Yohani 5:1-47
5 Emanle yeela, yaakhalawo efesta ya Ayuta, nave Yesu aawela ayaaka o Yerusalemu.
2 O Yerusalemu, waacamela Mulako wa Ipucepuche, nookhalawo nchiya nenlo mu Ehepiri nniichaniwa Petesata, nenlo nrino mapithela mathanu.
3 Nipuro nenle waanakonawo muloko wa achu ancipale awiiceliwa, oohoona, oorakala, ni yaale yaarino nanceeche.*
4 *——
5 Nto vaavale aakhalavo mulopwana mmoha iiceliwa mu iyaakha makhumi mararu ni thanu nararu.*
6 Yesu aamonneiye mulopwana yoole akonne vaavale, nave asuwelaka wi aamaliha elukuluku yincipale iiceliwaka, aahi wa yoowo: “Onnachuna openuwa?”
7 Mulipa awiiceliwa aahaakhula: “Pwiya, nkaano muchu ookikeriha mu nchiya vaavaa maahi anatannyeyaaya; nyenya, elukuluku yeeyo kinachunaaka omorelamo, muchu mukina onnakivirela.”
8 Yesu aahi wa yoowo: “Vinya! Oteexe niphaani naa* nave weece.”
9 Moohilekela mulopwana aapenuwa, ateexa niphaani nawe,* nave apacerya weeca.
Nihiku nenle naari nihiku na Sapata.
10 Mwawiihiiha, Ayuta yaapacerya oloca wa mulopwana yoole aapenuxiwe eriki: “Olelo nihiku na Sapata, heneemereryiwa wi oteexe niphaani.”*
11 Nyenya owo awaakhula ariki: “Mulopwana yoowo okipenunxe tokilenle ariki: ‘Oteexe niphaani* naa nave weece.’”
12 Awo yaamukoha eriki: “Taani yoowo ooleenle ariki: ‘Oteexe niphaani naa nave weece’?”
13 Nyenya mulopwana ole aapenuxiwe haamusuwenle muchu ene, woona wi Yesu aapwahavo variyari va muloko wa achu waari vaavale.
14 Emanle weereya yeela, Yesu aamphwanya owo mu empa ya Muluku nave aalocano ariki: “Nkoona, vano woopenuwa. Ohicheke tho wanaawiili wi ehoophacuwele echu ekina opwaha yeela.”
15 Mulopwana aapwaha nave aaleela Ayuta wi aari Yesu aampenunxe.
16 Mwa yeeyo, Ayuta yaanamwaavyaavya Yesu, woona wi eerano ichu seiha mu nihiku na Sapata.
17 Nto Yesu aahi wa yaawo: “Atiithi aka anamulapa ophiyerya hiihaano, nave miyo tho kinnalapa.”
18 Ti nthowa nene Ayuta yaapacenryaaya waavyaavya meerelo a omwiipha, ohiya pahiru wanthowa na ohiiwelela nihiku na Sapata nyenya tho wa nthowa na omweera Muluku okhala Tiithi awe, iiseeraka okhala oolikana ni Muluku.
19 Mwawiihiiha, Yesu aaloca ni yaawo: “Mweeparipari kinnooleelaani wi, hiyaavo echu emoharu mano Mwaana oneereiye va meekheiye, nto oneerano pahiru yeeyo onooneiye Atiithi yeerakano. Woona wi, ichu seiho Tiithi oneereiyeno, Mwaana tho onneerano moolikana.
20 Vawi Atiithi annamusivelaxa Mwaana nave annamooniha ichu soothene anapakaaya, nave tho enarwa emooniherya miteko mitokweenexa opwaha seiha, wi mukhale ootikhiniheya.
21 Hiihaa ntoko Atiithi anaaviihaaya alipa ookhwa ni waavaha ekumi, vamohamoha tho Mwaana onnamvaha ekumi yoole onamukhweleiye.
22 Vawi Atiithi hanamuthoriha muchu, nyenya othoriha woothene amuhiyenrye Mwaana,
23 wi oothene emucicimihe Mwaana hiihaa ntoko anaacicimihaaya Atiithi. Oothene yoole ohinamucicimiha Mwaana hanaacicimiha Atiithi yaawo amurumme yoowo.
24 Mweeparipari kinnooleelaani wi, yoole oniiwa masu aka nave amweemererya Yoole okirumme ookhalano ekumi yoohimala, nave owo hathorihiwa, nyenya oovira mookhwani ayaaka wookumini.
