1, 2. Xkinteneua sekimej tlaltikpakchanejkej akin Jehová kuajli imiuan onouikak.

¿AKINON tiktlapejpeniskia iuan timouikas? Kanaj tiktejtemos yakaj akin matlanemili ken tejua, makuelita tlen tejua tikuelita niman makitlakamati tlanauatiltin tlen tejua tiktlakamati. Niman kuajli tikmatstokej ika tiktlapejpeniskia se akin makipiya kuajli kualneskayomej; se neskayotl, mayolmelauak niman matenotski.

² Itech nochi xiuitl tlen yonenkej tlaltikpakchanejkej, toTajtsin yokintlapejpeni sekimej iuan manouikakan. Itech Abrahán kijtoua ika melak kuajli iuan onouikak (xpoua Isaías 41:8; Santiago 2:23). Itech David okijto ika “se tlakatl yejuan sanoyej nechpaktia”, pampa ijkon katka ken akin yejua kintlasojtla (Hechos 13:22). Niman itech Daniel okijto akin melak niktlasojkaita (Daniel 9:23).

3. ¿Tleka Jehová kintlapejpenia san sekimej tlaltikpakchanejkej iuan manouikakan?

³ ¿Tleka Jehová onouikak iuan Abrahán, David niman Daniel? Jehová okijli Abrahán: “Otijkak notlajtol” (Génesis 22:18). Kuakon Jehová kinnisiuiya akin kichiuaj ika yolyemanilistli tlen yejua kintlajtlanilia. “Xtlakamatikan notlajtol, niman ninochiuas nemoTajtsin, niman nemejuamej nenyeskej  nokalpan”, okimijli israelitas (Jeremías 7:23). Tla tiktlakamati Jehová, tejua noijki uelis iuan timouikas.

4, 5. ¿Kenon Jehová kiteititia ikojtilis inpampa akin kitekichiuiliaj?

⁴ San xnemili kenon yes tla iuan timouika toTajtsin. Biblia kijtoua ika Jehová kitejtemoua kenon “kiteititis ikojtilis inpampa akin ika nochi inyojlo kineltokaj” (2 Crónicas 16:9). ¿Kenon uelis toTajtsin kiteititis ikojtilis mopampa? Salmo 32:8 kijtoua kenon: “[Nejua, Jehová,] nikchiuas kuajli xkasikamati, niman nimitsititis ipan tlen ojtli tikistinemis. Kema yemelak ika noixtololo nimitstlajtolpaleuis”.

⁵ ¡Melak kualtsin kenon Jehová kijtoua mitstlajpiyas! Yejua mitstlajtolpaleuis kampa nonekis niman, tla tikchiua tlen mitsijlia, mitspaleuis kuajli xnemi. ToTajtsin kineki mitspaleuis niman ijkon xmakisa itech tlen tikixnamiki niman itech tlajyouilistli tlen tikpiya (xpoua Salmo 55:22). Kuakon, tla tiktekichiuilia ika nochi moyojlo, uelis timomachilis ijkon ken salmista, akin okijto: “Nochipa notechkopa nemi Jehová. Pampa yejua nemi nonakastlan kampa nomayekma, xkeman itlaj nechtlajkalis” (Salmo 16:8; 63:8). Kema, Jehová uelis mitspaleuis niman ijkon xnemi ken yejua kiyolpaktia. San ika, ken tejua tikmati, nemi se akin kitlauelita toTajtsin niman yejua kineki maka xchiua yejuin.

6. ¿Tlenon okijto Satanás itech tlaltikpakchanejkej?

⁶ Ken otikitakej ipan capítulo 11, Satanás okijto ika toTajtsin xkinamikiya tlayekanas. Okijto ika Jehová tlakajkayaua niman okijtosnek ika xkuajli tekiuaj, pampa xkinkauiliaya Adán iuan Eva makitlapejpenikan san inseltimej kichiuaskej tlen kuajli noso tlen xkuajli. Sakin ijkuak Adán iuan Eva otlajtlakojkej, tlaltikpaktli opeuj temi ika inkoneuan. Kuakon Satanás okijto ika nochimej tlaltikpakchanejkej xika inyojlo kiueyichiuaj toTajtsin. Kentla kijtoskia: “Tlaltikpakchanejkej xkitekichiuiliaj toTajtsin pampa kitlasojtlaj. Tla nechkauilia, uelis nikchiuas  ika maski san akinon maka makitlakamati toTajtsin”. Itech tlen ipan onochiuj Job techititia ika yejon tlen kineltoka Diablo. San ika ¿akinon katka Job, niman kenon okijtlako tlen Satanás okijto?

7, 8. a) ¿Tleka Job tlamantik noso sejneka katka itech oksekimej tlaltikpakchanejkej? b) ¿Tlenon okijto Diablo itech tleka Job kitekichiuiliaya toTajtsin?

