Ntakhara Heeni Ninnachuna Omwene wa Muluku?
Woopaceryani, Mpatuxa ahu, yoowo nsina nawe nri Yehova, taari pahiru Mulamuleli. Owo aanalamulela mmukhalelo woosivela. Owo aarehererya nipuro nooreera—emaca ya Eteni wi achu ekhalekemo. Owo tho aahaavaha yoolya yincipale. Mwawaaceererya, owo aahaavaha muteko woohakalaliha. (Maphatxuwelo 1:28, 29; 2:8, 15) Waakhanle wi aatitelela wiiwelela ohoolela woosivela wa Muluku, awo yaahaala okhalano murecele.
Makholo ahu oopacerya yaamukhooca Muluku ntoko Mulamuleli aya
Piipiliya onnaloca wi munkeelo oomwaryeya, yoowo voocharela iichaniwe Satana Musaserya, aahaakaaha ophwanelela wa olamulelo wa Muluku. Owo aamanle oloca wi achu yaahaala okhala oohakalala ehihooleliwaka ni olamulelo wa Muluku. Moothananiha, makholo ahu oopacerya, Atamu ni Eva, yaachara meerelo a Satana nave emmwareela Muluku.—Maphatxuwelo 3:1-6; Wupulula 12:9.
Woona wi Atamu ni Eva yaamukhooca Muluku ntoko mulamuleli aya, awo yaayeleela nipuro naya nooreera vamoha ni ewehereryo ya okhala elukuluku yoothene ni ekumi yoophaameya. (Maphatxuwelo 3:17-19) Yoolakelela aya yaahaavolowela anamwane aya. Piipiliya onaloca wi nthowa na ocheka wa Atamu, “ocheka woovolowa mweelaponi yavathi mwa muchu mmoha nave okhwa woovolowa mwa ocheka wu.” (Aroma 5:12) Yoocheka yookumiherya epahu ekina: “Muchu mukina onamulamula mukhweiye amweerelaka yoonanara.” (Eklesiyaste 8:9) Mmasu makina, vaavaa achu aniilamulelaaya mukhataaya, makacamiho anamwaaceereryeya.
MAPACERERYO A OLAMULELO WA ACHU
Nimuroti hiiwelenle olamulelo wa Yehova
Mulamuleli oopacerya onalociwa Mpiipiliyani aari Nimuroti. Owo hiiwelenle olamulelo wa Yehova. Ovinyerya mmahiku a Nimuroti, achu yaawo analamulela, annapharihela moonanara owerya waya. Mu iyaakha 3.000 muculi, Mwene Solomoni aarepa: “Koochikela woona soohoosha sincipale ineereya veelaponi ya vathi. Nkoonani, oohooxiwa yaanlaka haavo onaakhaviherya. Oowerya tanaahoosha.”—Eklesiyaste 4:1.
Mmahiku ahu ichu hitoroken’ye. Mu 2009, Maloko Awiiwanana yaaloca wi olamulelo woonanara onamvira waacaka, nave olamulelo “echu yeeyo enaahooxa vancipale achu.”
ELA ELUKULUKU YA WEERAVO ECHU!
Achu anaachuna alamuleli aphaama ni mukhalelo waphaama wa olamulela. Nave ti yeeyo Mpatuxa ahu ororomelinheiye!
Ophiyerya tho alamuleli aphaama a achu hanawerya omaliha makacamiho aachu
Muluku ootikitherya Omwene, naari olamulelo yoowo onahaala waaraceela alamuleli aachu nave “omwene owo otikitheryiwe ti wa mahiku oothene.” (Daniyeli 2:44) Ola Omwene yoowo achu ancipale anavekaaya. (Mateu 6:9, 10) Nyenya Muluku hanii alamuleleke meekheiye. Moohiyana, owo oomuthanla muchu mukina yoowo aakhanle veelaponi wi akhale Mulamuleli. Taani yoowo othanliwe ni Muluku?
