Kiyariwe o epooma yo Saxony, yeeyo yaari Repuplika Temokratiku Yo Alemanya (RTA). Mukhalelo wa okumi wa echoko waari woohakalaliha ni woosivela, nave asitiithi aka yaahikihusiha meecelo aphaama. E Repuplika Temokratiku yo Alemanya naari nipuro na Komunismu, mwawiihiiha achu ancipale o Saxony, malapelo hiyaari ookhweleya. Nave wa miyo Muluku haakhanle. Ophiyerya iyaakha 18 mahusiheryo meeli yaahivolowela okumi aka: ateyismu ni komunismu.

Ntakhara heeni Komunismu aahikivolowela? Nthowa nawi aahusiha wi achu oothene toolikana, nave eyo yaanakisivela. Miyaano kuupuwela wi ichu soothene soomwiilini saaphwanela okaiwa moophwanelela. Mwawiihiiha, haavo aahaala okhala ookanyaari naari oohaawa. Mwa yeeyo kaahipacerya okhaviherya marehereryo a amiravo yaapaka makupa a Komunista. Vaavaa kaaryaakano iyaakha 14 kaahipacerya okhaviherya marehereryo yaarehererya ipapeli. Ahooleli a epooma ya Aue, vaava kaakhalaakavo, yaahisiveliwa vancipale ni muteko aka ophiyerya ekivaha phatamari. Naamwi kaari mmiravo, kaahaasuwela ahooleli ancipale yaapaka makupa a Komunismu. Wa miyaano, kaari mu ephiro yaphaama.

Mwawaakuveya ichu soothene saahitorokeya. Mu 1989, exiri yo Perlim yaahuuwa nave ahooleli ancipale a Komunismu o Europa yaahipwata tho. Eyo yaakivolowela vancipale. Nave nkaakotenle vaava. Voocharela kaahisuwela wi olamulelo wa elapo aka waanapaka ohookololowa wawaaca. Ntoko yootakiherya, yoowo ahaakhaviherya makupa a Komunismu haarino miphurelo mimohamoha ni yaale yaakhaviherya. Kaaniikoha: ‘Enaweryeya hai? Komunismu hanaloca wi achu oothene toolikana? Apwanne komunismu hanamootha’ Soothene seiya saahikeeriha okhala awuukhuwa.

Mwawiihiiha, kaahilakelela otikitheryeya mu wiipa macipo ni opintaari. Elukuluku yeeyo kiiha kihuseryaka mu esikola ya wiipa macipo nave kaachuna otitelela ohuseryaka wiipa macipo o universitati. Kuupuwela pahiru okhala mulipa a wiipa macipo ni opintaari. Voocharela, soothene seiye asitiithi aka yaakihusinhaaya kaahihiya okhwipi. Ovinyerya vaavaa echu kaachunaaka pahiru waakhela ochekula, yeeyo yaavolowela opaka ompwana ni asimwali oohiyana hiyana mu elukuluku emohamoha. Naamwi mukhalelo aka wa okumi waatoroken’ye nave kiivoliihenrye ni wiipa macipo ni opintaari, nlelo kaanoova vooloca sa omwaahiyu. Nave ichu seiyo kaapintaaraaka saanooniherya woova waka. Miyaano kaanuupuwela: ‘Tiheeni enahaala weereya ni mi omwaahiyu? Tiivi eri yoolakelela ya okumi?’

Vaavaa kaaphwannyaaka maakhulo a makoho aka kaahikhala ootikhiniheya! Nihiku nimoha osikola ni asinthamwene naavaanela vooloca sa omwaahiyu. Nthamwene mmoha iichaniwa Mandy, * aari Namoona a Yehova. Owo aahikivaha ekano yaphaamasa: “Andreas, waakhanle wi onnachuna ophwanya maakhulo aa vooloca sa okumi ni omwaahiyu, onaphwanela woona yeeyo Piipiliya onaloceiye.”

