TLAMACHTIJLI 30
¡Akin yomijkej uelis yoliuiskej!
Melak toyolkokouaj ijkuak miki yakaj akin tiktlasojtlaj. Yejua ika, Biblia kijtoua ika mikilistli totlauelikniuj (1 Corintios 15:26). Ipan tlamachtijli 27, otikitakej ika Jehová kipopolos mikilistli. San ika, ¿tlenon kichiuas Jehová inpampa akin yomijkej? Ipan yejuin tlamachtijli, tikitaskej ika Jehová yokijto ika kinyolitis akin yomijkej niman ijkon nochipa manemikan. ¡Kema, oksejpa tikimitaskej akin yomijkej! ¿Uelis tikneltokaskej ika nochiuas yejuin? ¿Yoliuiskej ne iluikak, noso nikan ipan tlaltikpaktli?
1. ¿Tlenon kineki kichiuas Jehová inpampa akin yomijkej?
Jehová sa kinektika kinyolitis akin yomijkej. Job, se tlakatl akin kitekichiuiliaya toTajtsin, kuajli kimatstoya ika toTajtsin xkilkauaskia ijkuak mikiskia niman nemiskia ipan tlalkontli. Job okijli toTajtsin: “Tejua tinechnotsas niman nejua nimitsnankilis” (xkita Job 14:13-15, TNM).
2. ¿Tleka tikmatstokej ika akin yomijkej yoliuiskej?
Ijkuak Jesús onen ipan tlaltikpaktli, toTajtsin okimakak kojtilistli niman ijkon makinyoliti akin yomijkaj. Ika yejon, Jesús ouel okiyoliti se ichpokatsin akin kipiaya 12 xiuitl niman itelpoch se siuakaualtsintli (Marcos 5:41, 42; Lucas 7:12-15). Sakin, omik Lázaro, akin iuan nouikaya Jesús. Maski Lázaro ikipiaya naui tonajli ika yomijka niman ika yokitokakaj, Jesús okiyoliti. Jesús oyaj kampa okitokakaj niman okinots toTajtsin. Satepan okijto: “¡Lázaro, xuajkisa!”. Biblia kijtoua ika “on mikatsintli ouajkis”. ¡Lázaro oyoliuj! (Juan 11:43, 44). ¡San xkonnemili kenijki melak oyolpakej nochimej akin kitlasojtlayaj Lázaro!
3. ¿Uelis yoliuiskej akin melak tikintlasojtlaya?
Biblia kijtoua: “On mikatsitsimej yoliuiskej” (Hechos 24:15). Nochimej akin Jesús okinyoliti xoyajkej iluikak (Juan 3:13). Yejuamej melak oyolpakej ijkuak oksejpa okinyolitijkej ipan yejuin tlaltikpaktli. Sa achijtsin poliui ijkuak Jesús oksejpa ijkon kichiuas, yejua kinyolitis nochimej akin yomijkej niman ijkon nochipa manemikan ipan yejuin tlaltikpaktli kampa melak tlakualtsinkan yes. Yejua okijto ika nochimej akin Jehová kimilnamiki yoliuiskej maski kanaj oksekimej yokimilkaujkej (Juan 5:28, 29).
OKSEKI XKASIKAMATI
Matikitakan tleka uelis tikneltokaskej ika akin yomijkej yoliuiskej. Noijki matikitakan kenijki uelis techyolseuis tlen temachtia Biblia itech yoliuilistli.
4. Jesús okiteititi ika ueli teyolitia
Kuajli xkita tlenon opanok ijkuak Jesús okiyoliti Lázaro. Xkitakan Juan 11:14 niman 38-44, niman xtlajtokan itech yejuin:
-
¿Tlenon techititia ika Lázaro melauak omijka? (Xkitakan Juan 11:39).
-
Tla Lázaro yaskia iluikak, ¿tiknemilia ika kuelitaskia oksejpa yoliuis ipan tlaltikpaktli?
5. ¡Melak miyekej yoliuiskej!
Xkitakan Salmo 37:29 niman xtlajtokan itech yejuin:
-
¿Kanon chantiskej nochimej akin yoliuiskej?
Jesús melak miyekej kinyolitis, xsan akin kiueyichiuayaj Jehová. Xkitakan Hechos 24:15 niman xtlajtokan itech yejuin:
-
Ijkuak yoliuiskej akin yomijkej, ¿akinon tikuelitaskia tikitas?
Jesús uelis kinyolitis akin yomijkej, ijkon ken se tajtli ueli kitlachialtia ikoneuj ijkuak kochi.
6. Tlen kijtoua Biblia itech yoliuilistli uelis mitsyolseuis
Miyekej melak yokinyolseui ijkuak kitaj ipan Biblia kenijki Jesús okiyoliti ikoneuj Jairo. Xkitakan kenijki Jesús okiyoliti yejuin ichpokatsin ipan Lucas 8:40-42 niman 49-56.
Ijkuak Jesús kiyolitiskia ikoneuj Jairo, yejua okijli: “Maka xmomojti, yej san xtlaneltoka” (xkitakan Lucas 8:50). Aman ika yotikitakej ika toTajtsin kinyolitis akin yomijkej, ¿kenijki uelis mitspaleuis yejuin...
-
... tla miki yakaj akin tiktlasojtla?
-
... tla tikixnamiki itlaj kampa ueliskia timikis?
Xkitakan VIDEO niman xtlajtokan itech yejuin:
-
¿Kenijki nomachiliaj itajuan Phelicity pampa kimatstokej ika ajsis tonajli ijkuak imichpokatsin oksejpa yoliuis?
SEKIMEJ KIJTOUAJ: “Xnikneltoka tla yoliuiskej akin yomijkej”.
-
¿Tejua tlenon tikijtoskia?
-
¿Katlejua texto tikteititiskia niman ijkon titeasikamachiltis ika uelis yoliuiskej akin yomijkej?
TLEN OTIUEL
Biblia kijtoua ika melak miyekej yoliuiskej. Jehová kineki ika nochimej akin yomijkej mayoliuikan, ika yejon, yokimakak Jesús miyek kojtilistli niman ijkon mateyoliti.
¿Kenon titlanankiliskia?
-
¿Kenijki tikmatij ika Jehová niman Jesús sa kinektokej teyolitiskej?
-
¿Kanon yoliuiskej akin yomijkej: ne iluikak, noso nikan ipan tlaltikpaktli? ¿Tleka ijkon tikijtoua?
-
¿Tleka tikneltoka ika yoliuiskej akin tikintlasojtlaya?
OKSEKI XKITA
Xkita tlenon uelis mitspaleuis maka melak xmoyolkoko.
“Tlen uelis kinpaleuis akin noyolkokouaj” (¡Xtlachiakan!, núm. 3 2018)
¿Uelis kipaleuis tlen Biblia kijtoua akin noyolkokoua?
Xkita kenijki uelis tikpaleuis se konetl ijkuak miki yakaj akin melak kitlasojtla.
¿Nemij sekimej akin yaskej iluikak? ¿Nemis yakaj akin xyoliuis?
Puede que también le interese
TLEN MIYEKPA NOTLAJTOLTILO
¿Kenon nochiua ijkuak se kimachtiaj itech Biblia?
Ijkuak mitsmachtiskej iteixpantijkauan Jehová uelis tijkuis maski san katlejua Biblia. Uelis ompa nemiskej mochanejkauan noso moamigos.
