2 Akorintu 9:1-15
9 Vano, vooloca sa muteko ola ntakhara aweela murima, tahi woochuneya wi koorepeleeni,
2 woona wi koosuwela wiiveleela wanyu nave wa yoowo kinnaloca mwawiirumiha wa Amaketoniya, kilocaka wi a wa Akaya ari ooreheryeya mu eyaakha emoha nave mvai anyu onnaaceenyerya ancipale a yaawo.
3 Nto kinnaarumiha anna, wi wiirumiha wahu vooloca sa nyuwo ohikhale wa siiyo, nave wi mukhale ooreheryeya, hiiha ntoko kaalenlaaka.
4 Waakhanle wi Amaketoniya aarwa vamoha ni miyo nave noophwanyaani muhireheryen’ye, hiyo naahaala wuuliheya muru wa nthowa na woororomelaani. Nyenya nyuwo tho mwaahaala wuuliheya muru.
5 Mwa yeeyo, kaahoona okhala woochuneya waaceenyerya anna wi ehoole orwa wooxekuryaani nave wi erehererye woosiilo ene yoovaha anyu ya mahala mwaaroromelinhaanyu. Hiihaa, ekhale yoorehereryeya ntoko echu evahiwe mwa mahala ohiya mwawaakelelihiwa.
6 Nyenya vooloca sa yeela, yoole onaala vakhaani onahaala tho ohepha vakhaani. Nto yoole onaala mwawaaca onahaala tho ohepha mwawaaca.
7 Mmoha ti mmoha eerekeno ntoko olakelenleiye mmurimani mwawe, ohiya athananaka* naari mookhinyereryiwa,* woona wi Muluku onamusivela yoole onavaha moohakalala.
8 Ohiya yeeyoru, Muluku onanwerya waaceererya mwa nyuwo mahala awe matokweene wi mahiku oothene mukhalekeno soothene sinoothowaani nave tho mukhaleno mwawaaca soothene munachunaanyu wi mphare muteko woothene waphaama.
9 (Hiihaa ntoko erempwaaya: “Owo onnakawa ni murima woothene;* owo onnaavaha alipa oohaawa. Wookololowa wawe murima onnatitelela okhala wookhala.”
10 Yoole onamvaha mwawaacaxa mulipa a waala mmiso ni epaau ntoko yoolya, onarwa tho oovahaani ni owaaceereryaani mmiso wi mwaale, nave onarwa aaceererya ohepha wa wookololowa wanyu.)
11 Mu ichu soothene munnareelihiwa wi mvaheke mwawaaca, nave achu enarwa emuthamalela Muluku wa nthowa na yoovaha anyu yeeyo hiyo nneeraahu naavahe akina.
12 Woona wi muteko ola munapharaanyu hori pahiru wi ikhwaaniheryiwe soothowa sa aweela murima, nyenya tho yaace masu a omuthamalela Muluku.
13 Awo annamucicimiha Muluku, woona wi muteko yoola wa okhaviherya ennooniherya wi nyuwo munniiwelela michaka saphaama vooloca sa Kristu, ntoko mulalen’yaanyu vanlakani vene, nave wi muri a mahala mu yoovaha anyu wa yaawo ni wa oothene.
14 Nave ni mavekelo a vathi va murima ntakhara nyuwo, awo annooniherya wi annoosivelaani wa nthowa na mahala matokweene a Muluku oopwaha owo oovanheiyeni.
15 Mathamalelo eye wa Muluku wa nthowa na mahala awe ootikhinihaxa.
