Ti Liini Omwene wa Muluku Onahaalaaya Olamulela Elapo?
Oomuchara akina oororomeleya a Yesu yaahichuna osuwela elukuluku Omwene wa Muluku waahaalaaya opacerya olamulela. Yesu aahaakhula nikoho naya moorweela wa oloca wi hiyaaphwanela osuwela xaxaxa vaavaa waahaalaaya olamulela elapo yavathi. (Saw 1:6, 7) Nyenya woopaceryani, owo aahaaleela wi vaavaa yaahaalaaya woona saweereya sincipale mu elukuluku emohamoha, yaaphwanela ‘osuwela wi omwene wa Muluku [waari] vakhiviru’ nave wi elukuluku wi olamulele elapo yaahiphiya.—Luka 21:31.
SAWEEREYA TAANI YESU AALONCEIYE SAAHAALA WEEREYA?
Yesu aaloca: “Nloko nnamuroshana ni nloko nikhwaaya, nave omwene onamuroshana ni omwene mukhwaaya. Makupa mancipale onamukhalamo ocikinyeya otokotoko wa elapo ni etala vamoha ni ipahu.” (Luka 21:10, 11) Hiiha ntoko impressão digital inapakaaya eneneeryo, saweereya seiha soothene sahaala opaka makupa a eneneeryo yoosuwanyeya. Nave hiiha ntoko impressão digital enamooniheryaaya muchu, saweereya seiya ineereya mu elukuluku emohamoha sinnooniherya wi “Omwene wa Muluku ori vakhiviru.” Apwanne saweereya seiha sinneereya mu elukuluku emohamoha nave sinnooneya veelaponi yoothene? Muthokororye sawooniherya.
1. IKHOCO
Mu 1914, yaahipacerya ekhoco yeeyo yahintonko wooniha mmiyaha soothene saachu! Alipa oorepa miyaha wiiliwiili analoca eyaakha ya 1914 okhala eyaakha yeeyo yaatoronke achu, nthowa nawi yaari eyaakha yeeyo yaapacenryaaya ekhoco yoopacerya ya elapo yoothene. Ekhoco yeela yaahipaceryiha ophariheliwa ikaaro sa ekhoco, ipompa sawiipha, akapuchi a mooro, akapuchi a mwiixi ni ikina. Ela yaahooleliwa ni ekhoco yanawiili ya elapo yoothene, yeeyo yaapharihenle ipompa itokweene sawiipha. Achu annawana ikhoco mmapuro oohiyanahiyana ovinyerya 1914, nave ikhoco seiyo soowiipha amilyawu aachu.
2. OCIKINYEYA WA ELAPO
Encyclopedia Britannica (Enciclopédia Britânica) onnaloca wi eyaakha ti eyaakha annakhalavo amwaacikinye 100 akuru yaawo “anananariha ichu sincipale.” O Serviço Geológico wo Estatu Unitu woolokoha wi “mwawiiwanana ni yoolokoha yakhalai (opacerya mu 1900), ninnaaweherya a mwaacikinye atokweene 16 yaawo anahaala weereyaka eyaakha ti eyaakha.” Masiyentista makina analoca wi waaceereryeya wa a mwaacikinye nthowa nawi vano onakhala wookhweya waasuwela. Moohipwacha osuweliwa, mwaha ti wawi a mwaacikinye atokotoko orukurerya elapo annatannya makacamiho nave annawiipha achu oohaalakhanyeya.
3. OTHOWA WA YOOLYA
Othowa wa yoolya onnakhumelela veelaponi yoothene nthowa na ikhoco, makhwankwa, makacamiho a ophwanya ikhorowa, ohikhuma soolya mmacani, naari ohirupa phaama wa epula. Eyornali ya Eprokrama ya Yoolya ya Veelaponi Yoothene ya 2018 yooloca: “Orukurerya elapo, achu amilyawu 821 hanakhalano yoolya yawaakhwanela nave amilyawu 124 annakhwa etala.” Ohilya phaama onnawiipha anamwane ophiyerya amilyawu 3.1 eyaakha ti eyaakha. Mu 2011, ti yeeyo yeerinhe okhwa wa aporsentu 45 a anamwane mu elapo yoothene.
4. IPAHU NI IRECA
Marehereryo Eekumi a Elapo Yoothene aavuwiha: “Ovinyerya mu 2001 ophiyerya olelo wootepa wooneya waaceereryeya wa ireca sincipale. Ireca sakhalai ntoko koolera, ikwerere ni korowesa sinnatitelela, vamoha ni ireca ivyaani ikhumelenle ntoko iphumu, noosekuwa, iphumu sa Oriyente Metiyu, Ebola ni Zika.” Naamwi masiyentista ni matotore ehusenrye vancipale vooloca sa ireca, awo hanawerya ophwanya oloola wa ireca soothene naari omaliha.
5. MUTEKO WOOLALEERYA VEELAPONI YOOTHENE
Yesu aaloca makupa makina a eneneeryo vaavaa aalonceiye: “Michaka yeela ya omwene enamulaleiwa mu elapo yoothene yookhalamo achu wi iweerele onamoona maloko oothene. Vaavaa teneeraaya ephiye makuchuwelo.” (Mateu 24:14) Naamwi elapo ehoolelaka makacamiho awoopiha, achu opwaha amilyawu 8 a mahimo oothene annalaleya michaka saphaama sa Omwene wa Muluku mu ilapo 240 nave ilocelo soopwaha 1.000. Ela hetonko weereya mmiyaha saachu.
TIHEENI ENATAPHULELAAYA ENENEERYO YEELA WA HIYO?
Saweereya inapaka makupa a eneneeryo yeeyo Yesu aavanheiye sinneereya olelo. Ntakhara heeni ninnaphwanela okhalano nchuno mu yeela? Nthowa nawi Yesu aahiloca: “Nyuwo moona seiha seereyaka, musuwele wi omwene wa Muluku ori vakhiviru.”—Luka 21:31.
Moohilekela Omwene onahaala waakhwaniherya yoochuna ya Muluku veelaponi ya vathi
Waakhwanela wa eneneeryo yeeyo Yesu aalonceiye, vamoha ni sooleeliherya sa Mpiipiliyani, sinnanikhaviherya wiiwexexa wi Omwene wa Muluku otikitheriwe wirimu mu 1914. a Mweelukuluku yeeyo, owo aamutikitherya Mwanawe, Yesu Kristu, ntoko Mwene. (Salumu 2:2, 4, 6-9) Moohilekela, Omwene wa Muluku onahaala olamulela elapo yavathi nave onahaala omalihavo olamulelo woothene woonanara ni weeriha elapo okhala parataiso wa achu okhala wookhala.
Mookwasa, masu a nivekelo na ntakiheryo nenlo Yesu aahusinheiye anahaala okhwaaniheryeya: “Omwene anyu orwe. Okhwela wanyu weereye, ntoko wirimu hiihaa tho vathi va.” (Mateu 6:10) Tiheeni Omwene wa Muluku oneeraaya ovinyerya vaavaa otikitheryiwaaya wirimu mu 1914? Nave tiheeni nnaweheryaahu vaavaa Omwene onahaalaaya opacerya waalamulela achu oothene?
a Wa sooleeliherya sikina vooloca sa eyaakha ya 1914, mmoone liivuru Tiheeni Piipiliya Onanihusiheiye? olaleeryiwe ti Anamoona a Yehova, Yooleeliherya 22, ipaaxina 217-220.
