Ijkuak Jehová okichijchiuj familia, okinmaktili tajtin makintlajpiyakan inkoneuan (Colosenses 3:​20). Tla titajtli, tejua motekiyo tikinmachtis mokoneuan makitlasojtlakan Jehová niman manochiuakan tekitkej ijkuak yonoskaltijkej (2 Timoteo 1:5; 3:​15). Noijki, noneki tikmatis tlenon onka ipan inyojlo. Tlen kitaskej tikchiua melak kinpaleuis. Tla kachtopa tejua tikpiya ipan moyojlo iTlajtol toTajtsin, yejon mitspaleuis melak kuajli tikinmachtis mokoneuan (Salmo 40:8).

TLEN BIBLIA KIJTOUA: “Noneki nemis listo para nentlakakiskej. No xmatikan ika xmechtokaroua nimantsin nentlajtoskej” (Santiago 1:​19). Nasikamati ika tla tikneki mokoneuan kuajli matlajtokan mouan, noneki tikimititis ika nochipa tiknektika tikinkakis ijkuak kinekiskej mitsnotsaskej. Xchiua manomachilikan ika yolseuilistli, ijkon mitsijliskej tlen kimachiliaj (Santiago 3:​18). Tla yejuamej kitaj ika tejua san tichikaujkatlajtoua niman san tikinmajua, kanaj xkinekiskej mouan tlajtoskej. Xkimijyoui niman nochipa xkimijli ika tikintlasojtla (Mateo 3:​17; 1 Corintios 8:1).

TLEN UELIS TIKCHIUAS:

• Tiknekis ijkuak mokoneuan kinekiskej tlajtoskej mouan

• Nochipa xtlajto imiuan mokoneuan, maka san ijkuak onka tlauejli

TLEN BIBLIA KIJTOUA: “Akin kiteititia ika kuajli kasikamati itlaj kinextis tlen kuajli” (Proverbios 16:​20). Kemantika xsan nonekis tijkakis tlen kijtouaj, noneki tikasikamatis tlen melauak onka ipan inyojlo. Telpokamej noso ichpokamej kemantika kiueyikaijtouaj noso itlaj kijtouaj maski xijkon kinemiliaj. “Akin tlanankilia ijkuak xikuajli kikaki tlenon opanok, xtlamachilise.” (Proverbios 18:​13.) Kuakon maka nimantsin xkualani (Proverbios 19:​11).

TLEN UELIS TIKCHIUAS:

• Xyejyeko maka tiktlajtolkotonas mokoneuj. Maski san tlenon mamitsijli, maka peuas tiktsajtsilis

• Ijkuak tejua tikpiaya xiuitl ijkon ken mokoneuj, xkilnamiki kenon timomachiliaya niman san tlenon itech titlanemiliaya

TLEN BIBLIA KIJTOUA: “Xtlakaki, nokoneuj, ijkuak mitsyektlalia motaj, niman maka xkaua itlanauatil monan” (Proverbios 1:8). Jehová yokinmakak tlanauatijkayotl tajtli niman nantli itech inkoneuan. Nemejuamej noneki nenkinmachtiskej nemokoneuan mamechtlakaitakan niman mamechtlakamatikan (Efesios 6:​1-3). Yejuamej kitaj ijkuak intajuan xkipiyaj san se tlanemilijli (1 Corintios 1:​10). Ika yejon, tla xsan noijki nentlanemiliaj, maka xmokualanikan imixpan nemokoneuan, pampa yejon uelis kichiuas maka mamechtlakaitakan.

TLEN UELIS TIKCHIUAS:

• San sekan xtlajtokan kenon nenkinyektlaliskej nemokoneuan

• Tla moixnamik tlamantik noso sejneka tlanemilia itech kenon nenkinmachtiskej nemokoneuan, xyejyeko xkasikamati

TLEN BIBLIA KIJTOUA: “Xmachti telpokatl ipan ojtli tlen kinamiki yas” (Proverbios 22:6). Tla tikneki kuajli manomachtikan mokoneuan, noneki itlaj tikchiuas. Noneki tiknemilis kenon tikinmachtis niman tikinmelajkatlalis (Salmo 127:4; Proverbios 29:​17). Tikinmelajkatlalis noijki kijtosneki tikinpaleuis makasikamatikan tleka noneki makitlakamatikan tlen tikimijlia (Proverbios 28:7). Xkinmachti noijki makitlasojtlakan iTlajtol toTajtsin niman matlanemilikan itech tlajtolyekanalistin tlen ompa uajlauej (Salmo 1:2). Ijkon kipiyaskej kuajli intlamachilis (Hebreos 5:​14).

TLEN UELIS TIKCHIUAS:

• Xmochikaua xkinpaleui mokoneuan makimatikan ika toTajtsin yemelak nemi, akin uelis itech tlaneltokaskej

• Xkinpaleui manotlajpiyakan itech tlen uelis kijtlakos innemilis chipauak: itech Internet noso redes sociales. Xkinmachtikan kenon notlajpiyaskej itech akin san kitejtemojtokej imiuan auilnemiskej