WA ALIPA OOYARA
6: Olaka
OLAKA TIHEENI?
Masu awi olaka anataphulela ohoolela naari ohusiha. Vakina vaya ennavolowela wookolola meerelo a mwaana. Ikwaha sincipale enaphitaanyerya omuvyakiha mwaana wi asuwele opaka soolakelela saphaama.
NTAKHARA HEENI TI YOOCHUNEYA?
Mahiku a mutano, olaka ti woorameya mu ichoko, alipa ooyara anuupuwela wi olaka onahaala okukuca ncicimiho na anamwane. Nto asitiithi a miruku annatikitherya malamulo oophimelela ni waahusiha anamwane aya ocharihaka.
“Anamwane anaphwanela ohusihiwa wi yunnuwe phaama ntoko achu atokweene. Ohirivo olaka, anamwane anahaala okhala ntoko mwaaceya yoowo onapheruwa ophiyerya opwina nthowa na ohikhalavo echu yoomweecihano.”—Pamela.
ECHU YAWEERA
Mukhale aweemeleleya. Wakhala wi mwaana hanachariha malamulo anyu, mmuleele wi sookhalavo sookhumelela sa ohiiwelela. Nto wakhala wi oopaka echu yaphaama, mmuthamalele.
“Ikwaha sincipale kinnamuthamalela mwanaka nthowa na okhala a wiiwelela mweelapo yeela yoohiiwelela. Othamaleliwa onnaweeriha weemererya olaka mweelukuluku analakiwaaya.”—Christine.
PIIPILIYA ONI: “Mutxhu ti mutxhu onaya ohepha yele anleiye.”—Galasya 6:7.
Mukhale oophimelela. Muhaakumve omulaka mwaana, muthokororye mannuwelo awe, mavyakelo awe ni wunnuwa wa yoohesa awe. Mwaana onnahuserya echu wakhala wi sookhumelela sinniiwanana ni yoohesa awe. Ntoko yootakiherya, opharihela moonanara ekaruma ya vaate enamweeriha wi enanare mwawaakuveya. Nto musepe tho onyeenyeya ni ichu ikhaani.
“Kinnaavyaavya osuwela waakhanle wi mwanaka eenre mwaayiini naari wi orimuhesa. Wookhalavo ohiyana variyari va emanya ni yoohesa. Emanya chiryene ennaphwanela wookololiwa.”—Wendell.
PIIPILIYA ONI: “Muhanyenyiheke murima aninyu, wi ehikhaleke òvolola.”—Kolosi 3:21.
Khalani oosivela. Onakhala wookhweya mwaana weemererya olaka wakhala wi onnoona wi asitiithi awe annamusivela.
“Elukuluku mwanihu aapankeiye soohesa sincipale, naamuleela wi naanasiveliwa ni yene nthowa na soolakelela saphaama aapankeiye khalai. Naamutharihela wi soohesa hisahaala omweeriha okhala muchu aphaama nave wi naanachuna omukhaviherya otoroka.”—Daniel.
PIIPILIYA ONI: “Okhwela [naari osivela] ti wovilela, ti wa orèra murima.”—1 Korinto 13:4.