25 “Mweeparipari kinnooleelaani wi, enamphiya elukuluku, nto vano yoophiya, vaavaa alipa ookhwa eneeraaya yiiwe nsu na Mwaana a Muluku, yaale eni ewiriyane anamukhala akumi.
26 Vawi hiihaa ntoko Atiithi aryaayano okumi mwa yaawo meekhaaya,* hiihaa tho aamvaha Mwaana okumi mwa yoowo meekheiye.
27 Nave awo aamvaha owerya wa othoriha, ntakhara owo Mwaana a muchu.
28 Muhitikhiniheye ni ela, vawi ennoorwa elukuluku yeeyo oothene ari mmahiyeni anuupuweliwa* eneeraaya yiiwe nsu nawe
29 nave ekhumemo: Yaale yenreno ichu saphaama, oviihiwa mookhwani wi yaakhele ekumi, nave yaale yenreno ichu soonanara, oviihiwa mookhwani wi ethorihiwe.
30 Nkinawerya weera echu mwa miyo meekhaaka. Hiihaa, ntoko kiniiwaaka, kinnathoriha, nave othoriha waka ti wawookololowa woona wi nkinaavya weerano yookhwela aka, nto yookhwela ya yoole okirumme.
31 “Waakhanle wi kiniseerela onamoona meekhaaka, onamoona aka tahi weeparipari.
32 Ookhalavo mukina onakeerela onamoona, nave koosuwela wi onamoona yoowo onakeereleiye ti weeparipari.
33 Nyuwaano mwaahaarumiha alopwana wa Yohani, nave owo aavaha onamoona weeparipari.
34 Nyenya, miyo nkineemererya onamoona onarweela wa muchu, nto kinaloca ichu seiha wi mvuluxiwe.
35 Muchu yoowo, aari muthiko woomwaleela ni wawaarya. Nyuwo mwaanachuna ohakalala mu omwaleela wawe, nto nchuno nlo hinaalekenle.
36 Nyenya kookhalano onamoona otokweene opwaha ole wa Yohani, woona wi miteko seiho Atiithi aka akirummaaya ophara, seiho kineeraakano, sinnavaha onamoona wi Atiithi takirumme.
37 Nave Atiithi akirumme miyo, annakeerela onamoona. Nyuwo hamutonko wiiwa nsu naya naari mano owoona okhala waya,
38 naari tho masu aya hanakhala mwa nyuwo, woona wi hamunamweemererya yoole amurummaaya.
39 “Nyuwaano munnatholathola Soorempwa woona wi munuupuwela wi munamukhalano ekumi yoohimala moorweela wa seiho, nyenya ti seiho tho inakeerela onamoona.
40 Nto nyuwo hamunachuna orwa wa miyo wi mukhaleno ekumi.
41 Miyaano nkineema ncicimiho nnarweela wa achu,
42 nto miyo, koosuwela phaameene wi himunamusivela Muluku.
43 Koorwa mu nsina na Atiithi, nto nyuwo himukaakhenle. Waakhanle wi oorwa muchu mukina mu nsina nawe nene, nyuwaano mwaahaala omwaakhela.
44 Muni nwerye hai ororomela muniiha mweemereryaka ncicimiho nnarwa wa mukina ni mukhwaawe nave muhaavyaka ncicimiho nnarwa wa Muluku mmoharu?
45 Muhuupuwele wi miyaano kini koosomeleeni wa Atiithi; nyenya ookhalavo yoowo oni oosomeleeni: Mose, yoowo munamuroromelaanyu.
46 Chiryene, waakhanle wi moomuroromela Mose, nyuwaano tho mwaahaala okiroromela, woona wi owo oorepa vooloca sa miyo.
47 Nto wakhala wi hamuneemererya soorepa sawe, muni mweemererye hai yeeyo kinalocaaka?”
Inoota
^ Naari: “oophoororowa.”
^ Eversikulu ela henaphwanyeya mu soorepa sakhalai, nave woonaru henapaka makupa a Soorempwa sooveereliwa.
^ 38.
^ Naari: “ekaama aa.”
^ Naari: “ekaama awe.”
^ Naari: “ekaama.”
^ Naari: “ekaama.”
^ Naari: “yamahala ya okumi mwa yaawo meekhaaya.”
^ Ela ti wi, mahiye a yaale akhwile nave anuupuweliwa ti Muluku.
