Salmu 74:1-23
Masikili.* Salmu a Asafi.
74 Khwoo Muluku, ntakhara heeni munnyanyanlaanyu okhala wookhala?
Ntakhara heeni esara anyu enavarelaaya* ni muhuwo yoowo munakukhulaanyu?
2 Nwuupuwele achu yaawo* mwaathanlilaanyu ovinyerya khalai,Nloko nenlo mooponlaanyu ntoko yoohiyeryiwa anyu.
Muupuwele mwaako Siyoni, weiwo mwaakhalaanyuwo.
3 Muye moone milepe soohimala.
Mwiicani oomwarya ichu soothene saari mu nipuro naweela.
4 Amwiicani anyu yaahoopa murika mpuwa mwa nipuro nanyu na muthukumano.
Yaaheemexamo mapanteera aya ntoko ineneeryo.
5 Awo yaari ntoko alopwana etheten’ye epaso wi yuuheno miri mutakhwani.
6 Awo yaapwesa iruku soothene soopachiwa ni ipaso vamoha ni mithipo.
7 Aasuka nipuro nanyu naweela.
Aamunanariha tapernaakulu yoowo oniichaneliwa nsina nanyu, emurihelaka vathi.
8 Awo ni muyareriwo aya yaaloca mmurimani mwaya eriki:
“Mapuro oothene a muthukumano a Muluku* mu elapo yeela anamusukiwa.”
9 Hiyaavo eneneeryo wi noone;Haavoru mulipa a miririmu,Nave haavo mmoharu a hiyo onasuwela elukuluku enahaala oviravo.
10 Khwoo Muluku, ophiyerya liini mwiicani oneereiye atitelele wooruwanaani?
Apwanne mwiicani onamukhaliha nsina nanyu mwamunyemu okhala wookhala?
11 Ntakhara heeni munakookihaanyu ntata nanyu, ntata nanyu noolopwana?
Mviihevo nenlo vachirima vanyu* nave mwaamalihe yaawo.
12 Nto Muluku tori Mwene aka ovinyerya ilukuluku sakhalai,Yoowo onapaka saweera sa ovuluxa veelaponi yavathi.
13 Nyuwo mwaatekhumiha ephareya ni ikuru sanyu,Mwaanyaanya miru sa axinama atokweene a mmaahini.
14 Mwaanyaanya miru sa Leviyata;*Nyuwo mwaahaavaha achu ntoko yoolya, wa yaawo anakhala mutakhwani.
15 Mwaahaacuula anaacuucu ni mihice;Muumiha mihice seiho saachimaka moohihiyererya.
16 Nihiku ti nawinyu, nave ohiyu tho ti wawinyu.
Moopaka omwaleela ni nsuwa.
17 Mootikitherya ilimiti* soothene sa elapo,Moopaka elimwe ni elukuluku ya nakhutu.
18 Muupuwele oruwana wa mwiicani, khwoo Yehova,Mukhalelo achu oololo anakhalihaaya nsina nanyu mwa munyemu.
19 Muhaavahererye axinama a mutakhwani okumi wa nsiya nanyu.
Muhicuwale okhala wookhala okumi wa achu anyu oohooxiwa.
20 Muupuwele nlakano nanyu,Woona wi mapuro eepiiphi a veelaponi aasareya nlala.
21 Muheemererye wi oohooxiwa alamwiheye;Oothoiwa ni oohaawa ecicimihe nsina nanyu.
22 Mvinye, khwoo Muluku, nave mwaakihe mulacu anyu.
Muupuwele wi khamiruku onnooruwanaani nihiku noothene.
23 Muhicuwale yeeyo amwiicani anyu analocaaya.
Niwoowo na yaale anawaakahaani ninnatitelela owela.
Inoota
^ Moone Masu Atharihiwe.
^ Naari: “enachuwaaya mwiixi.”
^ Mu Ehepiri, “Muupuwele muloko anyu.”
^ Naari: “Mapuro oothene mwemmo Muluku onalapeliweiyemo.”
^ Naari: “mmalayani mwanyu.”
^ Moone Masu Atharihiwe.
^ Naari: “ikhomo.”