⁷ Kipiya kanaj tres mil seiscientos xiuitl ika onen Job. Katka se tlakatl yolkuajli pampa Jehová okijto: “Xnemi okse ijkon ken yejua ipan yejuin tlaltikpaktli, se tlakatl xtlajtlakole niman yolmelaktik, nechtlakaita niman xkichiua tlen xkuajli” (Job 1:8). Kema, Job kiyolpaktiaya Jehová.

⁸ Diablo okijto ika Job xkitekichiuiliaya toTajtsin ika nochi iyojlo. Diablo okijli Jehová: “¿Xsan pampa tiktlajpiya iyeualiyan [Job] niman ichanejkauan niman nochi tlen kipiya [...]? Nochi itekiyo yotikteochiuj, niman melak yomiyekiyakej iyolkauan ipan nochi tlaltikpaktli. Aman xkita, xkixtili nochi tlen kipiya niman tikitas tla xmitsuijuikaltis mixko” (Job 1:10, 11).

9. ¿Kenon otlanankili Jehová itech tlen Satanás okijto, niman tleka?

⁹ Satanás okijto ika Job kitekichiuiliaya toTajtsin san pampa itech tlen kiseliaya. Noijki okijto ika tla kitlatlataskiaj Job, xok kitlakamatiskia toTajtsin. ¿Kenon otlanankili Jehová itech tlen Diablo okijto? Pampa itech tlen okijto kiteneujtoya kenon Job kitekichiuiliaya toTajtsin, Jehová okikauili Satanás makitlatlata Job. Ijkon noteititiskia tla yemelak kitlasojtlaya toTajtsin noso ka.

10. ¿Tlenon okixnamik Job, niman tlenon okichiuj?

¹⁰ Satanás nimantsin okitlatlatak Job. Okichiuj makichtekilikan seki iyolkauan niman okseki mamikikan niman melak miyekej itlakeualuan okinmiktijkej. Nochi yejuin okichiuj maka sa makipiya tomin. Sakin, Diablo oksejpa okitlajyouilti, pampa okichiuj mamikikan majtlaktli ikoneuan ika se chikauak ajakakiyaujtli. San ika, maski okipix yejuin tlajyouilistli, “Job xotlajtlako, nion xtlaj okijli toTajtsin tlen xkuajli” (Job 1:22).

11. a) ¿Tlenon okse okinek kiteititis Satanás itech Job, niman kenon otlanankili Jehová? b) ¿Tlenon okichiuj Job ijkuak okipix se kokolistli melak tekoko?

 ¹¹ Satanás xsan ompa okikauj. Okinemili ika maski Job ueliskia kixikos pampa okipolo nochi tlen kipiaya niman omijkej itlakeualuan iuan ikoneuan, kikauaskia toTajtsin tla yejua kualoskia. Ika yejon, Jehová okikauili Diablo makikualolti ika se kokolistli tepinajti niman tekoko. Maski ijkon ipan onochiuj Job, ok tlaneltokaya itech toTajtsin. Yejua okimelajkaijto: “¡Maski manimiki xkeman nijkauas niyolmelaujkanemis!” (Job 27:5).

12. ¿Kenon Job okinankili Diablo ika tlen okijtoka itech?

¹² Job xkimatiya ika Satanás kichiujtoya matlajyoui. Pampa xkimatiya ika Diablo kixnamiktoya Jehová, nomojtiaya kinemilis ika toTajtsin yejua akin kichiujtoya yejuin (Job 6:4; 16:11-14). Maski ijkon, oyolmelaujkanen niman xkeman okitlalkaui Jehová. Niman xsan yejon: ika iyolmelaujkanemilis Job, okiteititi ika xmelauak tlen Satanás okijto, ika kitekichiuiliaya toTajtsin san pampa tlen kiseliaya itech.

13. ¿Kenon otepaleui ika Job oyolmelaujkanen itech toTajtsin?

¹³ Iyolmelaujkanemilis Job okikauili Jehová kuajli makinankili tlen Satanás okiteneuilijka toTajtsin. Job yemelak kuajli iuan nouikaya Jehová, niman toTajtsin okiteochiuj pampa omelaujkanen (Job 42:12-17).

14, 15. ¿Tleka tikijtouaj ika itech tlen Satanás okijto xsan tlajtouaya itech Job?

