1 Petru 1:1-25
1 Miyaano Petru, murummwa a Yesu Kristu, wa nyuwo muri ntoko anamarwa mmwalamwalenle o Pontu, o Kalatiya, o Kapatosiya, o Asiya ni o Pitiniya, aa, wa nyuwo oothanliwa
2 mwawiiwanana ni osuwela khuluwi wa Muluku Atiithi, aweelihiwa moorweela wa munepa, ni yoolakelela ya okhala awiiwelela ni omiseryiwa nikhami na Yesu Kristu:
Mahala matokweene ni murecele saaceereryeye wa nyuwo.
3 Acicimihiwe Muluku, ni Tiithi a Apwiya ahu Yesu Kristu, woona wi mwawiiwanana ni ikharari sawe itokweene, owo oonivaha oyariwa ovyaani wa ewehereryo yoohimala, moorweela wa oviihiwa wa Yesu Kristu mwa alipa ookhwa.
4 Muluku ohoovahaani yoohiyeryiwa yeeyo ehinawerya otoloxiwa naari opahuwa. Owo ookhapelela yeela wirimu ntakhara nyuwo.
5 Nyuwo munnakhapeleliwa moorweela wa owerya wa Muluku wa nthowa na nroromelo, ntakhara ovulusa ori wooreheryeya wi wuupululiwe mu elukuluku yookuchula.
6 Wa nthowa nenla nyuwo munnahakalala vancipale, naamwi mu elukuluku tonto, ori woochuneya wi nyuwo mukhale awuukhuwa wa nthowa na saweeha soohiyanahiyana,
7 wi weereryiwa wa nroromelo nanyu, nenlo nrino esisapo etokweene opwaha ooru yoowo onarimeela naamwi eereryiwe vamooroni, nooniwe okhala nthowa ntakhara mathamalelo, ovuwa ni ncicimiho mu wuupululiwa wa Yesu Kristu.
8 Naamwi muhintonko omoona, nyuwo munnamusivela. Naamwi muhimoonaka hiihaano, nyuwo munnamuroromela yoowo nave munnahakalala vancipale ni ohakalala woohithariheya ni woocicimiheya,
9 vaavaa munaphwanyaanyu yoolakelela ya nroromelo nanyu, ori ovuluxiwa wanyu.*
10 Vooloca sa ovulusa yoola, alipa a miririmu yaawo yaalonce mwa miririmu sa mahala matokweene mwaahaalaanyu waakhela, yaahaavyaavya osuwela ni otholathola mwawiiseela.
11 Awo yaahititelela waavyaavya osuwela elukuluku yoolakeleliwa naari elukuluku taani munepa waari mwa yaawo wooniheryaaya vooloca sa Kristu, vaavaa owo waavanhaaya onamoona khalai vooloca sa ohooseya Kristu aahaaleiye ohoolela ni ovuwa yoowo waahaala ocharelavo.
12 Yaahuupululeliwa wi awo yaanarumeela, ohiya wa yaawo meekhaaya, nyenya wa nyuwo, vooloca sa yeeyo enalokohiwa hiihaano wa nyuwo moorweela wa yaawo alalenrye michaka saphaama wa nyuwo ni munepa waweela orumihiwe wirimu. Ichu seiya ankeelo anachunaaya wiiwexexa.*
13 Wa nthowa nenla murehererye muupuwelo anyu ntakhara muteko; mukhapelele mavyakelo anyu awuupuwela mwawaakhwanela; mutikitherye ewehereryo anyu mu mahala matokweene yaawo anahaala oruuhiwa mu wuupululiwa wa Yesu Kristu.
14 Ntoko anamwane awiiwelela, mmaale wuupiwa ni* soochuna mwaaryaanyuno khalai mu ohisuwela wanyu,
15 nyenya hiiha ntoko Aweela owiichanneiyeni, mukhale aweela mmeecelo anyu oothene,
16 vawi yoorempwa: “Nyuwo munaphwanela okhala aweela, woona wi miyo ka aweela.”
17 Nave wakhala wi munnawiichana Atiithi yaawo anathoriha ehirino nthalu mwawiiwanana ni muteko wa muchu ti muchu, mweeceke mu omoova Muluku variyari va elukuluku muryaanyu anamarwa.
18 Tiwi, moosuwela wi tahi ni ichu inuuca, ni eparata naari ooru, nyuwo mutaphuliwaanyu* wa mukhalelo wa okumi anyu woohiphuriha echu yoowo mwannyereryiwaanyu moorweela wa makholo anyu.*
19 Nto waari ni nikhami nasisapo, ntoko na epucepuche ehirakanle nave ehirino nthepa,* ela tiwi, nikhami na Kristu.
20 Eparipari, owo aahisuweliwa ehaakumve opatuxiwa elapo, nto aahoneihiwa omakuchuwelo wa ilukuluku wa nthowa nanyu.
21 Moorweela mwa yoowo nyuwo munnamuroromela Muluku, yoowo omviihale mwa alipa ookhwa nave amvaha ovuwa, wi nroromelo nanyu ni ewehereryo ekhale mwa Muluku.
22 Vano mwiiseelinhaanyu* moorweela wa wiiwelela wanyu eparipari, ni yookhumelela ya osivela wa onna woohiwoka, musivelaneke mukina ni mukhwaawe mweeparipari, vamoha ni murima woothene.
23 Tiwi nyuwo moovahiwa oyariwa ovyaani, ohiya moorweela wa mmiso onuuca, nyenya ni mmiso* ohinuuca, moorweela wa masu a Muluku mukumi yoowo onakhala okhala wookhala.
24 Tiwi “achu oothene ari ntoko manasi, nave ovuwa waya ori ntoko ethutu ya mutakhwani; manasi annuuma nave ethutu ennamora,
25 nyenya masu a Yehova anniikhalelaru okhala wookhala.” Nave “masu” ala michaka saphaama seiho ilaleiwe wa nyuwo.
Inoota
^ Naari: “ovuluxiwa wa ikumi sanyu.”
^ Naari: “anachunaaya woona vakhiviru ni vakhiviru.”
^ Naari: “muhichareke.”
^ Mu Ekriki, “moopoliwaanyu.”
^ Naari: “mihapo sanyu.”
^ Naari: “nipapa.”
^ Naari: “mweelinhaanyu okumi anyu.”
^ Ela tiwi, mmiso onawerya ovaha sawiima.