Miyaano nkeemerenrye yeeyo aalonceiye, nyenya kaahilakelela woona yeeyo Piipiliya aaloceiye. Mandy aahikooniha ekapitulu 2 ya Taniyeli, nave kaahikhala ootikhiniheya ni yeeyo kaalakhannyaaka. Eyo yaaloca sa alamuleli yaawo yaahaala okhalavo ophiyerya mmahiku ahu. Owo tho aahikooniha makupa makina a Piipiliya analoca sa omwaahiyu ahu. Wookuchulani miyaano kaahiphwanya maakhulo a makoho aka! Voocharela kaahipacerya wuupuwela: ‘Sooloherya iha sookhala ichu sincipale inalocaaya. Apwanne ela yawooniherya yawi Muluku ookhala chiryene? Mweeparipari, taani onawerya oloca sa omwaahiyu mmukhalelo yoola?’

Mandy aahikiperekha wa Horst ni Angelika, mutheli yoowo aari Namoona a Yehova yaakikhavihenrye omwiiwexexa Piipiliya. Mwawaakuveya kaahiiwexexa wi Anamoona a Yehova ti yaaworu anaakhaviherya achu osuwela nsina na Muluku, Yehova. (Salumu 83:18; Mateu 6:9) Nave tho kaahihuserya wi Yehova oonivaha ewehereryo ya okhala wookhala mparataiso veelaponi yeela yavathi. Salumu 37:9 NN, oni: “Yawo enamuweheryerya Yehova, yawo tinirwe yakhele elapo ya vathi.” Kaahisiveliwa osuwela wi achu oothene yaale anamwiiwelela Muluku anahaala okhala wookhala.

Nyenya hiwaari wookhweya opaka yeeyo Piipiliya onaloceiye. Kaaphwanela wiilipiserya vancipale. Woopaceryani kaaphwanela ohuserya okhala awiiyeviha, woona wi sookhumelela sa okhala mulipa awiipa macipo ni opintaari saakeeriha okhala awiirumiha. Nave tho hiwaari wookhweya ohiya muculi meerelo a ocapaheya kaapakaaka. Kinnamuthamalela Yehova nthowa na okhala oovilela ni oolevelela, yoowo onoona wiilipiserya wahu wi opaka yookhwela awe!

Ophiyerya iyaakha 18, ateismu ni komunismu aahivolowela vancipale mukhalelo aka wa wuupuwela. Nyenya voocharela kaahipacerya ochariha yeeyo Piipiliya onaloceiye. Yeeyo kihusenryaaka yookeeriha ohoova omwaahiyu ni okhalano yoolakelela ya okumi. Mu 1993, kaahipatisiwa ntoko Namoona a Yehova. Iyaakha thanu napiili ohoolo waya, kaahimuthela murokora oolapa, nsina nawe Tabitha. Olelo nnamaliha elukuluku ahu yincipale naakhaviheryaka akina omusuwela phaama Piipiliya. Ancipale hiiha ntoko miyo, yaahivoloweliwa ni ateismu ni Komunismu ovinyerya eyemve. Kinnatepa ohakalala owerya waakhaviherya omusuwela Yehova.

Vaavaa kaapacenryaaka omuhuserya Piipiliya ni Anamoona a Yehova asitiithi aka hiyaasiveliwa. Nave moovira wa elukuluku yaahiiwexexa wi omuhuserya Piipiliya wootoroka okumi aka moomalela. Mu ohakalala waka vano awo annamwaalakhanya Piipiliya nave annaphwanyeya mmithukumano sa Anamoona a Yehova.

Miyaano ni Tabitha nookhalano othela woohakalaliha woona wi ninnachariha ikano sa Masu a Muluku. Ntoko yootakiherya, Piipiliya onnaavaha atheli miruku wi ekhaleke oohakalala. Ochariha ekano yeeyo enneeriha othela wahu okhala woolipa.—Ahebri 13:4.

Olelo miyaano nkinoova omwaahiyu. Kinnapaka makupa a emusi etokweene, ya Anamoona a Yehova a elapo yoothene. Hiyaano nookhalano murecele, wiiwanana nave hinaavo nthalu variyari vahu. Ti yeela yaari yoochunaaka. Vano eparipari wa miyaano.