Mateyu 20:1-34
20 “Tiwi Omwene wa wirimu onalikana ni mwaneene a emaca, yoowo onapeherya wooxiixelo ayaaka owaavya anamuteko wi yalape mmacani mwawe.
2 Amanle olakana ni anamuteko wi aahaala owaakheliha etenaariyu emoha ya vanihikuni, ahaarumiha mmacani mwawe.
3 Aakhummeiye wanaawiili, variyari va ewora yaneeraru,* aawoona achu akina yeemenle va nchaco na omusika ehirino muteko;
4 aaloca tho wa yaawo: ‘Nyuwo tho, haweni mmacani mwaka, kinamoovahaani yeeyo eri yoophwanelela.’
5 Nave awo yaayawo. Aakhummeiye tho variyari va ewora yaneethanu nammoha* ni yaneethanu naxexe,* aaheerano emohamoha.
6 Wookuchulani, variyari va ewora yaneekhumi nammoha,* owo aakhuma, nave aahaaphwanya akina yeemenle, aakoha ariki: ‘Ntakhara heeni muryaanyu vaava nihiku nanteero muhilapaka echu?’
7 Awo yaahaakhula: ‘Tiwi hinimoonne muchu ene oomulapa.’ Owo aahi wa yaawo: ‘Nyuwo tho, haweni mmacani mwaka.’
8 “Wiilakavo, mwaneene a emaca aaloca ni mutokweene a anamalapa ariki: ‘Owiichane anamalapa nave waalive ikhorowa saya; waapacerye ale ookuchula nave okwaaxerye ni ale oopacerya ophiya.’
9 Aapacerya waaliva yaale yaaphin’ye wookuchulani ewora ya neekhumi nammoha, nave awaakheliha mmoha ti mmoha etenaariyu emoha.
10 Nto yaale oopacerya, yuupuwela wi anahaala oliviwa ikhorowa sawaaca, nyenya awo tho yaakhelihiwe etenaariyu emoha.
11 Yaakhenlaaya, yaapacerya omukhupanya mwaneene a emaca
12 eriki: ‘Achu ala ookuchula ophiya, alampe pahi ewora emoha; naamwi hiiha, mwaalimve moolikana ni hiyaano, nlampe nihiku noothene ni nsuwa nene!’
13 Nto owo aamwaakhula mmoha a yaawo ariki: ‘Nthamwene, nkiweerenle yoonanara. Opaceryaka muteko, apwanne hinaalakanne wi kaahaala wooliva ni etenaariyu emoha?
14 Okuxe eri yawaa oroweke. Kinachuna omvaha yoola ookuchula emohamoha ni yeeyo koovanhaaka.
15 Apwanne nkaano owerya wa weerano echu kinachunaaka ni ichu saka? Naari wi orino nrima,* nthowa na ooreera waka murima* ni yaawo?’
16 Mwawiihiiha, ookuchula anamukhala oopacerya, nave oopacerya anamukhala ookuchula.”
17 Erikimweeca mphironi, ewelaka eyaaka o Yerusalemu, Yesu aawiichanela okhwipi oohuserya awe khumi napiili, alocano ariki:
18 “Wiriyanani ela! Nnaya o Yerusalemu, nave weiwo Mwaana a muchu onarwa aveleeliwa wa ahooleli a alipa a mukucho ni alipa oorepa. Awo enarwa emuthoriherya okhwa,
19 ni omveleela wa amalapo wi emunyemule, onwaxula, ni omwiipha va mwiri; nave nihiku naneeraru onarwa aviihiwa mookhwani.”
20 Voocharela, aarwa mwaara a Sepeteyu vamoha ni anamwane awe eeli, amwaacamela Yesu, amukokhorela* nave amveka echu.
21 Yesu aamukoha: “Tiheeni munachunaanyu?” Owo aahaakhula: “Lamulelani wi mu Omwene anyu, anaaka ala eeli ekiraathi ni nyuwo, mmoha omoono anyu woolopwana nave mukina omoono anyu woothiyana.”
22 Yesu aahaakhula: “Nyuwaano hamunasuwela echu munavekaanyu. Apwanne munanwerya onwurerya koopho yoowo kinahaalaaka onwurerya?” Awo yaahaakhula: “Aa, nnanwerya.”
23 Owo aahi wa yaawo: “Eparipari, munammuwurerya koopho aka, nyenya vooloca sa okiraathi omoono aka woolopwana ni woothiyana, eyo heri wa miyo woovahaani; nto mapuro awo ta yaale athanliwe ni Atiithi aka.”
24 Vaavaa akina khumi yiiwalaaya yeela, yaatepa onanariwa ni ale eeli yaawo yaari onna.
25 Nto Yesu aawiichana oohuserya awe, alocano: “Moosuwela wi mamwene a maloko annaalamulela achu aya ntoko anachunelaaya, nave asitokweene annapharihela otokweene aya wi yaahooxe achu.
26 Eheereyeke hiiha ni nyuwaano; nyenya yoole onachuna okhala mutokweene variyari vanyu, onaphwanela okhala namuteko anyu,
27 nave yoole onachuna okhala oopacerya variyari vanyu, onaphwanela okhala kapuro anyu.
28 Hiihaa tho, Mwaana a muchu oorwa, ohiya wi arumeeliweke, nto wi arumeele ni ovaha okumi awe ntoko woopola mu nipuro na ancipale.”
29 Ekhumaka o Yeriko, muloko* mutokweene wa achu waamuchara.
30 Alopwana eeli oohoona yaawo yaakiranthe muxerexere mwa rampha, yaahiiwa wi Yesu onnavira nave yaakhuwela eriki: “Pwiya, Mwaana a Tavite, onimorele ikharari!”
31 Nto achu yaanaasamela, yaaleelaka wi emaale oloca; naamwi hiiha, awo yaanakhuwela vatokotoko eriki: “Pwiya, Mwaana a Tavite, munimorele ikharari!”
32 Mwawiihiiha, Yesu aaheemela, awiichana, nave aakoha: “Tiheeni munachunaanyu wi kiweereleeni?”
33 Awo yaahaakhula: “Pwiya, muhule miitho ahu.”
34 Yesu aamoriwano ikharari, atannya miitho aya nave moohilekela miitho aya yaahuleya, epacerya omuchara yoowo.
Inoota
^ Ela tiwi, variyari va ewora ya 9.
^ Ela tiwi, variyari va ewora ya 12, mitiya.
^ Ela tiwi, variyari va ewora ya 15.
^ Ela tiwi, variyari va ewora ya 17.
^ Mu Ekriki, “niitho naa ti noonanara; nootakhala.”
^ Naari: “okhala waka a mahala.”
^ Naari: “amucicimiha.”
^ Naari: “mucici.”