¹⁴ Satanás xokijto tla san Job xueliskia yolmelaujkanemis itech toTajtsin. Noijki okijto yejon itech tinochimej. Ipan iTlajtol toTajtsin kuajli techasikamachiltia yejuin ipan Proverbios 27:11, kampa kijtoua: “Xmochiua titlamachilise, nokoneuj, niman xnechyolpakti, ijkon uelis niknankilis akin nechixnamiki”. Yejuin tlajtoltin, tlen onoijkuilojkej miyek xiuitl sakin ijkuak yomijka Job, techititia ika Satanás ok kixnamiki toTajtsin niman kijtotika tlen xmelauak itech itekipanojkauan.  Ijkuak tinemij ken kiyolpaktia Jehová, tikpaleuiyaj makinankili tlen xmelauak okijtoka Satanás niman ijkon tikyolpaktiaj toTajtsin. ¿Tlenon tiknemilia itech yejuin? Maski nonekis tikpatlas monemilis, ¿xmelak ika kualtsin yeskia tla titepaleuis manonankili tlen xmelauak okijto Diablo?

¹⁵ Xkita ika Satanás okimelajkaijto: “Se tlaltikpakchane kitemakas nochi tlen kipiya ipampa inemilis” (Job 2:4). Ijkuak okijto “tlaltikpakchane”, kuajli nesi ika Satanás xsan tlajtouaya itech Job, tlajtotoya itech nochimej tlaltikpakchanejkej. Yejuin melak noneki matikasikamatikan. Diablo yokijto ika tejua xuelis tiyolmelaujkanemis itech toTajtsin. Yejua kuelitaskia ika, ijkuak tikpiyas tlajyouilistli, maka xtlakamati toTajtsin niman xkajkaua tikchiuas tlen noneki. ¿Tlenon uelis kitekitiltis Satanás niman ijkon kichiuas tlen kineki?

16. a) ¿Tlenon kitekitiltia Satanás tlen ika kichiua makitlalkauikan toTajtsin? b) ¿Kenon Diablo uelis kitekitiltis yejuin ika mitstlatlatas?

¹⁶ Ken otikitakej ipan capítulo 10, Satanás kitekitiltia miyek tlemach tlen ika kichiua manoxelokan itech toTajtsin noso makitlalkauikan. Kachtopa, Satanás kichiua “ken itlaj león yejuan nanalkatinemi niman kitejtemojtinemi akinon kikuas” (1 Pedro 5:8). Niman yejuin tikitas ijkuak tla akin iuan timouika, mochanejkauan noso oksekimej tlaltikpakchanejkej, xkinekij xmomachti Biblia noso xchiua tlen ompa nestika (Juan 15:19, 20). * Ika ome, Satanás “nixpatla ken se chipauak iluikaktekitketl” (2 Corintios 11:14). Ijkon, Diablo kitekitiltis itlaj tlen nion xtikmatis kenon mitskajkayauas niman kichiuas maka sa xnemi ken toTajtsin kiyolpaktia. Se tlemach tlen kitekitiltia ijkuak kichiua xmoyolajmana. Kanaj kichiuas xnemili ika tejua xkeman uelis tikyolpaktis toTajtsin (Proverbios 24:10). San ika, maski Satanás makichiua kentla “león yejuan nanalkatinemi” noso kentla “chipauak iluikaktekitketl”,  yejua san se tlemach kinemilia: kijtoua ika ijkuak tejua tikpiyas tlauejli noso mitstlatlataskej, tijkauas toTajtsin. ¿Kenon uelis tiknankilis itech tlen yokijto niman tikteititis ika timelaujkanemi itech toTajtsin ken okichiuj Job?

17. ¿Tleka tiktlakamatij itlanauatiluan Jehová?

¹⁷ Tejua uelis tiknankilis tlen Satanás yokijto tla tinemi ken kuelita toTajtsin. ¿Tlenon kijtosneki yejuin? Biblia technankilia: “Xtlajsojtla on moTeko Dios ikan nochi moyojlo, ikan nochi moalma, ikan nochi motlamachilis, niman ikan nochi mochikaualis” (Marcos 12:30). Ijkuak ueyixtias motlasojtlalis itech toTajtsin, melak tiknekis tikchiuas tlen yejua kineki. Juan itlatitlankauj Cristo, okijkuilo: “Ijkuak tiktlakamatij itlanauatiluan Dios, sa no yejua tiktlajsojtlaj”. Tla tiktlasojtla Jehová ika nochi moyojlo, tikitas ika “itlanauatiluan xyejyetikej”, kijtosneki, xouijtika tikintlakamatis (1 Juan 5:3).

18, 19. a) Xkimijto san seki itlanauatiluan Jehová (xkita recuadro tlen itoka “ Maka matikchiuakan tlen Jehová kitlauelita”). b) ¿Kenon tikmatij ika toTajtsin xtechtlajtlanilia tlen xueli tikchiuaj?

