WA ALIPA OOYARA
7: Meecelo
MEECELO TIHEENI?
Meecelo anaahiwa malakiheryo yaawo mulakelenlaanyu ochariha mu okumi anyu. Ntoko yoolikanyiha, apwanne munnawetha okhala oororomeleya mu soothene? Moohikhwa minikwa munnachuna tho wi anamwane anyu ekhale hiiha.
Ntoko yootakiherya, muchu a meecelo aphaama, teekhaikhai, oowetha mmiteko ni a waacicimiha akina. Mikhalelo seiya sinnatikitheryeya phaama muchu apacerya ohuserya ari mwaana.
PIIPILIYA ONI: “Omuhusihe mmiravo metxelo aphama; uluvala, onamupuwela.”—Masiposipo 22:6.
NTAKHARA HEENI TI YOOCHUNEYA?
Meecelo aphaama toochuneya xaxaxa mweelukuluku yeela ya ikhankoonya. Mai mmoha nsina nawe Karyn ooloca: “Onthamwene woonanara onnaphwanyeya mu ekhankoonya vyakala mweelukuluku yoothene. Mwanihu naamwi akiranthe vakhiviru vahu onanwerya woona ichu soohiphwanelela!”
PIIPILIYA ONI: Achu ‘atokwene akhovelela othanlela saphama ni sonanara.’—Ahebri 5:14.
Meerelo aphaama toochuneya tho: Ela enaphitaanyerya ncicimiho ntoko oloca masu awi “khwoo” naari “kinnathamalela” ni waapwacha akina. Mikhalelo seiya ti soorameya woona wi achu ancipale anateteiwa ni ikhankoonya opwaha oteteiwa ni achu.
PIIPILIYA ONI: “Yeyo onakhwelawe wi atxhu ewereleke, weyotho owereleke yeyo.”—Luka 6:31.
ECHU YAWEERA
Mwaahusihe meecelo anyu. Sootholathola sinnooniherya wi amiravo anahaala osepa opaka sa mwiikho woosiilo wakhala wi aahusihiwa phaama wi weera yeeyo ti yoonanara.
MWEERERYE ELA: Mpharihele yaweereya ya mutano wi mpaceryihe ochekula vooloca sa meecelo. Ntoko ntakiheryo, wakhala wi yoolociwa sa nlala mu TV, akhweya muloce: “Ti yawoopiha wi achu annooniherya esara mmukhalelo yoowo. Onuupuwela wi tiheeni enaweeriha achu weerano hiiha?”
“Anamwane annaviliwa othanla variyari va yaphaama ni yoonanara wakhala wi hahusihiwe teevi eri yaphaama naari yoonanara.”—Brandon.
Mwaahusihe ocicimiha. Naamwi ari mwaana onanwerya ohuserya oloca “khwoo” naari “kinnathamalela” ni waathokororya akina. “Wakhala wi anamwane annoona wi annapaka makupa a emusi, a exikola ni a muceche, awo anahaala ochuna weera ichu saphaama seiyo sinaakhaviherya akina ohiya pahiru mukhataaya.”—Liivuru Parenting Without Borders.
MWEERERYE ELA: Mwaakawele anamwane anyu miteko sa vaate wi yoone ochuneya waya waarumeela akina.
“Wakhala wi anamwane ahu aakhovelela ophara miteko hiihaano, awo heni ehooxeye elukuluku eneeraaya ekhaleke mukhataaya. Eni eniiso esuwenle ophara miteko.”—Tara.
