki, kimatstos tla tlen nejua nitemachtia ualeua itech toTajtsin, noso san nejua niknejnemilia.
18 Akin san temachtia tlen yokinejnemili, kineki ika oksekimej makiueyiteneuakan, pero akin kitejtemoua makiueyiteneuakan akin okuajtitlan, kijtoua tlen melauak niman kichiua tlen kinamiki.
19 ¿Xmelauak ika Moisés omechmakak Tlanauatijli? Pero, nemejuamej xnenkitlakamatij Tlanauatijli. ¿Tleka nenkinekij nennechmiktiskej?”.
20 Akin ompa nemiyaj okinankilijkej: “¡Tikpiya se demonio! ¿Akinon kineki mitsmiktis?”.
21 Kuakon, Jesús okimijli: “San itlaj onikchiuj ijkuak sábado katka niman nochimej onenmojkatlachixkej.
22 Xnemilikan ijkuak nemejuamej nenkinchiuiliaj circuncisión* telpokatsitsintin, ijkon nenkichiuaj maski sábado san pampa Moisés omechnauati xmochiuilikan circuncisión. Maski yejon Tlanauatijli xualeua itech Moisés, ualeua itech nemochanejkauan akin yeuejkaui onenkej.
23 Tla nenkichiuiliaj circuncisión se telpokatsin ijkuak sábado san para nenkitlakamatiskej Tlanauatijli tlen okimakakej Moisés, ¿tleka melak nenkualanij nouan san pampa onikpajti se tlakatl ijkuak sábado?
24 Maka sa xtetlajtlakolmakakan san ipampa tlen nenkitaj, xtetlajtlakolmakakan ijkon ken kinamiki”.
25 Kuakon, sekimej akin chantij Jerusalén, ijkin opeuj kijtouaj: “Yejuin tlakatl akin kinekij kimiktiskej, ¿xmelak?
26 Pero, xkita, ne tlajtojtika imixpan nochimej niman xakaj itlaj kijlia. ¿Kanaj akin techyekanaj yokineltokakej ika yejua Cristo?
27 Tejuamej tikmatij kanon ualeua yejuin tlakatl, niman ijkuak Cristo uajlas xakaj kimatis kanon ualeua”.
28 Kuakon, Jesús ijkin chikauak okijto ijkuak temachtiaya ipan templo: “Nemejuamej nennechixmatij niman nenkimatij kanon niualeua. Pero, nejua xoniuajla san pampa oniknek. Akin onechajtitlan yemelak nemi, niman nemejuamej xnenkixmatij.
29 Nejua kema nikixmati, pampa onitlajtoko ipampa niman yejua onechajtitlan”.
30 Yejua ika, opeuj kitaj kenijki kajsiskej, pero xakaj itlaj ouel okichiuili pampa xeajsiya ihora.
31 Maski ijkon, miyekej itech otlaneltokakej niman ijkin opeuj kijtouaj: “Ijkuak uajlas Cristo kinchiuas miyek milagros. Yejon tlen kichijtika yejuin tlakatl”.
32 Fariseos okikakkej tlen gente san ichtaka kijtouayaj itech. Yejua ika, yejuamej niman akin kinyekanaj teopixkej okinnauatijkej akin kitayaj nochi kuajli maonia makajsitij Jesús.
33 Kuakon, Jesús ijkin okimijli: “Nemouan ninemis achijtsin tiempo achto ika nias itech akin onechajtitlan.
34 Nemejuamej nennechtejtemoskej pero xnennechnextiskej. Xuelis nenyaskej kampa nejua ninemis”.
35 Kuakon, judíos ijkin opeuj noijliaj: “¿Kanon kinemilijtika yas para xtiknextiskej? ¿Xkinemilijtika yas imiuan judíos akin yononelojkej imiuan griegos niman kinmachtis akin griegos?
36 ¿Tlenon okijtosnek ijkuak okijto ‘Nemejuamej nennechtejtemoskej pero xnennechnextiskej. Xuelis nenyaskej kampa nejua ninemis’?”.
37 Katka sa ika tlami tonajli de iluitl, niman yejon tonajli más ueyi kijtosnekiya. Ijkuakon, Jesús onotelkets* niman ijkin chikauak okijto: “Tla yakaj amiki, notech mauajla* niman makoniki atl.
38 Tla yakaj notech tlaneltoka, desde ipan iyojlo kisaskej ‘ríos uan kipiyaj atl tlen yoltika’, ijkon ken kijtouaj Tlajkuiloltin”.
39 Jesús kitenejtoya espíritu tlen kiseliskiaj akin itech tlaneltokaskiaj. Yejua xekitlaliayaj para maueyixto, yejua ika, xekiseliayaj espíritu.*
40 Ijkuak okikakkej yejuin tlajtoltin, sekimej akin ompa nemiyaj opeuj ijkin kijtouaj: “Kuajli nesi ika yejua Teotlajtojketl akin kuajtitlaniskiaj”.
41 Sekimej kijtouayaj: “Yejua Cristo”. Pero oksekimej kijtouayaj: “Cristo xuelis ualeuas de Galilea, ¿xmelak?
42 ¿Xkijtouaj Tlajkuiloltin ika Cristo ualeuaskia itech ichanejkauan David niman uajnemiskia Belén, ipueblo David?”.
43 Kuakon, akin ompa nemiyaj xnotlajtolnamikiyaj itech akinon yejua.
44 Sekimej kinekiyaj kajsiskej, pero xakaj itlaj ouel okichiuili.
45 Kuakon, akin okomontitlankej para makajsitij Jesús onokuepkej. Yejua ika, akin kinyekanaj teopixkej niman fariseos ijkin okintlajtoltijkej: “¿Tleka xonenkuajuikakej?”.
46 Yejon tlakamej okinnankilijkej: “¡Xkeman tikakiyaj ijkon matlajto se tlakatl!”.
47 Pero fariseos okimijlikej: “Xomechkajkayajkej noijki, ¿xmelak?
48 ¿Nenkitaj ika se akin techyekana noso se fariseo itech yotlaneltokak?
49 Pero akin xkixmatij iTlanauatil Moisés, toTajtsin xkinselia”.
50 Nicodemo, katka se fariseo niman yokitatoya Jesús, yejua ijkin okimijli:
51 “Tlanauatijli tlen tejuamej tiktlakamatij, kijtoua ika ijkuak yakaj tiktlajtlakolmakaskej kachtopa noneki tikakiskej niman kuajli tikmatiskej tlenon kichijtika, ¿xmelak?”.
52 Ijkuak okikakkej yejon, yejuamej okijlijkej: “¿Tejua noijki tiualeua Galilea? Kuajli xmomachti niman tikitas ika xuelis kisas nion se teotlajtojketl de Galilea”.*
Notas
^ Kijtosneki, escuelas kampa temachtiaj akin tlayekanaj ipan religiones.
^ Xkita circuncisión.
^ Noso “onauatekets”, “oneuetekets”.
^ Noso “mauiki”.
^ Ika griego kijtoua “xonkatka espíritu”.
^ Seki tlajkuiloltin tlen youejkauj okimijkuilojkej niman tlen uelis itech titlaneltokaskej, xkipiyaj versículo 53 de yejuin capítulo. Noijki, xkipiyaj versículos 1 a 11 de capítulo 8.