¹⁸ ¿Katlejua itlanauatiluan Jehová? Seki tlanauatijli itech tlen noneki maka matikchiuakan. Sekimej uajlauej itech recuadro tlen itoka “ Maka matikchiuakan tlen Jehová kitlauelita”. Uajlauj miyek tlen Biblia techijlia maka matikchiuakan. Kanaj ijkuak tikitas, tikijtos ika xkijtosneki tla melak xkuajli. San ika, sakin tla yotitlanemili ipan textos tlen uajlauej ipan Biblia, tikitas ika melak tepaleuiyaj itlanauatiluan toTajtsin. Kanaj nonekis tikpatlas tlen tikchiujtika ipan monemilis niman yejon melak ouijtika tikitas, itlaj tlen xkeman tikixnamiki. San ika, akin nemij ken toTajtsin kuelita melak pakij niman nemij ika inyojlo (Isaías 48:17, 18). Niman tejua uelis ijkon tinemis. ¿Tleka ijkon tikijtouaj?

¹⁹ Pampa Jehová xkeman techtlajtlanilia matikchiuakan tlen xtiuelij tikchiuaj (xpoua Deuteronomio 30:11-14). Yejua kuajli kimatstika tlen uelis tikchiuaskej niman tlen xuelis tikchiuaskej (Salmo 103:14). Niman noijki, uelis techyolchikauas  niman ijkon matiuelikan tiktlakamatiskej. Pablo okijkuilo: “Dios yolmelajki niman mechpaleuis para on tetlatlatalistin ma ka nemopan uajlakan yejuan sanoyej temojtij yejuan nemejuamej xuelis nenkixikoskej. Yej ijkuak mechtlatlataskej, Dios mechmakas se ojtli kampaka uelis nenkitlalkauiskej on tetlatlatalistli, niman ijki uelis nenkixikoskej” (1 Corintios 10:13). Pampa Jehová kineki techpaleuis, uelis techmakas “ueyi poder yejuan [...] ualejtikaj itech” (2 Corintios 4:7). Ijkon ipan onochiuj Pablo, ijkuak yokixiko miyek tlatlatalistin, okijto: “Nochi tlemach ueli nikxikoua ipampa akin nechmaka ikoktilis” (Filipenses 4:13).

20. ¿Katlejua kualneskayomej kipaktiaj toTajtsin tlen noneki matikiskaltikan, niman tleka noneki ijkon matikchiuakan?

²⁰ Kema, tla tiknekij tikpaktiskej Jehová, xsan noneki maka matikchiuakan tlen yejua kitlauelita, noijki noneki matiktlasojtlakan tlen yejua kitlasojtla (Romanos 12:9). ¿Xmelauak ika kuajli timomachilia tla imiuan tinemi akin tlanemiliaj ken tejua, kuelitaj tlen tejua tikuelita niman kitlakamatij tlanauatiltin tlen tejua tiktlakamati? Jehová noijki ijkon. Xyejyeko tiktlasojtlas tlen yejua kitlasojtla. Ipan Salmo 15, kampa nesi akinomej  toTajtsin imiuan nouika, noijtoua seki itech yejuin tlemach (xpoua Salmo 15:1-5). Akin imiuan nouika Jehová “nouikaj ken kinyekana on Espíritu”, kijtosneki ika yejuamej: “Tetlajsojtlaj, pakij, noyolseuiaj, noijyouiyaj, tenotskej, ikan kuajli inyojlo tepaleuiyaj, nochipa kichiuaj on tlen kijtouaj, yolyemankej, niman kuajli nonauatiaj” (Gálatas 5:22, 23).

21. ¿Tlenon mitspaleuis tikpiyas kualneskayomej tlen toTajtsin kineki?

²¹ Mitspaleuis tikpiyas kualneskayomej tlen toTajtsin kineki tla nochipa tikpoua niman timomachtia Biblia. Tla timomachtia itech Jehová niman tikasikamati tlen kineki xchiua, noijki titlanemilis ken yejua (Isaías 30:20, 21). Ijkuak ueyixtias motlasojtlalis itech Jehová, melak tiknekis makiyolpakti ken tinemi.

22. ¿Tlenon uelis tikchiuas tla tinemi ijkon ken toTajtsin kuelita?

²² Noneki timochikauas tla tikneki tinemis ken Jehová kineki. Biblia kijtoua ika ijkuak tikpatla tlen tikchiua, kentla tikpatlas monemilis niman tikyenkuilis (Colosenses 3:9, 10). San ika, ijkuak salmista otlajto itech itlanauatiluan toTajtsin, okijkuilo: “Tla notlakamatij noselia se ueyi tetlayokolijli” (Salmo 19:11). Tla tejua yotipeuj tinemi ken toTajtsin kuelita, noijki tikselis miyek tlateochiualistin. Niman, ijkon tiknankilis tlen Satanás yokijto niman tikyolpaktis Jehová.