Ovinyerya kiyemve, kinnasiveliwa ni matakhwa. Emusi aka wiiliwiili yaaneeca mu matakhwa ni mu ilaaku saphaama seiyo saarukurerya epooma ahu, Jyväskylä, o Finlântiya sentral. Navetho kinnasiveliwa ni asinama. Vaavaa kaaryaaka mwaana, kaachuna omukhupaarela puusi ni mwaasaana a mwalapwa yoowo kaamphwanyaaka! Elukuluku kunnuwaaka kaananyeenyeya vaavaa kaawoonaaka achu yaahoosaka asinama. Voocharela, kaahipaka makupa a marehereryo yaawo yaakhapelela asinama, weiwo kaahaasuwela achu yaawo yuupuwela ntoko miyo.

Naanapaka mikipici mincipale vooloca sa okhapeleleya wa asinama. Naanavuwiha sooleeliherya mmikhalelo soohiyanahiyana mu ilooxa mwemmo waatumihiwamo akasako a isapala ni mu ilaporatoriyu saapaka ateste orweela wa asinama. Naaphiyerya opaka marehereryo a okhapeleleya wa asinama. Naari amvai ovuwiha malamulo ahu, nthowa na yeeyo, wiiliwiili naanakhalano makacamiho ni alamuleli. Kaanaphariwa ni osomeliwa ikwaha sincipale.

Ohiya owaniha ntakhara asinama, kaanaweiwa ni miyaha mikina sa elapo. Moovira wa elukuluku, kaahipacerya opaka makupa a marehereryo mancipale, ntoko Anistia Internacional ni Greenpeace. Okhaviherya marehereryo yaala yaari echu yoopacerya mu okumi aka. Miyaano kaanawaniha ntakhara alipa oohaawa, oovoliwa etala ni yaawo yaari oohikhapeleleya.

Nyenya vakhaani vakhaani kaahisuwela wi nkaahaala owerya otoroka elapo. Naamwi marehereryo yaale yaawerya omaliha makacamiho makhaani, matokweene nlelo yamvira etepaka onanara. Yaakhala ntoko wi ikuru sa onanara sanvira ivolowelaka elapo nave wi haavo aapwacha echu. Kiisoona wi kaari oohiwerya echu.

Kaakhala oothanana ni oohikhalano ewehereryo. Kaahipacerya omuupuwela Muluku ni Piipiliya. Kiiha kimuhusenrye Piipiliya ni Anamoona a Yehova. Naamwi konne epewe ni opwacha yaakoonihenryaaya, nkaari orehereryeya otoroka mukhalelo aka wa okumi. Nyenya vano ichu saari soohiyana.

Kaamukusa Piipiliya aka kipacerya omwaalakhanya. Weerano yeeyo yaahikikhaviherya. Kaahiphwanya makupa mancipale yaaloca sa waakhaliha phaama asinama. Ntoko yootakiherya, Masiposipo 12:10 onaloca wi “awokololowa onnakhapelela muhuwo awe”. (Piipiliya Nsu na Muluku) Kaahiiwexexa tho wi Muluku hanatannya makacamiho a veelaponi. Ohiya yeeyo makacamiho ahu annatepa woona wi ancipale hanachariha ohoolela wa Muluku. Kaahikuseya murima vaavaa kaahusenryaaka vooloca sa osivela ni ovilela wa Yehova.—Salumu 103:8-14.

Mu elukuluku yeeyo, kaahirepela kimvekaka liivuru Tiheeni Piipiliya Onanihusiheiye Chiryene? Ohivinrevo elukuluku yawaaca, mutheli yoowo ari Namoona a Yehova aahikisekurya nave akivaha yoohuserya ya Piipiliya, nave kaaheemererya. Navetho kaahipacerya ophwanyeya mmithukumano mu Empa ya Omwene. Eparipari yaahipacerya okhalano mitathaari mmurimani mwaka.

Nnikhaviheryo na Piipiliya, kaahipacerya opaka matorokelo mancipale. Kaahimaala ohapaliwa ni omulya soona. Mukhalelo aka wookumi ni oloca waka, hiiha ntoko moonelo aka vooloca sa alamuleli, saahitorokeya mwaphaama. (Aroma 13:1) Navetho kaahihiya meecelo aka akhalai vooloca sa ocapaheya.

Echu yoovila wa miyo waari otoroka moonelo aka vooloca sa marehereryo anaakhapelela achu ni asinama. Eyo hiyeeren’ye mwawaakuveya. Woopaceryani, kuupuwela wi kaahaala ohikhala oororomeleya waakhanle wi koohiya okhaviherya. Nyenya kaahiiwexexa wi Omwene wa Muluku yoowehererya yeeparipari ntakhara elapo ahu. Kaahilakelela okuha vanipuro noopacerya Omwene ni waakhaviherya achu ohuserya vooloca sa yoowo.—Mateu 6:33.

Ntoko muchu oowaniha, kaawoona achu mmikhalelo miili: aphaama ni oonanara murima. Nave kaakhala ooreheryeya owana ni yaale kaawoonaaka okhala oonanara murima. Nyenya nnikhaviheryo na Piipiliya koovootha wiica yoole kaaryaakano ntakhara achu. Ohiya yeeyo, kinneererya wooniherya osivela weekristu. (Mateu 5:44) Mukhalelo mmoha wa wooniherya osivela yoowo ori oloca ni akina michaka saphaama sa Omwene wa Muluku. Kinnahakalala woona mukhalelo muteko yoola onaaceereryaaya murecele ni ohakalala ni waavaha achu ewehereryo yeeparipari.

Kinnawerya okhalano murecele wa mmuupuwelo moorweela wa ohiya sawuukhula saka mmatani mwa Yehova. Kiri oolekecheya wi, ntoko Mpatusa harwa eemererya wi asinama ni achu ehoosiweke okhala wookhala naari mano wi elapo ahu epahuliwe okhala wookhala. Moohiyana, moorweela wa Omwene awe, moohilekela onahaala orehererya ichu soothene inananre. (Isaiya 11:1-9) Kinnatepa ohakalala ohiya pahiru osuwela iparipari seiya, nyenya tho waakhaviherya akina okhalano nroromelo mwa seiya. Olelo, nkinuupuwela wi kinnaphwanela otoroka mukhalelo wa elapo.