Tiyaku 3:1-18
3 Asinnaka, ancipale a nyuwo himwaaphwanela okhala ahusiha, musuwelaka wi nnahaala othorihiwa moopwaha.*
2 Tiwi, oothene ahu ninnakwaculiwa* ikwaha sincipale. Muchu aahikwaculiwa mmasu awe, owo muchu oophaameya, onawerya weeciha mwiili awe woothene.
3 Wakhala wi noomakelela mukoi* mwaano mwa kavalo wi aniiweleleke, ninneecihatho mwiili awe woothene.
4 Mwaavarerye tho apophoro: Naamwi eri atokotoko nave enakakhiwa ni echeku yawuupa, awo aneecihiwa ni eleemi ekhaanixa, ekerihiwaka weiwo mwaneene onachuneiye oyawo.
5 Emohamoha tho, nlumi nikupa nikhaani na mwiili, nto nlo ninniirumiha mu ichu itokotokoxa. Vareryani tho: Nikalume nikhaani na mooro ninneeyela ntakhwa ntokotoko.
6 Tiwi nlumi tho mooro. Variyari va makupa oothene a mwiili ahu, nlumi nneemelela elapo ya sootakhala, woona wi ninnariipiha mwiili woothene, ninneeyela meecelo oothene a okumi,* nave makalume ene anarweela o Kehena.*
7 Axinama oothene a mutakhwani, ipalame, axinama awaapasa* ni axinama a mphareya, ananwerya okhoveleliwa nave annakhoveleliwa ti achu.
8 Nto haavo muchu onawerya okhovelela nlumi. Nno ti noohileeleya, nootakhala nave ti noosareya esenya yawiipha.
9 Ni nlumi nenlo ninnamuthamalano Yehova, Atiithi ahu, nave ni nlumi nenlo tho ninnawuulumelano achu yaawo apatuxiwe “oolikana ni Muluku.”
10 Eyano emohamoha yeeyo, ennakhumamo mareeliho ni wuulumela.
Asinnaka, honaphwanela wi ichu seereyeke mmukhalelo yoola.
11 Apwanne ehime emohamoha yeeyo, enanwerya okumiha maahi oosiva ni oowaawa?
12 Asinnaka, apwanne mwiri wa mukuukhu onanwerya omwiimiha asitona, naari mwiri wa uuva* wiimamo mikuukhu? Emohamoha tho, ehime ya maahi a maakha henawerya okumiha maahi oosiva.
13 Taani a nyuwo ori amiruku ni oosuwelaxa? Moorweela wa meecelo awe aphaama, oonihe miteko sa wiiyeviha sinarwa wa miruku.
14 Nyenya mwakhalano nrima nootakhala ni wiicana* mmurimani mwanyu, muhiithamaleke, naari wootherya eparipari.
15 Yeela tahi miruku yoorweela wirimu; ti ya veelaponi yavathi, ya axinama, ya masololo.
16 Ntakhara vaavaa orivo nrima ni wiicana,* wookhalavo tho namvutuka ni soonanara sa mukhalelo woothene.
17 Nyenya miruku soorweela wirimu voopacerya ti saweela, voocharela ti sa murecele, ti sooleva, sawiiwelela, soosareya ikharari ni sawiima saphaama, soohikhalano nthalu ni soohiisootherya.
18 Opwaha yeeyo, yawiima yawookololowa enamisiwa mmureceleni wa* yaale anapaka murecele.
Inoota
^ Naari: “waakhela othorihiwa otokotoko.”
^ Naari: “ninnahesa.”
^ Waari mukoi yoowo waamakeleliwa muxikoni ni mwaano wa kavalo wi eecihiweke.
^ Mu Ekriki, “ninneeyela makhalelo oothene ooyariwano (oophacuwano).”
^ Moone Masu Atharihiwe.
^ Naari: “awiipurula.”
^ Naari: “mpesa.”
^ Naari akhweya: “maraapwa.”
^ Naari akhweya: “maraapwa.”
^ Naari akhweya: “moorweela wa.”
