1 Petru 4:1-19
4 Woona wi Kristu oohooseya mmwiilini, nyuwo tho mwiilipiserye okhalano moonelo mmohamoha* yoowo; ntakhara muchu yoowo onahooxeya mmwiilini oohiya soocheka,
2 wi elukuluku yeeyo ohanleiyeno mwa mwiili, ahikhale tho ntakhara soochuna sa achu, nyenya ntakhara yookhwela ya Muluku.
3 Tiwi, yohaakhwana elukuluku mwaamalihaanyu mweeraka yookhwela ya achu a maloko, vaavaa mwaacharihaanyu meecelo awuuliha muru,* minkhela soonanara, ohapaliwa, ifesta sootakhala,* owuryasa ni olapela soophwaniherya.
4 Awo annatikhiniheya woona wi nyuwaano himunatitelela ochimaka ni yaawo mu ephiro emohamoha ya meecelo oonanara; mwawiihiiha awo annoolocaani moonanara.
5 Nyenya achu yaala enarwa emwaakhula yoole ori ooreheryeya waathoriha akumi ni alipa ookhwa.
6 Mweeparipari, ti nthowa nene michaka saphaama silaleiwaaya tho wa alipa ookhwa, wi naamwi awo ethorihiwe mmwiilini vamiithoni va achu, awo ekhale akumi mwawiiwanana ni munepa vamiithoni va Muluku.
7 Nyenya makuchuwelo a ichu soothene ari vakhiviru. Mwawiihiiha, mukhale amiruku, nave mukhale awiilipelela* mpakaka mavekelo.
8 Opwaha ichu soothene, mukhaleno osivela weeparipari wa mukina ni mukhwaawe, woona wi osivela onnakhuneela waaca wa soocheka.
9 Mwaakhelaneke mukina ni mukhwaawe muhiikhupanyeryaka.
10 Mwawiiwanana ni yamahala mmoha ni mmoha aakhenleiye, mpharihele eyo mu orumeelana mukina ni mukhwaawe ntoko anamuteko aphaama a mahala matokweene a Muluku yaawo anooniheryiwa mmikhalelo soohiyanahiyana.
11 Wakhala wi muchu onamuloca, eereno yeeyo ntoko yoole onaloca masu oorweela wa Muluku; wakhala wi muchu onamurumeela, eereno yeeyo ni ikuru Muluku onavaheiye; wi mu ichu soothene Muluku acicimihiwe moorweela wa Yesu Kristu. Ovuwa ni owerya ti sawawe okhala wookhala. Aamen.
12 Oosiveliwa, muhituthuwe ni saweeha soohiyanahiyana* munahoolelaanyu, ntoko wi echu evyaani yeeyo eneereya wa nyuwo.
13 Moohiyana, muhakalaleke vaavaa munuukaanyu makacamiho a Kristu, wi nyuwo muhakalale nave muchape tho variyari va wuupululiwa wa ovuwa wawe.
14 Wakhala wi munanyemuliwa* wa nthowa na nsina na Kristu, nyuwo muri oohakalala, woona wi munepa wa ovuwa, aa, munepa wa Muluku, onakhala mwa nyuwo.
15 Nyenya, ahikhale a nyuwo oni ahooseye ntoko mulipa awiipha naari mpava naari aweera soonanara naari awiivoliiherya mmiyaha sa achu akina.
16 Nto wakhala wi muchu onnahooseya ntoko Mukristu, ahuuliheye muru, nyenya atitelele omucicimiha Muluku, vaavaa onalaleyeiye nsina nenla.
17 Tiwi ela elukuluku yoolakeleliwa wi othoriha opacerye ni empa ya Muluku. Vano wakhala wi opacenrye ni hiyo, taavi eni ekhale makuchuwelo wa yaale ahiniiwelela michaka saphaama sa Muluku?
18 “Nave waakhanle wi muchu awookololowa onnavila ovulusiwa, tiheeni eni yeereye wa oonanara murima ni wa mulipa oocheka?”
19 Mwawiihiiha, yaale anahooseya mwawiiwanana ni yookhwela ya Muluku yiiveleele aneene* wa Mpatuxa oororomeleya vaavaa anapakaaya saphaama.
Inoota
^ Naari: “yoolakelela emohamoha.”
^ Mu Ekriki, aselxeiya. Moone Masu Atharihiwe.
^ Ifesta seiho muchu onamooneiye weera yeeyo onachuneiye.
^ Naari: “awiivareryela; oovinya.”
^ Naari: “soovarela.”
^ Naari: “munaruwaniwa.”
^ Naari: “eveleele okumi aya.”
