Yohani 15:1-27
15 “Miyo ka mwiri wa uuva* weeparipari, nave Atiithi aka tari mulipa oolima.
2 Awo annakwasa erihela okhwipi mirai soothene iri wa miyo sihinavaha sawiima, nave annarehererya* mirai soothene sinavaha sawiima, wi ivaheke sawiima sawaaca.
3 Nyuwo muri oorehereryiwa ene vanthowa na masu yaawo kiloncaaka wa nyuwo.
4 Mutitelele okhala mwawiiwanana ni miyo, nave miyo kinamutitelela okhala mwawiiwanana ni nyuwo. Hiihaa ntoko murai ohinaweryaaya ovaha yawiima mwa meekhaaya, ohikhanle va mwiri, nyuwo tho hanwerya ovaha sawiima mwaahikhala mwawiiwanana ni miyo.
5 Miyo ka mwiri wa uuva;* nyuwo mwa mirai sene. Oothene yoole onatitelela okhala mwawiiwanana ni mi nave miyo mwawiiwanana ni yoowo, onnavaha sawiima sincipale; woona wi mwaahikhala mwawiiwanana ni miyo hamuwerya weera echu.
6 Muchu aahititelela okhala mwawiiwanana ni miyo, owo onamuriheliwa okhwipi ntoko murai nave uume. Nave achu annacocela mirai seihe erihela vaikho, nave iho sinnavya.
7 Wakhala wi mootitelela okhala mwawiiwanana ni miyo nave masu aka ekhala mwa nyuwo, yoothene muneeraanyu mveke munamvahiwa.
8 Atiithi aka annacicimihiwa vaavaa munatitelelaanyu ovaha sawiima sincipale ni wooniherya wi mwa oohuserya aka.
9 Hiihaa ntoko Atiithi anakisivelaaya miyo, miyo kinnoosivelaani nyuwo; mutitelele okhala mu osivela waka.
10 Wakhala wi munniiwelela malamulo aka, munamutitelela okhala mu osivela waka, hiihaa ntoko miyo kiniiwelelaaka malamulo a Atiithi nave kinakhala mu osivela mwaya.
11 “Kihooleelaani ichu seiha wi ohakalala waka okhale mwa nyuwo* nave wi ohakalala wanyu waakhwanele.
12 Nlamulo naka ti nla: Musivelaneke mukina ni mukhwaawe, hiihaa ntoko miyo koosivenlaakaani nyuwo.
13 Haavo orino osivela otokweene ompwaha yoole onavaha* ekumi awe wa nthowa na asinthamwene awe.
14 Nyuwo mwa asinthamwene aka, mwaaneerano yeeyo kinoorumaakaani.
15 Nkinaweeraani tho akapuro, woona wi kapuro hanasuwela yeeyo pwiya awe oneereiye. Nto kinaweeraani asinthamwene, woona wi kinnoosuwelihaani ichu soothene kiiwalaaka ni Atiithi aka.
16 Tahi nyuwo mukithanlile, nto miyo koothanlileeni nyuwo nave kihoorumaani wi mpwahe nave mutitelele ovaha sawiima, sawiima seiho iniikhalelaru, wi moohipwacha echu eri yoothene muneeraanyu mwaaveke Atiithi mu nsina naka, awo enarwa yoovahaani.
17 “Kinnoolamulelaani ichu seiha, wi musivelaneke mukina ni mukhwaawe.
18 Wakhala wi elapo ennawiicaani nyuwo, suwelani wi epacenrye okiica miyo ehaakumve owiicaani nyuwo.
19 Waakhanle wi munnapaka makupa a elapo, elapo yaahaala wookhwelakaani vawi mwaahaala okhala awaya. Vano woona wi hamunapaka makupa a elapo, nto miyo kihoothanlaani mweelaponi, vanthowa na yeela, elapo ennawiicaani nyuwo.
20 Muupuwele masu kaaloncaaka wa nyuwo kiriki: Kapuro hanakhala mutokweene ompwaha pwiya awe. Yaarimwi ekihonxe miyo, anamoohooxaani tho nyuwo; yaarimwi ewiriyanne masu aka, ananwiriyana tho masu anyu.
21 Nyenya awo enarwa eweerelaani ichu soothene seiha vanthowa na nsina naka, woona wi hamusuwenle Yoowo okirumme.
22 Miyo kahaaruule kiloca ni yaawo, hekaakhanleno nthowa na ocheka waya. Nto vano awo haano mathowa a okhupanya wa ocheka aya.
23 Yoowo onakiica, onnawiica tho Atiithi aka.
24 Kahenreno mwa yaawo miteko seiho ihitonko weeriwa ti muchu mukina, hekaakhanleno nthowa na ocheka waya; nto vano awo aakoona ekiica nave tho ewiica Atiithi aka.
25 Nto ela yoheereya wi yaakhwanele masu arempwe Mmalamulo awi: ‘Awo aakiica ohirivo nthowa.’
26 Vaavaa mukhaviheryi oneereiye arwe yoowo kineeraaka kimurumihe moorweela wa Atiithi, munepa wa eparipari, yoowo onarwa wa Atiithi, yoola onarwa okeerela onamoona;
27 nave nyuwo tho munarwa mvaha onamoona, woona wi mookhala ni miyo ovinyerya woopaceryani.
Inoota
^ Naari: “mpesa.”
^ Naari: “okwaserya.”
^ Naari: “mpesa.”
^ Naari: “mukhaleno ohakalala omohamoha ntoko miyo.”
^ Naari: “onaleva.”
